ქალაქ ოზურგეთის ნომერ მეოთხე საჯარო სკოლის მე-8, მე-9 და მე-10 კლასის მოსწავლეებმა შექმნეს სანიშნები, რომლებიც ძალიან საინტერესოდ გამოიყურება.
როგორც ყველა მკითხველი ადამიანისთვის ცნობილია, წიგნის კითხვის დროს სანიშნი ერთ-ერთი საჭირო ნივთია, რათა კითხვა უფრო მეტად სასიამოვნო და საინტერესო გახდეს. არაერთი სტილის სანიშნი არსებობს. ადამიანები მათ გემოვნების მიხედვით არჩევენ. ზოგიერთს დიდი სანიშნები მოსწონს, ზოგს სადა, ზოგს კი პატარა და კომპაქტური. ინტერნეტ სივრცეში არაერთი საინტერესო ვიდეო მოიპოვება იმის შესახებ, თუ როგორ უნდა გავაკეთოთ მოსახერხებელი სანიშნი, რომელიც ჩვენც მოგვეწონება და, რა თქმა უნდა, წიგნისთვისაც გამოვიყენებთ. იდეა, რომელიც მოსწავლეებს დაებადათ, ძალიან მნიშვნელოვანია მათივე განვითარებისთვის. უნდა აღინიშნოს ის ფაქტიც, რომ ისინი საკმაოდ მოტივირებულები არიან, რომ პროექტი გახდეს წარმატებული და საზოგადოებამ რაც შეიძლება მალე გაიგოს მათ შესახებ.
„გურია ნიუსთან“ საუბრისას იდეის ავტორმა მოსწავლეებმა თქვეს, რომ მათ ამ გეგმის განხორციელებაში სკოლა ძალიან ეხმარებათ და იმედოვნებენ, რომ ხალხს პროექტი მოეწონება, შესაბამისად, მათ სიყვარულსაც დაიმსახურებს. გარდა ამისა, მოსწავლეებს გვერდში უდგას გურიის ტექნოპარკი, რომელიც ახალია ოზურგეთში და ნელ-ნელა ხდება ხალხისთვის ცნობილი.
„ჩვენ ვართ გუნდი, რომელსაც ჩამოყალიბებაში სკოლამ და სხვა პროექტებმა შეუწყო ხელი. ძალიან დიდი ხნის განმავლობაში გვქონდა იდეა, მაგრამ ვისხედით უმოქმედოდ. ერთ დღესაც გადავწყვიტეთ, რომ საკუთარი თავი გამოგვეწვია და გვემოქმედა. ყველა იდეა, რომლისთვისაც ვიბრძვით, მსჯელობის დროს დაიბადა. ერთი სიტყვით, ერთმანეთის ინსპირაცია ვართ. ვფიქრობთ, რომ ყველა ჩვენი ჩანაფიქრისთვის სწორად გვყავს შერჩეული სამიზნე აუდიტორია და პოტენციური მომხმარებლები, რაც განაპირობებს პროდუქტის წარმატებულად გაყიდვას. ჩვენ არ შეგვიქმნია რაღაც ახალი, რასაც არავინ ქმნის, მაგრამ ჩვენ ვაწარმოებთ ჩვენივე დიზაინის, სიყვარულით შექმნილ ხელნაკეთ სანიშნებს. გუნდში გაერთიანებული ვართ შვიდი მოსწავლე: თამარ ტრაპაიძე, ლალი ცეცხლაძე, საბა ჩაჩუა, ნინი ჩხაიძე, ნინი მეგრელაძე, ლუკა მორგოშია, მარიამ გოგელია. სანიშნების ფასი იზრდება დიზაინის მიხედვით. შეკვეთებს ვიღებთ და ვამზადებთ ჩვენივე მომხმარებლების გემოვნებითაც. სანიშნებზე მუშაობის დროს საქმეები გადანაწილებული გვაქვს, მაგალითად, ერთი ხვრეტს, მეორე ხატავს, წერს, მესამე ლაკავს, მეოთხე „პომპომჩიკებს“ აკეთებს და ა.შ.“
მოსწავლეები ამბობენ, რომ ტექნოპარკმა, კონკრეტულად კი, ავთანდილ თავდიშვილმა, მათ გამოუყო სამუშაო ადგილი, სადაც შეძლებდნენ სანიშნების გაკეთებას. ბავშვები მადლობას უხდიან ოზურგეთის ტექნოპარკს და ადამიანებს, რომლებიც დაეხმარნენ ამ საქმეში. იდეის ავტორებმა ასევე თქვეს, რომ ისინი შეკვეთებსაც იღებენ და სურთ, რომ გაკეთებული სანიშნები ოზურგეთის ბაზარშიც განათავსონ. გარდა ამისა, სანიშნებს საქართველოს მასშტაბით საქართველოს ფოსტის საშუალებით გზავნიან.
“პირველ რიგშიც, სკოლა ძალიან დაგვეხმარა რომ ერთმანეთი გაგვაცნო იდეათეკის წყალობით, შემდეგ კი ჩვენით ავიდგით ფეხი და ჩვენით წავედით წინ. ზოგადად, ჩვენ გვაქვს ერთი მთავრი მიზანი, ეს არის ბავშვებისთვის სურვილის ჩასახვა, ანუ იმ ახალგაზრდებისთვის, რომლებსაც არ გააჩნიათ არავითარი მიზანი, ან თუნდაც არ აქვთ მოტივაცია, ჩვენ გვინდა, რომ დავანახოთ ჩვენი მაგალითი და ვაჩვენოთ, რომ შეუძლებელი არაფერია და მუდამ შეიძლება მიზნის მიღწევა. ჩვენ ასევე გვაქვს გეგმები, რომლებსაც ჯერჯერობით ვერ გავამხელთ და ვაპირებთ ნელ-ნელა განვახორციელოთ“, – თქვეს ოზურგეთის მეოთხე სკოლის მოსწავლეებმა „გურია ნიუსთან“.
მართლაც, ეს ერთგვარი ექსპერიმენტი და ამავდროულად, გამოწვევაა, რომელიც ერთობ საინტერესო იქნება. გარდა მოტივაციისა, ბავშვებს ეძლევათ განვითარების საშუალება, ამისთვის კი ძალიან მნიშვნელოვანია ხალხის ხელშეწყობა.
