ხვნა-თესვის სეზონი გურიაში: „ეს არის პროგრამა, როგორ არ უნდა დაეხმარო ფერმერს“

მოახლოებული საგაზაფხულო ხვნა-თესვის წინ, გურიაში, მოსახლეობის უმეტესობისგან ისმის, რომ წელს საყანე ფართობს ვერ დათესავენ.

„გაძვირებულია საწვავი, სასუქი. არ არის ტრაქტორები. აქა-იქ ჰყავდათ, ისიც უნდა ეძებო სოფლიდან სოფელში. ასეთი ვითარება, ასეთი გასაჭირი სეზონზე, მართლა არ გვახსოვს, დიდი ხანია“, -ამბობენ „გურია ნიუსთან“ ოზურგეთის სოფლების მცხოვრებლები.

ჩვენ შევხვდით და ვესაუბრეთ ოზურგეთის მუნიციპალიტეტის სოფლების მცხოვრებლებს, რომლებსაც საყანე ფართობები აქვთ.

გურიაში, ძირითადად, როგორც მცირემიწიან რეგიონში, სახნავი ფართობი საკუთრებაში მოსახლეობის უმეტესობას, 0,20 ან 0,25 კვ.მ აქვს. თუმცა ამ ფართობის დახვნა-დათესვასაც კი უმეტესობა, როგორც ჩვენთან განაცხადეს, ვერ ახერხებენ.

_5 ათასი კვ.მ. საყანე ფართობი მაქვს თუმცა ვერანირად ვერ მოვახერხებ დამუშავებას. მეზობელმა დახნა გუშინ. ათას კვ.მ. ფართობში 80 ლარი გადაიხადა. ძლივს მოახერხა, ისესხა. მე ვისგან ვისესხო? არ ვიცი, ასეთი გასაჭირი მართლა არ მახსოვს, _ გვეუბნება სოფელ ქაქუთის მკვიდრი ანზორ შათირიშვილი.

სოფელ მერიის მკვიდრი, მზია ღლონტი ამბობს, რომ უმეტესობა, ჯერჯერობით სასოწარკვეთილია და არ იციან, როგორ დავხნათ და დავთესოთ.

სხვადასხვა სოფლების მოსახლეობას ჩვენ ვკითხეთ სახელმწიფო დახმარებაზე, რომლის ამოქმედების შესახებ, ახლახან განცხადება გააკეთა პარლამენტის აგრარული კომიტეტის თავმჯდომარემ, ნინო წილოსანმა:

„ფერმერები საგაზაფხულო სამუშაოებისთვის თანადაფინანსებას მიიღებენ.  ამოქმედდა სასოფლო–სამეურნეო დანიშნულების მიწის ნაკვეთების მესაკუთრეების ხელშემწყობი სახელმწიფო პროგრამა. მცირე ფართობის სასოფლო–სამეურნეო დანიშნულების მიწის ნაკვეთების მესაკუთრეთა ხელშეწყობის ახალი პროგრამით მოხდება ქვეყანაში სასოფლო–სამეურნეო სამუშაოების დროული და ეფექტური განხორციელების ხელშეწყობა წარმოებისთვის საჭირო საშუალებებზე ხელმისაწვდომობის გაუმჯობესებისა და აგრარულ სამუშაოების მიმართულებით აქტივობის სტიმულირებისთვის”, – თქვა მან.

კონკრეტულად კი, პროგრამის ფარგლებში, სასოფლო-სამეურნეო მიწაზე, სუბსიდირების მოცულობა განისაზღვრება 1 ჰა-ზე 300 ლარის ოდენობით. სუბსიდიას მიიღებენ  0.25 ჰა-დან 1,25 ჰა-მდე მიწის მესაკუთრეები ,

თუმცა აქ უმთავრესი დეტალი არ ჩანს_ ფერმერს თუ ეს ერთი ჰა ფართობი ერთ სივრცეში არ აქვს, აღნიშნული 300 ლარიან დახმარებას ვერ მიიღებს. რაკი, დახმარების გაცემა 0,25 კვ. მ ფართის მქონე ბენეფიციარებიდან იწყება, ხოლო კონკრეტულად გურიაში საკუთრებაში არსებული 1 ჰა ფართობი მხოლოდ 0,20 ფართებისგან შედგება. საკუთრება სხვადასხვა ადგილზეა და ფერმერი მხოლოდ იმ ფართის ანგარიშზე მიიღებს დახმარებას, რომელიც 0, 25 კვ. მ. არის.

_მაგარი “ოსტაპ ბენდერები” არიან. ვინ შეადგინა ასეთი დახმარების წესი? ეს არის არა დახმარების, არამედ ისეთი პროგრამა, როგორ არ უნდა დაეხმარო ფერმერს, – ამბობენ „გურია ნიუსთან“ ფერმები, მზია ქავთარაძე, ნუცა ღლონტი, გრიგოლ მამინაშვილი და სხვები.

სტატიას, გურიაში ხვნა-თესვის საკითხზე და ამ მიმართულებით ხალხის გასაჭირზე, მალე შემოგთავაზებთ.