რუსეთში, უახლოეს ხანში, შესაძლოა, მასობრივი მობილიზაცია გამოცხადდეს უკრაინაში რაც შეიძლება მეტი მეომრის გასაგზავნად. ამის შესახებ ბრიტანული გამოცემები Guardian-ი და Independent-ი წერენ. მათი წყარო დასავლელი მაღალჩინოსანია.
წყაროს თანახმად, მასობრივი მობილიზაციის პერსპექტივა კრემლში შეშფოთებასაც იწვევს, რადგან ეს ფაქტობრივად, იქნება უკრაინაში წარუმატებლობის აღიარება. მასობრივი მობილიზაციის შემთხვევაში, რუსეთის ქალაქებში შესაძლოა, საპროტესტო გამოსვლები დაიწყოს, ამიტომ, ამ ეტაპზე ცდილობენ პოტენციური რეკრუტების რიცხვის გაზრდას რუსეთის ღარიბ რაიონებში მცხოვრებთა მობილიზებით და გასაწვევთა მაქსიმალური ასაკის გაზრდით
რუსეთის პრეზიდენტის პრესმდივანმა დმიტრი პესკოვმა სააგენტო „ინტერფაქსს“ განუცხადა, რომ საყოველთაო მობილიზაციის შესახებ გავრცელებული ცნობები „ფეიკია“.
რუსეთმა უკრაინის წინააღმდეგ 2022 წლის 24 თებერვლიდან დაიწყო ომი, რომელსაც “სპეციალურ სამხედრო ოპერაციას” უწოდებს და მიზნად ასახელებს უკრაინის “დემილიტარიზაციას და დენაციფიკაციას”.
თითქმის ოთხი თვეა უკრაინის არმია რუსეთის სამხედრო ძალებს ინტენსიურ წინააღმდეგობას უწევს. რუსეთი საკუთარი დანაკარგების შესახებ ინფორმაციას არ ავრცელებს. უკრაინის გენშტაბში აცხადებენ, რომ 24 თებერვლის შემდეგ ლიკვიდირებულია 34 ათასზე მეტი რუსი სამხედრო. ამ ინფორმაციის დამოუკიდებელი წყაროებით გადამოწმება ჯერჯერობით შეუძლებელია.
წყარო: რადიო თავისუფლება
