“რუსეთ-უკრაინის ომის პირველივე დღეებში რუსეთის არმიამ მასშტაბურად დაიწყო საშვეულმფრენო ტაქტიკური დესანტის გადასხმა უკრაინის აეროდრომებზე მათი დაკავებისა და იქ მძიმე სამხედრო-სატრანსპორტო თვითმფრინავების მისაღებად, რომლებიც რუსეთის ტერიტორიიდან უკრაინის შუაგულში ერთ საათში ათასობით რუს მედესანტეს გადაიყვანენ. გადასატანი საზენიტო-სარაკეტო კომპლექსები “იგლები”, “გრომები”, “სტინგერები” საუკეთესო საშუალებაა, რომ უკრაინულმა მცირერიცხოვანმა ჯგუფებმა რუსულ სატრანსპორტო თვითმფრინავებზე ინადირონ მათი დაჯდომა-აფრენის მომენტში”, – ეს არის ამონარიდი “კვირის პალიტრის” 2022 წლის 28 თებერვლის სტატიიდან “პუტინის ბლიცკრიგს ჰიტლერის ბლიცკრიგის ბედი ელის”, რომელშიც რუსეთის უკრაინაზე თავდასხმიდან მალევე ვივარაუდეთ, რომ უკრაინული აეროდრომების დაპყრობისა და იქ სამხედრო-სატრანსპორტო თვითმფრინავების მასობრივად დაჯდომითა და დესანტის გადასხმით რუსი ოკუპანტები კიევის რაც შეიძლება სწრაფად დაპყრობას და შესაბამისად, ომში ბლიცკრიგით გამარჯვებას ეცდებოდნენ.
ომის დაწყებიდან 15 თვის შემდეგ უკრაინის შეიარაღებული ძალების დაზვერვის მთავარი სამმართველოს უფროსი, გენერალ-მაიორი კირილ ბუდანოვი ერთ-ერთ ინტერვიუში ამბობს, რომ პუტინს კიევის სწრაფად დაპყრობის მხოლოდ ერთი გეგმა ჰქონდა და ის ითვალისწინებდა კიევიდან სულ რაღაც ოციოდე კმ-ში მდებარე ჰოსტომელის აეროდრომის ჯერ აღებას და იქ რუსი მედესანტეებით სავსე 30-მდე სატრანსპორტო “ილის” დაშვებას, რის შემდეგაც მათ კიევის ცენტრისთვის უნდა შეეტიათ.
ბუდანოვის თქმით, 24 თებერვალს მთელი დღის განმავლობაში მედესანტეებით სავსე რუსული სატრანსპორტო თვითმფრინავები რამდენჯერმე მართლაც აფრინდნენ ცაში, მაგრამ ბელარუსში დაშვებამ მოუწიათ, რადგან უკრაინელებმა შეძლეს ნახევარდღიანი ბრძოლით ჰოსტომელის აეროდრომის შენარჩუნება, შემდეგ კი მათ არტილერისტებმა სულზე მიუსწრეს და საარტილერიო ზალპების შემდეგ თეორიულადაც კი შეუძლებელი გახდა რუსული სადესანტო “ილების” დაშვება ჰოსტომელის აეროდრომზე, რადგან ასაფრენ-დასაფრენი ზოლი მწყობრიდან გამოვიდა.
რუსებს რომ შესძლებოდათ ჰოსტომელში დიდი დესანტის გადასხმა, კიევს დაიპყრობდნენო, დასძინა უკრაინის სამხედრო დაზვერვის უფროსმა ბუდანოვმა.
გამოდის, რუსეთის გენშტაბის ოპერატიული გეგმა ბლიცკრიგის თაობაზე, რომელიც თავად პუტინმა მოიწონა, ძირითადად დამყარებული იყო სწორედ ჰოსტომელის აეროდრომის აღებაზე და იქიდან ელვისებურ შეტევაზე კიევის ცენტრისკენ, უკრაინის სამხედრო-პოლიტიკური ხელმძღვანელობის ლიკვიდაციასა და უკრაინის სათავეში პრორუსი მარიონეტი ხელისუფლების დასმაზე, რაც კრემლს გახანგრძლივებულ ფართომასშტაბიან ომს ააცილებდა, რისთვისაც რუსეთის არმია არ იყო მზად.
ერთხელ კრემლმა ეს სცენარი წარმატებით უკვე გაითამაშა, როდესაც 1968 წლის 21 აგვისტოს გამთენიისას ჩეხოსლოვაკიის დედაქალაქ პრაღის საერთაშორისო აეროპორტი “რუზინე” აიღო.
“აეროფლოტის” სამგზავრო თვითმფრინავის Ан-24-ის ეკიპაჟმა პრაღელ ავიადისპეტჩერებს ავარიული დაშვება სთხოვა თვითმფრინავის ბორტზე ვითომ ტექნიკური პრობლემის გამო, რაზეც, ბუნებრივია, თანხმობა მიიღო, მაგრამ აეროპორტის მთავარ შენობასთან მიყენებული ამ საბჭოთა თვითმფრინავიდან მშვიდობიანი მგზავრების ნაცვლად გე-ერ-უს “კალაშნიკოვიანი” სპეცრაზმელები გადმოხტნენ და წუთებში დაიკავეს სადისპეტჩერო კოშკი, რის შემდეგაც უპრობლემოდ უზრუნველყვეს აეროპორტში ერთმანეთის მიყოლებით სამხედრო-სატრანსპორტო Ан-12-ების მიღება, რომლებიც საბჭოთა მედესანტეებით იყო სავსე. ასე დაიწყო ჩეხოსლოვაკიის დაპყრობა საბჭოთა კავშირისა და ვარშავის პაქტის სხვა წევრი ქვეყნების მიერ 1968 წელს.
უკრაინის ჰოსტომელის აეროდრომზე კი კრემლის ბინადარმა ჯერ საშვეულმფრენო ტაქტიკური დესანტი გაუშვა, როდესაც ბელარუსის მხრიდან ძალიან დაბალ სიმაღლეზე შეფრენილმა 34-მა რუსულმა სამხედრო-სატრანსპორტო და საბრძოლო შვეულმფრენმა 300-მდე რუსი მედესანტე გადასვა ჰოსტომელის აეროდრომის დასაკავებლად და იქ Ил-76 ტიპის მძიმე სამხედრო-სატრანსპორტო თვითმფრინავების მისაღები პლაცდარმის მოსამზადებლად.
უკრაინელებმა მოახერხეს რამდენიმე რუსული შვეულმფრენის ჩამოგდება, თუმცა რუსმა სამხედროებმაც შეძლეს ჰოსტომელის აეროდრომზე დესანტირება, მაგრამ იმავე დღეს მისი სრულად გაკონტროლებისთვის ძალა აღარ ეყოთ, რითაც დაიკარგა მოულოდნელობის ეფექტი და უკრაინელებს მიეცათ შესაძლებლობა მწყობრიდან გამოეყვანათ აეროდრომის ასაფრენ-დასაფრენი ზოლი.
სწორედ ასე, კონკრეტულ და მოულოდნელობის ეფექტზე აგებულ ერთ სპეცოპერაციაზე დამყარებული, კიევის სამ დღეში აღების იმედი პუტინს ხუხულასავით ჩამოეშალა. სამაგიეროდ, ხანგრძლივი ფართომასშტაბიანი ომი მიიღო, საიდანაც ვინ იცის, თავად რუსეთი “მთლიანი” გამოვა თუ არა…
P.S. ჰოსტომელში სადესანტო ოპერაციის ჩაფლავების შემდეგ რამდენიმე დღეში რუსმა ოკუპანტებმა ის უკრაინის საზღვარზე შეჭრილი სატანკო დანაყოფების დახმარებით მაინც აიღეს, მაგრამ უკვე ძალიან გვიან იყო და ამიტომაც ერთ თვეში ჰოსტომელიდან და საერთოდ, კიევის სიახლოვიდან კრემლმა გაიყვანა თავისი ჯარები…
P.S.S. ომის პერიოდში ცნობილი გახდა, რომ აშშ-ის სადაზვერვო სტრუქტურებს თურმე მოპოვებული ჰქონიათ პუტინის ზესაიდუმლო გეგმა ჰოსტომელის აეროდრომის აღებისა და მედესანტეების საშუალებით კიევის სწრაფი დაპყრობის შესახებ, რაც უკრაინის უმაღლეს ხელისუფლებას რუსეთის თავდასხმამდე გაუზიარეს. ასე რომ, პუტინის ბლიცკრიგი განწირული ყოფილა მარცხისთვის.
წყარო: “კვირის პალიტრა”
