აღმოსავლეთ საქართველოში არამდგრადი ამინდი ფიქსირდება. ბოლო რამდენიმე დღეა, რაც დედაქალაქში დღისით ცხელა, დღის მეორე ნახევარში კი ხანმოკლე ძლიერი წვიმა ელჭექით ფიქსირდება.
რა განაპირობებს ასე ცვალებად ამინდს და როგორია უახლოესი დღეების ამინდის პროგნოზი – ამის შესახებ “გურია ნიუსი” გარემოს ეროვნული სააგენტოს მოკლევადიანი ამინდის პროგნოზის ბიურის ხელმძღვანელს, დოდო გვაზავას ესაუბრა.
გვაზავამ აღნიშნა, რომ აღნიშნულ ამინდს განაპირობებდა ამიერკავკასიის ჩრდილოდასავლეთიდან მოქმედი ცივი ჰაერის მასების ურთიერთქმედება სამხრეთიდან გავრცელებულ ცხელ ჰაერის მასებთან.
“გასული დღეების ამინდს განაპირობებდა ამიერკავკასიის ჩრდილოდასავლეთიდან მოქმედი შედარებით ცივი ჰაერის მასების შემოსვლა, რომელიც დღის მეორე ნახევარში სამხრეთიდან გავრცელებულ ცხელ ჰაერის მასებთან, რაც აუცილებლად იწვევს ხანმოკლე ხასიათის წვიმებს. გუშინ მაგალითად, ამას ემატებოდა კახეთის რეგიონიდან გრილი ჰაერის შემოსვლა, რამაც განაპირობა ძლიერი წვიმა კახეთში, ასევე დედაქალაქში. ხანმოკლე იყო, მაგრამ ძლიერი და დიდი ალბათობა იყო სეტყვისაც.
დიდი განსხვავება არც დღეს არის მოსალოდნელი. ბოლნისის ტერიტორიაზე, მთაგორიან ადგილებში უკვე ფორმირდება ძლიერი წვიმა ელჭექით.
ხვალ, დღისითაც აქტიურდება ეს ცივი ჰაერის მასების მოქმედება დასავლეთიდან, ამიტომ ხვალ, დღის მეორე ნახევრიდანაც არის მოსალოდნელი ხანმოკლე წვიმა ელჭექით, შესაძლებელია ქარის გაძლიერება და აღმოსავლეთ საქართველოშიც ისევეა მაღალი სეტყვის ალბათობა, როგორც დღეს.
რაც შეეხება შემდეგ დღეებსაც, დასავლეთ საქართველოში 8-9 ივნისს, შედარებით გამოიდარებს. ჰაერის ტემპერატურა კვლავ მოიმატებს +33, +35 გრადუსამდე. ქარი გაძლიერდება აღმოსავლეთის მიმართულების. მანამდე კი დროგამოშვებით ხანმოკლე წვიმა ელჭექებით არის მოსალოდნელი. ჰაერის მაქსიმალური ტემპერატურა დაიკლებს +26, +27 გრადუსამდე. 5-6 ივნისის ღამის საათებში იწვიმებს ინტენსიურად. ეს ცივი ჰაერის მასები იმოქმედებს აღმოსავლეთ საქართველოზეც. ჰაერის ტემპერატურა 6-7 ივნისს დაიკლებს დედაქალაქშიც 1 ან 2 გრადუსით”,_ ამბობს გვაზავა და აღნიშნავს, რომ აღმოსავლეთ საქართველოში მსგავსი არამდგრადი ამინდი ჯერ კიდევ შენარჩუნდება.
