ოზურგეთში, “სავალუტო ბირჟად” ცნობილ მოედანზე, რომელიც სახელდებით ჭანტურიას ქუჩაა, ყოფილი “მუსიკალური შადრევნების” სივრცე, დღესდღეობით (და უამრავი წელია, ასეა), ტუალეტად არის ქცეული.
იყო დრო, მუსიკალური შადრევნის სივრცე ულამაზეს სანახაობად იყო მიჩნეული. აქ იმართებოდა ღონისძიებები, ისვენებდნენ ადამიანები და როგორც ოზურგეთელები ამბობენ, თვალსა და გულს უხაროდა ამ სივრცის დანახვა და აქ დასვენება.
რა ხდება დღეს?
ქვედა მხრიდან, გურიის ქუჩიდან იოანე პეტრიწის ქუჩაზე გადასვლა და პირიქით, ზემოდან ქვემოთ ჩასვლა, აქ შესაძლებელია კაფე “იზაბელას” გვერდით მდებარე კიბეებით. ეს არის სივრცე, რომელიც მუნიციპალური საკუთრებაა და ჩვენ მიერ მოპოვებული ინფორმაციით, შენობის მეპატრონეს არ ეკუთვნის. სამაგიეროდ, მთლიანად ტუალეტად არის ქცეული. ეს ხდება წლების განმავლობაში, რაზეც “გურია ნიუსი” არაერთხელ წერდა.
_ მოვკვდით ხალხი, აქ განლაგებულ ობიექტებზე ვინც ვმუშაობთ. ასევე, ქუჩაში და მოედანზე მოსიარულე ადამიანებსაც, ვინც ქალაქში გადაადგილდება, შარდის სუნი ცხვირ-პირს და თვალებს წვავს. სირცხვილი არაა, კაცო, ეს ამბავი?! აქ ცენტრალური ადგილია, ხალხო, ეს რა უბედურება გვჭირს, ამდენი წელია, ასე ამტანები როგორ გავხდით? 30 წელია, აქ, კედლებზე მიფ..მა ვერ მოაშლევინეს ხალხს, _ ამბობენ რიგითი ოზურგეთელები, რომლებიც აქ საოჯახო საამქროებში, სხვადასხვა სახელოსნოებსა და საბითუმო მაღაზიებში მუშაობენ..
_ მიკვირს, უბრალოდ, სხვა რა ვთქვა? რაც კომუნისტური წყობა დაინგრა, აქ ასეთი ამბავია. ამას რომ იტყვი, ა, რუსეთუმეა ან კომუნისტები მოწონსო, იტყვიან დაკვეთით საუბრის მოყვარულები. ყარს ყველაფერი! ან სათქმელი არის რაიმე? _ გვეუბნება ოზურგეთელი ნუნუ დარჩია.
_ რატომ ვერა და ვერ ხერხდება ამ სივრცის მოწესრიგება, ძალიან გასაკვირია. იმ რესტორან “იზაბელას” გვერდით მდებარე კიბე ხომ საერთო ტუალეტია ქალაქის ცენტრში. ან დაკეტონ, ან რაღაც მოიმოქმედონ. რაც თავი მახსოვს, არაერთი პატრონი გამოიცვალა მაგ რესტორანმა. ისიც მახსოვს, ქალი მუშაობდა მანდ, ყოველდღე რეცხავდა კიბეებს. ახლა ისეთი ამბავია, რაიმე დაავადება არ გაჩნდეს, საშიშია, _ გვეუბნება ოზურგეთელი ხათუნა ბარამიძე, რომელიც იქვე, სავაჭრო ცენტრ “იმედში” მუშაობს.
_ აქოთებულია და ყარს ყველაფერი. მიხედოს ქალაქის მერიამ. ჩვენ რა ვქნათ? ტუალეტი ფასიანია ყველგან. იქაც არ შედიან, თუმცა, ღამით რომ ხალხი მოძრაობს, ისინი აქ ისაქმებენ. წყალიც არაა ქალაქში, რომ დალიო… მოვიდეს ბიძინა და გააკეთოს, რას შვება? სადაა? _ ამბობს ოზურგეთელი ბადრი ბარნოვი.
ბარნოვის რეპლიკამ ჯონი უჯმაჯურიძე გააბრაზა და რამდენიმე წამში , გურულებისთვის დამახასიათებელი პოლემიკა გაიმართა ე.წ. “ვალუტჩიკების მოედანზე”:
_ ბიძინა რას შვება თუ შენ რას შვები? რა გინდა ბიძინასთან, წყალი მოგიტანოს და დაგალევინოს, არა?
_ გააკეთოს, ხო… მე რას ვშვები და ვშრომობ, _ არ შეეპუა ბარნოვი.
_ შენი პირიზა შრომობ, ბიძია და გააჩუმე მაი ენა. 30 წელიწადია, წყალი არ გქონია აქ და მოთხოვე ახლა ბიძინას…ა, ამფერი ჭკვიანები რომ არის აქ ყველა, იმიტომ არის მაქ ის ტუალეტი, _ არ ცხრებოდა თავის მხრივ ბატონი ჯონი.
აქ გამვლელები, ნონა დარჩია, თაკო ლომჯარია, ვანო ქავთარაძე და სხვები “გურია ნიუსთან” ამბობენ, რომ ქალაქში ტუალეტი არ არსებობს და ეს ყველაფერი ამის ბრალიცაა.
_ ბაზარში ტუალეტი ფასიანია. აქ, სავაჭრო ცენტრშიც არის ტუალეტი. სადაა დღეს უფასო ტუალეტი? არის სადმე? 20 თეთრის გადახდა ეზარებათ და აქ ამოდიან. მიაფ…მენ და წავლენ. ყარს აქაურობა, _ ამბობენ ისინი. მათ ეთანხმებიან მოშორებით, სხვადასხვა ბოსტნეულით მოვაჭრეები, რომლებიც იოანე პეტრიწის ქუჩის ერთ-ერთ კუთხეში დგანან.
ისინი, ასევე, ამბობენ, რომ ტაქსის მძღოლებსაც აქვთ ეს ადგილები ტუალეტად ქცეული, რადგან, აქვეა “სტაიანკა” და მთელი ღამე რომ დგანან, ტუალეტი სჭირდებათ…
როგორც ვთქვით, “გურია ნიუსი” გასულ წლებში არაერთხელ წერდა ამ მარად მოუგვარებელ პრობლემაზე.
ამჯერად ჩვენ ოზურგეთის მუნიციპალური ინსპექციის ხელმძღვანელს, გენო კიშინსკის ვთხოვეთ კომენტარი:
_ მე რა გითხრათ? იქ არის კერძო საკუთრება. სასადილო “იზაბელას” მეპატრონეს ეკუთვნის ის ასასვლელი კიბეც, სადაც ეს მდგომარეობაა. კერძო საკუთრებაა და შეუძლიათ დაკეტონ, ასე ვთქვათ, გადაკედლონ ის კიბეები, _ გვითხრა კიშინსკიმ.
თუმცა, ტუალეტად აქ უფრო დიდი სივრცეებია ქცეული. თან კერძო საკუთრებაში არსებული ობიექტების მეპატრონეები პირიქით ამბობენ: _ “როცა კონკრეტული კიბის გადაკეტვა გადავწყვიტეთ, გვისაყვედურეს, რომ ეს მუნიციპალური სივრცეაო”.
“გურია ნიუსი” რესტორან “იზაბელას” მფლობელს, მამია კალანდარიშვილს ესაუბრა.
_ მე გეტყვით, რომ ჯერ კიდევ კოტე შარაშენიძის მერობის დროს ვიყავი მისული მერიაში. დავსვი ეს საკითხი. მუდამ ასეთი საშინელი მდგომარეობა იყო. ვითხოვე, მომეცით უფლება, რომ დავკეტო ეს კიბეები და აქაურობა მოვაწესრიგო-მეთქი. თუმცა, უარი მითხრეს. ეს კიბე საერთო სარგებლობის ფუნქციას ასრულებსო. მას შემდეგაც გაგრძელდა ასეთი მდგომარეობა. განა არ ვუვლიდით? არაერთხელ ჩავარეცხინე, დავასუფთავეთ, მაგრამ რას გახდები ასე? მე თუ უფლებას მომცემენ, მივხედავ…
_ ბატონო მამია, ჩვენ ვნახეთ მუნიციპალური ინსპექციის უფროსი, გენო კიშინსკი და მან გვითხრა, რომ თქვენ შეგიძლიათ, ჩაკეტოთ ეს კიბეები…
_ რა? სწორედ მაგან მითხრა მაშინ უარი. ეს იყო რიგითი თანამშრომელი მაგ ზედამხედველობის სამსახურის.
_ კიდევ ერთხელ რომ დასვათ ეს საკითხი მერიაში?
_ კი, ბატონო, აუცილებლად მივალ და მივმართავ განცხადებით. მე თუ დამეთანხმებიან, ერთ კვირაში მოვაწესრიგებ იქაურობას, _ გვითხრა ბატონმა მამიამ.
ამ მარად მოუგვარებელი პრობლემის თაობაზე, როცა ქალაქის ცენტრალურ ადგილი ტუალეტად არის ქცეული და ყველას გასაკვირად, მოგვარება არ ხერხდება, როგორც ვთქვით, მართლაც ყველა წუხს. ჩვენ თვალს მივადევნებთ, რა მოხდება უახლოეს მომავალში და გავაცნობთ ბევრ ოზურგეთელს, ვინც გულწრფელად არის დაინტერესებული ამ პრობლემის მოგვარებით.
