„კარი ერთ-ერთმა მსჯავრდებულმა გააღო, თუმცა ამ შემთხვევაში, სამივე მსჯავრდებულის ქმედება იდენტურია, ისინი დაკავების ადგილიდან გაიქცნენ და აქედან გამომდინარე არსებითი მნიშვნელობა, შესაძლოა, სამართლებრივად არც ჰქონდეს. სამივე მსჯავრდებულს წარედგინა ბრალდება საქართველოს სისხლის სამართლის კოდექსის 379-ე მუხლის მესამე ნაწილის ა – ქვეპუნქტით გათვალისწინებული დანაშაულის შესაძლო ჩადენისათვის, რაც გულისხმობს გადაყვანის ადგილიდან მსჯავრდებულთა გაქცევას ჯგუფურად. საქმეზე გამოძიება მიმდინარეობს ამ კუთხით დეტალურად და სხვა დეტალები და ფაქტობრივი გარემოებები შემდგომში გახდება ცნობილი, _ ამის შესახებ საქმის პროკურორმა ლაშა ამირანაშვილმა განაცხადა.
პროკურორის თქმით, მსჯავრდებულთა გადაყვანისთვის განკუთვნილ სპეციალურ ტრანსპორტში, კიდევ ერთი, მეოთხე მსჯავრდებული იმყოფებოდა, რომელსაც გაქცევა არ უცდია..
“აქვე აღვნიშნავ, რომ სპეციალურ ავტომანქანაში არის პატიმრების მოთავსების ორი საკანი, მოცემულ შემთხვევაში ორივე საკნის წინ არის ადგილი, სადაც უნდა განთავსდნენ ბადრაგის თანამშრომლები და ორივე საკანი იკეტება ცალ-ცალკე. ეს გაქცეული მსჯავრდებულები იყვნენ ერთ-ერთ საკანში, ამ სივრცეში ასევე იყო მეორე საკანი, სადაც დარჩა ერთი მსჯავრდებული, რომელიც არ და ვერ გაიქცა. მისი კარის ურდული გადაკეტილი იყო და მას არც უცდია გაქცევა“, – განაცხადა პროკურორმა.
