“მაშინ, როცა ეკონომიკაზე ვსაუბრობთ, ციფრების ანალიზის უნარი მეტად მნიშვნელოვანია”

“საქსტატის  ახალი მონაცემი ცხადყოფს, რომ  მაღალი ეკონომიკური აქტივობის პარალელურად, პოზიტიური ტენდენციები ფიქსირდება შრომის ბაზრის მიმართულებით, კერძოდ:

• 2023 წლის IV კვარტლის მიხედვით, საშუალო ხელფასმა 2044 ლარი, ხოლო 2023 წლის (სრული წლის) საშუალო ხელფასმა 1858 ლარი შეადგინა. აღსანიშნავია, რომ პირველად გადავცდით 2000-ლარიან ნიშნულს.
• უმუშევრობის დონე რეკორდულად შემცირდა, 16.4%-ი შეადგინა.
• 2023 წლის IV კვარტალში ბიზნეს სექტორში დასაქმებულთა საშუალო რაოდენობა 782.3 ათასია, რაც გასული წლის შესაბამისი პერიოდის მაჩვენებელზე 5.6 %-ით მეტია.

ეს მონაცემები ადასტურებს, რომ ჩვენი ეკონომიკური პოლიტიკა სწორი მიმართულებით იგეგმება”, _ საქართველოს პარლამენტის ვიცე-სპიკერი  ნინო წილოსანი სოციალურ ქსელში ამ პოსტით  გამოეხმაურა საქართველოს სტატისტიკის ეროვნული სამსახურის მიერ გამოქვეყნებულ ინფორმაციას,  რომ ქვეყანაში საშუალო თვიური ანაზღაურება 2044 ლარს შეადგენს.

კერძოდ,  საქართველოს სტატისტიკის ეროვნული სამსახურის მონაცემებით, 2023 წლის IV კვარტალში საქართველოში საშუალო თვიური ნომინალური ხელფასი გასული წლის შესაბამის პერიოდთან შედარებით 15.3 პროცენტით (270.9 ლარით) გაიზარდა და 2 044.5 ლარი შეადგინა.

პარლამენტის ვიცე-სპიკერის ფეისბუქანალიზს არა ერთი გამოხმაურება მოჰყვა.

“საიდან იღებენ ამ სტატისტიკას საინტერესოა, ამხელა ხელფასები გვაქვს და ჩვენ არ ვიცით ?!” _ პარლამენტის ვიცე-სპიკერის ფეისბუქანალიზი ბევრისთვის  გაუგებარი აღმოჩნდა, მათ შორის საჯარო სამსახურებში დასაქმებულთათვისაც.

“სწორედ სამსახურის გამო ჩამოვედი ოზურგეთიდან ლანჩხუთში, 30 წლის წინ, რადგან ანასეულის სუბტროპიკულ კულტურათა კვლევითი ინსტიტუტი გაუქმდა, სადაც ბიოქიმიის განყოფილებაში ვმუშაობდი. ლანჩხუთში ჩემი სპეციალობით, რომელიც რაიონს ყოველთვის სჭირდება, დავიწყე მუშაობა, წყალმომარაგების ქიმიკოსად (ჯერ პენსიონერი არ ვარ). მაშინ არავის უკითხავს პროტეჟე ვინ გყავსო, მკითხეს დიპლომი თუ მქონდა, ასევე ასპირანტურაც ამ დარგში.

ვერ წავედი უცხოეთში სამუშაოდ, ოჯახი და შვილები ვერ დავტოვე. ჩავაბარე გამოცდა საჯარო სამსახურშიც. სამწუხაროდ, ყოფილ მეცნიერ-თანამშრომელს უარი მითხრეს. “ქართული ოცნება” მეგონა,  რაღაცას სწორედ ეკონომიკაში შეცვლიდა.  მეგონა, ადგილობრივ ნედლეულზე დამყარებული გადამამუშავებელი წარმოება ამოქმედდებოდა. საქსტატის ეს მონაცემები საიდან დაიდო, სამუშაო ადგილები რამ გააჩინა, ან მე ან ჩემი სანაცნობო რატომ ვერ ხედავს? ვისაც სპეციალობა აქვს, რატომ ჩაირეცხა? რა ვქნათ, ამ ციფრებს ვენდოთ თუ დავიხოცოთ? ეს ჩვენი ქვეყნის მონაცემებია? ეს ციფრები მოსახლეობას რომ წაუკითხოთ, ვინ დაიჯერებს?! ჩვენ ამ ქვეყნის მოქალაქეები არ ვართ? ჩვენ ვიყავით ის, ვინც “ქართულ ოცნებას” მწვანე შუქი ავუნთეთ, ახლა ამ ციფრებს რომ ვკითხულობ, მგონია, მათემატიკაც დამავიწყდა. დაგეთანხმოთ, რომ რეალობასთან რამე საერთო აქვს? გასაგებია, სტატისტიკა როგორ დგება, მაგრამ შეუძლებელია, მსგავსი სტატისტიკა საქართველოში არსებობდეს”, _ მიიჩნევს მაია კუკულაძე.

“დუღს,  დუღს ეკონომიკა” _ ზოგი ირონიას არ იშურებს ხელისუფლების მისამართით და იქვე წილოსანს რჩევასაც აძლევენ: “სულ გაჩუმდეთ, ჯობია, თორემ ამდენი ქება-დიდებით ლოყები აგიწითლდებათ. სასაცილოა ეს ყველაფერი, სატირალი რომ არ იყოს.”

კახა ზედგენიძე: “საიდან მოგაქვთ ეს ხელფასები, რას ბჟუტურობთ? ადექით, ხალხში გაიარეთ და ჰკითხეთ, რამდენს იღებენ სინამდვილეში, თუ ასეთი ეკონომიკური ზრდა გაქვთ, ხალხი რატომ გარბის ამ ჯოჯოხეთური ქვეყნიდან, გეკითხებით, თუ  ეკონომიკური ზრდა  გაქვთ. ნაცებისკენ ხელს იშვერთ და თქვენ მათზე უარესები დარჩით ყველა პარამეტრით. 2 000 ლარი ხელფასი  რომ მქონდეს, წავალ ქვეყნიდან?”

ნინო წილოსანის პოსტს ლანჩხუთის მხარეთმცოდნეობის მუზეუმის ხელმძღვანელი ნონა იმნაძე გამოეხმაურა:

“45 წელი შემისრულდა წელს, რაც მხარეთმცოდნეობის მუზეუმის მენეჯერი ვარ. იმ მუზეუმის, რომელშიც დაარსების დღიდან ვმუშაობ და 10000 უნიკალური ექსპონატი ჩემს თანამშრომლებთან ერთად მაქვს მოძიებული და მიტანილი მუზეუმში. სხვა საქმიანობაზე საუბრით აქ არ შეგაწყენთ თავს. ჩემმა ხელფასმა, ყველანაირი მატების შემდეგ, ძლივს მიაღწია 600 ლარს. ჩემს თანამშრომლებზე აღარაფერს ვამბობ. თუ საშუალო ხელფასი 2000 ლარზე მეტია, ჩვენ რა კატეგორიას მივეკუთვნებით? დიდი ბოდიში შეწუხებისთვის!”

ეკა ბერელაშვილი: “ეროვნული მუზეუმის თანამშრომლებს 300-700 ლარი აქვთ ხელფასი, ქალბატონო ნინო. იქნებ, არც ვითვლებით ადამიანებში? მერე რა, რომ საგანძურს ვიცავთ და ვუვლით?! კულტურით ხომ გიყვართ ტრიპაჩობა, როცა გჭირდებათ.”

რომან ლაშქარაშვილი: “ეს მონაცემები საშუალო ხელფასის შესახებ, მეტყველებს იმაზე თუ რამხელა უთანასწორობა არის ქვეყანაში, იმიტომ, რომ უზარმაზარი ემიგრაციის ფონზე, ქვეყანაში დარჩენილი მოსახლეობის აბსოლუტურ უმრავლესობას 1000 ლარიც კი არ აქვს ხელფასი. ჰოდა,  საშუალო ხელფასი თუ 2000 ლარია, ესე იგი, ვიღაც, რამდენიმე ადამიანს აქვს უზარმაზარი ხელფასი”.

“ცხოვრებაში 700 ლარზე მეტი ხელფასი არ მქონია. ვიღაცას თუ მილიონი აქვს ხელფასი და მე 700 ლარი, საშუალოდ, ორივეს ნახევარი მილიონი გამოგვდის ხელფასი. ესაა სტატისტიკა.

მაგარი ხელფასები გქონიათ ქოცებს, ხალხის 300-ლარიანი ხელფასები ასე თუ გაასაშუალოეთ.

უნდა გკითხოთ, საბავშვო ბაღის აღმზრდელი პედაგოგების და დანარჩენი პერსონალის ხელფასების რაოდენობა თუა ცნობილი თქვენთვის?

წარმოიდგინეთ, რამდენი ხალხია დასაქმებული საჯარო სამსახურში, რომ საშუალო ხელფასი 2000 ლარს გადაცდა საქართველოში.

ქვეყანა კი არა, “ცისფერი მთებია”, _ მიიჩნევს საქართველოს მოსახლეობა.