| ახალგაზრდა პედაგოგთა კავშირის და ორგანიზაცია “CENN” ორგანიზებით, მევენახეობა-მეღვინეობის მხარდაჭერის მიზნით, გურიას ესტუმრა მოწვეული ექსპერტი გერმანიიდან ჰელმუტ კასპარი.
სენიორ ექსპერტთა სერვისის პროგრამისა (SES) და პროექტ “მწვანე გურიის” თანამშრომლობის ფარგლებში, ორი კვირის განმავლობაში, დაგეგმავს და უხელმძღვანელებს მევენახე-მეღვინეების სასწავლო და პრაქტიკულ პროცესს. დააკვირდება მათ საველე სამუშაოებს, შეიმუშავებს რეკომენდაციებს და გურულ მეღვინეებს გადასცემს შესაბამის ცოდნას და გამოცდილებას. ჩვენ ვესაუბრეთ ბატონ ექსპერტს, ჰელმუტ კასპარის (Helmut Caspary) გურიაში მეღვინეობისა და მევენახეობის განვითარების მისეულ კონცეფციაზე, არსებულ გამოწვევებზე, გურული ღვინის პოტენციალსა და პოპულარიზაციაზე…
_ ბატონო ჰელმუტ, როგორ შეაფასებთ თქვენს სამუშაო გამოცდილებას გურიის რეგიონში, სადაც ახლა მოწვეულ ექსპერტად იმყოფებით? _ პირველი, ყველაზე მნიშვნელოვანი რაც იყო და რამაც გავლენა მოახდინა , ეს არის ხალხი – ძალზე მეგობრული და პატიოსანი. მეორე – ესაა “პედაგოგთა კავშირი”, ორგანიზაცია, რომელიც ეფექტურად, მაღალხარისხიანად მუშაობს თავის სამიზნე აუდიტორიასთან და პირველივე დღიდან მასთან ძალიან კარგი კომუნიკაცია დამყარდა. მას აქვს მუშაობის კარგი სტრუქტურა, მრავალფეროვანი მიმართულებები _ ახალგაზრდებთან, ხანდაზმულებთან და საქმეს ეკიდებიან ფრთხილად და პასუხისმგებლობით. ჩვენ როდესაც ვემზადებოდით წამოსასვლელად, დავიწყეთ ინფორმაციის მოძიება, თუმცა ძალიან ცოტა ვიპოვეთ. მერე კი, რომ ჩამოვედით, ვნახეთ უმშვენიერესი გურია, რომელიც ძალიან ჰგავს ტოსკანას… აქ მრავალი საგანძურია, რომელსაც სჭირდება აღმოჩენა. არ არის ცნობილი და როცა ჩამოდიხარ, მაშინ აღმოაჩენ ამ მშვენიერ მხარეს! _ რა გამოწვევებს ხედავთ მეღვინეობისა და მევენახეობის განვითარების მიმართულებით გურიაში? _ ჩვენ, ახალგაზრდა პედაგოგთა კავშირთან ერთად, გავაკეთეთ გურიის სვოტ-ანალიზი მევენახეობა-მეღვინეობის მიმართულებით. ძლიერი მხარეები, რაც გამოიკვეთა, არის ის, რომ გაქვთ მრავალი ჯიშის ვაზი, 65-მდე. ძლიერი მხარეა ტრადიციული მეღვინეობა და ღვინის დაყენება, რასაც ათასწლეულების ისტორია აქვს. გაქვთ ის, როგორც ბიოპროდუქტი, პესტიციდების გარეშე და მხოლოდ იმდენს იყენებენ, რაც დასაშვებია ბიოპროდუქციის წარმოებისთვის. ჩვენ, აქ ყოფნის დროს, გვქონდა შეხვედრა მეღვინეებთან. ერთმა ქალბატონმა შეხვედრისას გვითხრა, სამი შვილი მყავს და მეოთხე არის ვენახიო. აი, როგორ უყვართ! ეს განასხვავებს თქვენს ღვინოს ინდუსტრიულისგან. თუმცა ძლიერ მხარესთან ერთად, აქვს სუსტი მხარეები. მსურს გითხრათ გამოწვვებზე _ პირველ რიგში, ეს არის სოკოვანი დაავადებები, რაც კლიმატთან კავშირშია. ჩვენ ამ კონკრეტულ პრობლემაზე ვიყავით კონცენტრირებული და ვეცადეთ, გვეპოვა გამოსავალი, შეგვეთავაზებინა მევენახეებისთვის ჩვენი გამოცდილება. მეორე მნიშვნელოვანი პრობლემა, რაც აღმოვაჩინეთ, არის ის, რომ ნაკლებად იყენებენ ტექნიკას. ამიტომ უწევთ დიდი შრომის გაწევა. ასევე ამ პრობლემას ექვემდებარება მცირემიწიანობაც. ეს საბოლოოდ ღვინის მაღალ ფასს განაპირობებს. ბევრი შრომა იდება საქმეში, არაა ტექნიკა და ეს საბოლოოდ პროდუქციას აძვირებს. ტექნიკის უქონლობის გამო, ასევე უჭირთ დაავადებებთან გამკლავება.
_ რა არის გურული ღვინოების მთავარი მახასიათებელი და ძლიერი მხარე, რაც ხელს შეუწყობს პოპულარიზაციას, როგორც ადგილობრივ, ისე ევროპულ ბაზარზე? _ ჩვენ ღვინის გაყიდვას და პოპულარიზაციას ვხედავთ აგროტურიზმის განვითარებაში! ტურიზმი არის ერთ-ერთი მნიშვნელოვანი წინაპირობა, რომ ღვინო ადგილობრივ ბაზარზე გაიყიდოს! თუმცა, ჯერ ტურიზმის განვითარებაა საჭირო! ამ კუთხით თქვენ დიდი გზის გავლა მოგიწევთ, რომ გურიაში ტურიზმი განვითარდეს და გახდეს ეს რეგიონი ცნობილი. მწირია ინფორმაცია ინტერნეტსივრცეში. სააგენტოებს ნაკლებად ჰყავთ გურია გათვალისწინებული. ვიკიპედიაშიც კი არ არის საკმაო ინფორმაცია, რომლითაც ტურისტულ ლოკაციებს იპოვი. მათთვისაც, ვინც ჩამოდის, რთულია მიგნება, სად და როგორ აღმოაჩინონ ტურისტული ლოკაციები. ნაკლებია შესაძლებლობა, როგორ აღმოაჩინონ ესა თუ ის მარანი, ფოლკლორული, კულტურული ღონისძიებების ჩატარების სივრცეები. მოკლედ, გაციფრულებული ინფორმაცია გურიის შესახებ მცირეა. რომ ჩამოვედით, ბევრი უცნობი ზღაპრული ადგილი ვნახეთ. თუმცა ამაში დაგვეხმარა ორგანიზაცია. ტურისტებად რომ ჩამოვსულიყავით, ვერ მივაგნებდით. ტრანსპორტიც არ არის მორგებული _ წარწერებს ვგულისხმობ. _ რას ფიქრობთ გურული ღვინის პოტენციალზე, ღვინის ტურიზმისა და ზოგადად ტურიზმის განვითარებაზე? _ ტურიზმის განვითარებისთვის მნიშვნელოვანია, რომ ეს პროდუქტები (ღვინო, ჩაი.. ) და შესაძლებლობები, რაც აქვს რეგიონს _ გარემო, მთისა და ზღვის ჰარმონიული ლანდშაფტი, უნდა აქციოთ ტურისტულ პროდუქტად და ხელმისაწვდომი იყოს ტურისტისთვის. ქართული ღვინის წარმოება, ტრადიციული მეთოდის დაცვით ძალზე საინტერესოა. ტრადიციული ღვინო კი ძალიან აინტერესებთ ევროპაში. ეს ბევრს, ანუ მასას არ აინტერესებს, მაგრამ არიან მაღალი ხარისხის სწორად შემფასებლები. ხოლო ხარისხი ვინც იცის, ისინი გადაიხდიან მაღალ თანხას. სწორედ ამიტომ არის მნიშვნელოვანი თქვენი ღვინისთვის, რომ სწორ მისამართზე გახვიდეთ ინტერნეტსივრცეში. ეს არ გულისხმობს სუპერმარკეტებს, არამედ გულისხმობს ისეთ რესტორნებს ,ადგილებს, სადაც თქვენს ღვინოს შეიძენენ მაღალი ხარისხის გამო. გურულ მეღვინეებს სჭირდებათ სწორი სტრატეგია, რომ თავიანთი მომხმარებლები იპოვონ. “ღვინოები გურიიდან” სწორად უნდა იყოს გაციფრულებული, როგორც გურული ბრენდი! მეღვინეებმა ერთმანეთთან მჭიდროდ უნდა ითანამშრომლონ, ერთად იმუშაონ და მეღვინეობა ტურისტულად საინტერესო მიმართულებად აქციონ! _ დიდი მადლობა! |
