“არა ჰესს ბახმაროს სარეკრეაციო ტერიტორიაზე!!! დავიცვათ ბახმარო!!!“ _ ასეთი სახელწოდებით არასამთავრობო ორგანიზაცია “ეკომ“ პეტიცია შექმნა.
პეტიციიდან ვიგებთ, რომ “ეკოს“ სამი მოთხოვნა აქვს:
1. შეწყდეს მდინარე ბახვისწყალზე დაგეგმილი „ბახვი 1“ ჰიდროელექტროსადგურის მშენებლობის განხილვა;
2. გარემოსდაცვითი შეფასების კოდექსის მე-14 მუხლის შესაბამისად მიიღოთ „ბახვი 1“ ჰესის მშენებლობის განხორციელებაზე უარის თქმის გადაწყვეტილება;
3. დაუყოვნებლივ შეიქმნას გურიის დაცული ტერიტორია გურიის რეგიონის მთიან ზოლში, სადაც აკრძალული იქნება ჰიდროელექტროსადგურების მშენებლობა.
გთავაზობთ პეტიციის სრულ შინაარსს.
ადრესატი: საქართველოს მთავრობა,
საქართველოს გარემოს დაცვისა და სოფლის მეურნეობის სამინისტრო,
საქართველოს პრემიერ-მინისტრი,
საქართველოს მდგრადი განვითარებისა და ეკონომიკის სამინისტრო გურიაში
კურორტ ბახმაროს ტერიტორიაზე, მდინარეებზე ბახვისწყალსა და მის შენაკად ბაისურაზე დაგეგმილია ჰიდროელექტროსადგურეს მშენებლობა.
სამშენებლო ტერიტორია მთლიანად მოქცეულია უნიკალური ბიომრავალფეროვნების მქონე ბახმაროს სარეკრეაციო ტერიტორიის საზღვრებში.
ჰესის მშენებლობა კურორტის ტერიტორიაზე საფრთხეს უქმნის არა მხოლოდ მდინარის ხეობას, არამედ კურორტ ბახმაროსა და რეგიონის მდგრად განვითარებას.
პროცესი მიმდინარეობს მოსახლეობის და საზოგადოების სათანადო ინფორმირების ჩართულობის და მონაწილეობის გარეშე, რაც მოქმედი კანონმდებლობის დარღვევაა _ სკოპინგის ანგარიშის საჯარო განხილვა არ შემდგარა ფართო საზოგადოებრივი ჩართულობით.
საკითხი არის ძალიან სენსიტიური და მნიშვნელოვანი ადგილობრივი მოსახლეობისთვის, ხოლო ონლაინ განხილვა ვერ ქმნის სათანადო პირობებს საზოგადოების მაქსიმალური ჩართულობისთვის.
მოქალაქეების დიდი ნაწილი არ იყო ინფორმირებული განხილვის შესახებ. ინფორმირებისთვის გამოყენებული მეთოდი, როგორიცაა საკრებულოს შენობაში საინფორმაციო ფურცლის განთავსება, ვერ ჩაითვლება საკმარის ზომებად, მით უმეტეს კი პანდემიის პირობებში, როდესაც მოქალაქეთა მობილობა და გადაადგილება შეზღუდულია და აღნიშნულ ლოკაციებზე ადამიანების მინიმალური რაოდენობა მოძრაობს.
პროექტის სკოპინგის ანგარიში არის ზედაპირული. არ არის საფუძვლიანად შეფასებული ის რისკები და გავლენა ბუნებაზე, რაც მოჰყვება ჰესის მშენებლობას.
2020 წლის 29 იანვარს საქართველოს გარემოს დაცვისა და სოფლის მეურნეობის სამინისტრომ ონლაინ ფორმატში გამართა სკოპინგის ანგარიშის განხილვა, სადაც პროექტის ავტორებმა და მშენებელი კომპანიის წარმომადგენლებმა მოსახლეობის ვერც ერთ მტკივნეულ შეკითხვას ვერ უპასუხეს.
პროექტის ეკონომიკური საჭიროება დაუსაბუთებელია: არ არის წარმოდგენილი პროექტის ეკონომიკური და ენერგეტიკული სარგებლიანობის საკითხი. არ არის გაკეთებული დანახარჯისა და სარგებლის ანალიზი (Cost-Benefit Analysis) ეკონომიურ ჭრილში, რაც საქართველოს კანონმდებლობის თანახმად, გარემოზე ზემოქმედების შეფასების ნაწილი უნდა იყოს.
კომპანიის წარმომადგენელი არ ასახელებს ტარიფს, რომლითაც მოხდება გამომუშავებული ელექტროენერგიის შესყიდვა სახელმწიფოს მიერ _ აღნიშნული ჰესის აშენებით გურიის რეგიონს არც ელექტროენერგიის ტარიფი შეუმცირდება, არც ელექტროენერგიის მიწოდება გაუუმჯობესდება, ხოლო ჰესის მშენებლობა და ექსპლუატაცია მნიშვნელოვან ზიანს შეუქმნის კურორტ ბახმაროში ტურიზმის განვითარებას.
სკოპინგის ანგარიშის მიხედვით, ჰესი ითვალისწინებს მდინარეებზე _ ბახვისწყალსა და ბაისურაზე ორი შეგუბების მოწყობას, რამდენადაც ამ მდინარეებს არ აქვთ ჰესის მთელი წლის განმავლობაში ექსპლუატაციისთვის საკმარისი წყალი.
შეგუბებების მოწყობა წყლის ზედაპირის სარკე გაზრდის ტენიანობას ბახმაროში, შეცვლის მიკროკლიმატს, რაც უარყოფით ზეგავლენას მოახდენს ბახმაროს სამკურნალო ჰავასა და ზამთრის სამთო-სათხილამურო კურორტის პერსპექტივებზე, რისი პერსპექტივაც არა ერთი კვლევის მიხედვით ბახმაროს გააჩნია.
ბახვი1 ჰესის მშენებლობა შედის მხოლოდ კერძო ინვესტორთა ინტერესებში, რომელთათვისაც ჰესი წარმოადგენს გარანტირებული მოგების წყაროს საზოგადოებრივი ინტერესების ხარჯზე, ხოლო ბუნების, ადგილობრივი მოსახლეობისა და ეკონომიკის სხვა დარგებისთვის ამ ჰესის მშენებლობას მხოლოდ დამანგრეველი შედეგები აქვს.
ყოველივე ზემოთ თქმულიდან გამომდინარე, მოვითხოვთ:
1. შეწყდეს მდინარე ბახვისწყალზე დაგეგმილი ბახვი 1 ჰიდროელექტროსადგურის მშენებლობის განხილვა.
2. გარემოსდაცვითი შეფასების კოდექსის მე-14 მუხლის შესაბამისად მიიღოთ ბახვი1 ჰესის მშენებლობის განხორციელებაზე უარის თქმის გადაწყვეტილება
3. დაუყოვნებლივ შეიქმნას გურიის დაცული ტერიტორია გურიის რეგიონის მთიან ზოლში, სადაც აკრძალული იქნება ჰიდროელექტროსადგურების მშენებლობა.
მოვუწოდებთ სახელმწიფოს, ძალისხმევა მიმართულ იქნეს კურორტ ბახმაროსა და გურიის რეგიონის საჯარო ინფრასტრუქტურის, სოფლის მეურნეობისა და ტურისტული პოტენციალის განვითარებისთვის, რაც შეგვინარჩუნებს ბუნებრივ გარემოს და მოგვცემს შესაძლებლობას, შეწყდეს მიგრაცია რეგიონიდან, დასაქმდნენ ადამიანები და დაბრუნდნენ ისედაც ხალხისგან დაცლილ გურიის მთიან სოფლებში.
