რამდენიმე დღის წინ ნუგზარ ცინცაძის, იგივე “ცანცუას” სკანდალურად ჩავლილი პრესკონფერენციის შემდეგ, ლანჩხუთის მერმა ალექსანდრე სარიშვილმა ცინცაძის ქმედება აგონიაში მყოფი ადამიანის საქციელად შეაფასა და თქვა: “იგი 2015-2017 წლებში დირექტორის მოადგილე იყო ა(ა)იპ “ტექსერვისში”, სადაც ჩვენმა აუდიტის სამსახურმა სერიოზული ფინანსური დარღვევები აღმოაჩინა. შესაბამისად, აუდიტის დასკვნა პროკურატურას გადავეცი. თავიდან რომ აეცილებინა აუდიტის დასკვნაში გაჟღერებული ბრალდებები, ის ბინძური საქციელით ეცადა, რომ ყველაფერი ჩვენკენ გადმოემისამართებინა. ის ცდილობს, პოლიტიკური საფუძველი დაუდოს მიმდინარე პროცესებს. ველოდებით გამოძიებას, როგორც მსაჯის საქმესთან დაკავშირებით, ასევე, ზემოთ ნახსენებ ა(ა)იპ-ში გამოვლენილ დარღვევებზე, რომელიც ნათელს მოფენს ყველაფერს”.
მერმა აქვე ისიც დასძინა, რომ თუ ცინცაძე შემდგომში გააგრძელებდა იმავე საქმიანობას, რასაც ყოფილ ა(ა)იპ-ში ანუ “ტექსერვისში” აკეთებდა, მაშინ მისი სამსახურებრივი პასუხისმგებლობის საკითხიც დადგებოდა დღის წესრიგში.
მერის საუბრებმა საზოგადოებაში არაერთგვაროვანი რეაქცია გამოიწვია. ისმის კითხვა, თუ ნუგზარ ცინცაძის საქმიანობასთან დაკავშირებით გარკვეული ეჭვები არსებობს, მაშინ რატომ დანიშნა იგი თავად სარიშვილმა უკვე გამსხვილებული ა(ა)იპ-ის დირექტორის მოადგილედ. უფრო მეტიც, რას ნიშნავს _ “თუ ასე გააგრძელა”?! გამოდის, რომ ადრე აშავებდა და ახლა თუ ჭკვიანად იქნება, ყველაფერი შერჩება?!
მეორეს მხრივ, საკითხავია ისიც, რომ, როცა “ცანცუას” ბრალეულობა ჯერ ოფიციალურად არ დადგენილა და ხომ არ დაარღვია მერმა საჯაროდ გაკეთებული განცხადებით უდანაშაულობის პრეზუმპცია?
როგორც არ უნდა იყოს, პროცესები ვითარდება ისე, რომ პროკურატურა ლანჩხუთის მერიის შიდა აუდიტის დასკვნას სწავლობს და ჯერ არაფერია ცნობილი. “გურია ნიუსი” შეეცადა აღნიშნული აუდიტის დასკვნის გაცნობას და საჭირო დოკუმენტაციის გამოსათხოვად წერილობით მიმართა მერიას. იქედან კი პასუხად უარი მივიღეთ. მერია ინფორმაციის არგაცემის მიზეზად ასახელებს, რომ იგი პერსონალურ მონაცემებს შეიცავს. იქვე მითითებულია, რომ აღნიშნული დოკუმენტი შემდგომი რეაგირებისთვის ოზურგეთის რაიონულ პროკურატურაშია გადაგზავნილი.
აუდიტის აღნიშნული დასკვნა, რომელიც 2015 წლის პირველი იანვრიდან 2017 წლის პირველი ოქტომბრის ჩათვლით, “ტექსერვისის” საქმიანობას მოიცავს, “გურია ნიუსმა” მაინც მოიპოვა და შეეცადა, მკითხველისთვის ისე მიეწოდებინა, რომ მასში შეძლებისდაგვარად ნაკლებად ყოფილიყო პერსონალური მონაცემის შემცველი ინფორმაცია.
რაც შეეხება უშუალოდ დასკვნას, როგორც მასშია ნათქვამი, “ტექსერვისი”, რომელიც 2014 წლის ოქტომბრიდან ფუნქციონირებს, თავდაპირველად შვიდ-შვიდი საშტატო ერთეულისა და შტატგარეშე თანამშრომლით იყო დაკომპლექტებული, თუმცა, 2015 წლიდან საშტატო ერთეული _ სამით, ხოლო შტატგარეშე _ თვრამეტი ერთეულით გაიზარდა. ამავე წელს ა(ა)იპ-ის დაფინანსება თავდაპირველად 160 ათასი ლარით იყო განსაზღვრული, თუმცა, წლის განმავლობაში ბიუჯეტის კორექტირება 12-ჯერ გახორციელდა და საბოლოოდ ბიუჯეტის მაჩვენებელმა 204 500 ლარს მიაღწია.
შიდა აუდიტის დასკვნაში წერია, რომ ყველა საბიუჯეტო წლის განმავლობაში, ადგილი აქვს გეგმიურ და დარიცხულ ხელფასებს შორის თვეების მიხედვით სხვაობებს, ასევე, სხვადასხვა მუხლებში გადანაცვლებებსა და გადახარჯვებს, რაც წლის ბოლოსთვის გამოსწორებულია. ასევე, ნათქვამია, რომ რიგ შემთხვევებში ადგილი აქვს საბუთების არასწორად, უხარისხოდ ან არასრულყოფილად ატვირთვას ტენდერებისა და გამარტივებული შესყიდვების ელექტრონულ სააგენტოს საიტზე. მაგალითისთვის, როგორც დასკვნაში ვკითხულობთ, ხელშეკრულება #115 შპს “სხივთან” შედგენილია 20.02.15 წელს, 4 500 ლარზე, სააგენტოს საიტზე კი ხელშეკრულება 1 010,50 ლარზეა ატვირთული.
არის შემთხვევა, როცა ხელშეკრულება შედგენილია ერთ ფიზიკურ პირზე, ხოლო ხელმომწერად დაფიქსირებულია სხვა ინდმეწარმე. გარდა ამისა, ერთ-ერთი ხელშეკრულებით ფიქსირდება, რომ ხელშეკრულება ინდმეწარმესთან გაფორმებულია 88 ლარზე, სასაქონლო ზედნადებში 136 ლარია ნაჩვენები, თანხაც 136 ლარია გადახდილი, ხოლო მიღება-ჩაბარებაში 88 ლარია მითითებული.
როგორც აუდიტის დასკვნაში ვკითხულობთ, “დარღვევებია ტრანსპორტის მომსახურების მუხლშიც. კერძოდ, საწვავის ჩამოწერისა და ტრანსპორტის მომსახურებისას, ავტომობილის საგზურში არ არის აღნიშნული მგზავრობის მიზნობრიობა, გასვლისა და დანიშნულების ადგილი, კილომეტრაჟი, დღიური გარბენა. მიმოსვლაზე არ არის კონკრეტული მარშრუტის ბრძანებები დაწერილი, რაც ქმნის საწვავისა და ტრანსპორტით მომსახურების თანხის არადანიშნულებისამებრ გამოყენების სერიოზულ წინაპირობას. 2015 წელს სულ დახარჯულია 9 296,84ლიტრი საწვავი, თანხით 14 765,74 ლარის”, _ წერია დასკვნაში, რომელიც 2015 წელს მოიცავს.
რაც შეეხება მომდევნო 2016 წელს, როგორც აუდიტის დასკვნაშია მითითებული, ა(ა)იპ-ის დაფინანსება, თავდაპირველად 400 ათასი ლარით განისაზღვრა, თუმცა, წლის განმავლობაში ბიუჯეტში კორექტირება შვიდჯერ შევიდა და საბოლოოდ, ადგილობრივი ბიუჯეტიდან მიღებულმა დაფინანსებამ 403 305 ლარი შეადგინა.
“2016 წელს შვიდი შტატგარეშე მომუშავე საშტატო ერთეულში იქნა გადაყვანილი და საშტატო ერთეული განისაზღვრა 17 ერთეულით, ხოლო შტატგარეშე გაიზარდა 18 ერთეულით. ზრდა ხორციელდებოდა ყოველგვარი მოტივაციის გარეშე, არამიზნობრივად გაზრდილი ბიუჯეტის საფუძველზე (ამის მაგალითია ის ფაქტიც, რომ თანამშრომლის უფასო შვებულებაში გასვლისას, მოყვანილი იქნა ახალი პიროვნება, როცა ამის ფაქტობრივი საფუძველი არ არსებობდა. ხოლო თანამშრომლის უფასო შვებულებიდან დაბრუნების შემდეგ, ახალი პიროვნება ხელშეკრულებით სხვა თანამდებობაზე იქნა გადაყვანილი!)”, _ წერია დასკვნაში, სადაც, ასევე, ვკითხულობთ, რომ საბუთების ანალიზისას აღმოჩნდა, რომ ადგილი აქვს გეგმიურ და დარიცხულ ხელფასებს შორის თვეების მიხედვით სხვაობებს, ასევე, სხვადასხვა მუხლებში გადანაცვლებებსა და გადახარჯვას, რაც წლის ბოლოს გასწორებულია.
2015 წლის მსგავსად, რიგ შემთხვევაში, უხარისხოდ ან არასრულყოფილადაა ატვირთული საბუთები ტენდერებისა და გამარტივებული შესყიდვების ელექტრონულ საიტზე.
“აღსანიშნავია ის ფაქტი, რომ 30.05.16 წლის #51 ხელშეკრულების საფუძველზე, შეძენილ იქნა ორი ცალი წყლის ტუმბო 1150 ლარად, ხოლო მისი დამონტაჟება გახორციელდა 910 ლარად. იმავე შპს-ს მიერ ხელშეკრულება #52-ის საფუძველზე. საეჭვოა ის ფაქტიც, რომ 11.02.16 წლის #14 ხელშეკრულების საფუძველზე ფიზიკური პირს _ გ. ბ.-ს სამი დღის განმავლობაში შესრულებული ნაძვის ხის და საახალწლო განათებების სამონტაჟო სამუშაოებისთვის გადაერიცხა 750 ლარი, ხოლო იგივე სამუშაოსთვის ფიზიკურ პირს _ ი. ჩ.-ს 187,50 ლარი”, _ წერია დასკვნაში. აქვე ისიცაა ნათქვამი, რომ არის შემთხვევები, როცა ხელშეკრულებებს არ ახლავს სასაქონლო ზედნადებები, არ არის მიღება-ჩაბარებისა და ინსპექტირების დასკვნებში ნაჩვენები, თუ ვისთვის ან რისთვის იქნა შეძენილი აღნიშნული საქონელი.
არის შემთხვევები, როდესაც შესასრულებელი სამუშაოს მოცულობა საკმაოდ დიდია, ამ დროს კი ხელშეკრულების გაფორმებისა და შესრულებული სამუშაოს თარიღები ერთი და იგივეა.
აღსანიშნავია, რომ 2015 წლის მსგავსად, მასობრივი ხასიათი აქვს დიდი ოდენობით რკინის საკეტების, ბოქლომების, ნიჩბების, ნაჯახების, ჩაქუჩების, ხელთათმანების შეძენის ფაქტებს (4640 ლარი). შეძენილია 3 064 ლარს ინვენტარი, თუმცა, არ მომხდარა მათი პიროვნებებზე პროპორციულად ჩაბარება. საწყობში მიღებისა და ექსპლუატაციაში გადაცემის დამადასტურებელ დოკუმენტის გარეშე, ექსპლუატაციაში გადაცემისას მყისიერად გახორციელდა 51 221 ლარის მატერიალური მარაგების ჩამოწერა, რაც არასწორია.
საფუძვლიან ეჭვს ბადებს, ყოველგვარი ხელშეკრულების გაფორმების, შესრულებული სამუშაოს დამადასტურებელ აქტის გარეშე, მხოლოდ 27.12.16 წლის ბრძანების საფუძველზე ზეგანაკვეთური სამუშაოსთვის გამოწერილი 10 თანამშრომელზე 6 250 ლარის რეალობა”, _ წერია დასკვნაში, სადაც, ასევე, ნათქვამია, რომ 2016 წელს სამსახურს დარღვევები აქვს ტრანსპორტის მომსახურების საქმეში.
ამავე დასკვნით ცნობილი ხდება, რომ “ტექსერვისმა” რეკლამისთვის 2016 წელს 400 ლარის, ხოლო 2017 წელს 250 ლარის ღირებულების ხელშეკრულებები გააფორმა ერთ-ერთ ადგილობრივ გაზეთთან, თუმცა, ვერც ერთ შემთხვევაში ვერ წარმოადგინა დამადასტურებელი საბუთი, თუ რა სახის რეკლამა განათავსა გაზეთში.
აუდიტის დასკვნაში, რომელიც 2017 წლის ცხრა თვეს მოიცავს, ა(ა)პ-ის ხელმძღვანელობა არაეფექტურ და უყაირათობა მუშაობაშიცაა დადანაშაულებული:
“მძიმე ფინანსური მდგომარეობის მიუხედავად, გაიზარდა ტრანსპორტის ხარჯი 10 057 ლარით, ხოლო არასაშტატო მოსამსახურეთა სახელფასო ფონდის შემცირების მიუხედავად, თანამშრომელთა შემცირება არ გახორციელებულა, პირიქით, სექტემბერში ორი პიროვნება იქნა აყვანილი ხელშეკრულებით. სწორედ, ასეთი მენეჯმენტის, ფინანსური მართვის და კონტროლის ადეკვატურობის, შეუფასებლობის, გამოყოფილი დაფინანსების არაეფექტური და უყაირათო ხარჯვის, დაკისრებული მოვალეობისადმი არაკვალიფიციური მიდგომის შედეგი გახდა 12 თვის ბიუჯეტის ხარჯის ცხრა თვეში ამოწურვა”, _ წერია დასკვნაში.
ამასთან იკვეთება, რომ წინა წლების მსგავსად, 2017 წელსაც ტენდერებისა და გამარტივებული შესყიდვებისას შესყიდვების ელექტრონულ საიტზე უხარისხოდ, არასრულყოფილად არის ატვირთული რიგი ხელშეკრულებები, ატვირთულ ხელშეკრულებებზე არ არის მიკრული სასაქონლო ზედნადებები, ინვოისები, ანგარიშ-ფაქტურები, შესაბამის მიღება-ჩაბარების აქტებთან ერთად.
დასკვნაში, ასევე, ვკითხულობთ, რომ მათ მიერ წარმოდგენილ მიღება-ჩაბარებისა და ინსპექტირების დასკვნებში არ ფიქსირდება სად, როდის ან რა დროის განმავლობაში გახორციელდა ესა თუ ის სამუშაო.
გარდა ამისა, წერია, რომ 2017 წელსაც, ყოველგვარი დასაბუთებული არგუმენტის გარეშე ხდებოდა სხვადასხვა საქონლის შეძენა ან სამუშაოს შესრულება. მიღება-ჩაბარებებსა და ინსპექტირების დასკვნებში კი არ არის დაფიქსირებული ვისთვის ან რისთვის იქნა შეძენილი აღნიშნული საქონელი, ან სად და როდის გახორციელდა აღნიშნული სამუშაო.
შიდა აუდიტის დასკვნის მიხედვით, სამსახურმა 2017 წლის ცხრა თვეში 34 582,99 ლარის ღირებულების 19 754,65 ლიტრი საწვავი მოიხმარა, რაც, ამ დასკვნის მიხედვით, საკმაოდ გაზრდილი მაჩვენებელია და აუდიტს კითხვის ნიშნებს უჩენს.
აქვე მითითებულია, რომ ნიგვზიანის ადმინისტრაციულ ერთეულში გენერატორის ფუნქციონირებისთვის 14 352,50 ლარის ღირებულების 8 055 ლიტრი დიზელის საწვავი გახარჯული, ხოლო ადგილზე მოქმედი გენერატორისთვის 1 350 ლიტრი ბენზინი, რომლის ღირებულებამაც 2 326, 50 ლარი შეადგინა, რაზეც აუდიტის სამსახური მიუთითებს, რომ ამ შემთხვევებში, არ არის დაფიქსირებული გენერატორების მუშაობის გრაფიკი, მითითებული არაა რამდენია წვა ერთ საათში და რამდენია საათობრივი წვის ნორმა.
“როგორც წინა წლებში, მასობრივი ხასიათი აქვს საკეტების, ხერხების, ნაჯახების, ბოქლომების, ნიჩბების, ჩაქუჩების შეძენას, 2017 წლის ცხრა თვეში საწყობში მიღებისა და ექსპლუატაციაში გადაცემის დოკუმენტი გარეშე, ექსპლუატაციაში მყისიერად გახორციელდა 41 289 ლარის მატერიალური მარაგების ჩამოწერა, რაც არასწორია”, _ ნათქვამია დასკვნაში, რომელიც მერიამ შესასწავლად ოზურგეთის პროკურატურას გადაუგზავნა.
