პოლიტიკის ექსპერტი გია ხუხაშვილი ,,გურია ნიუსთან“ სამინისტროების სტრუქტურულ რეორგანიზაციაზე საუბრობს. როგორც ხუხაშვილი გვეუბნება, გარკვეული სამინისტროების გაერთიანება მისასალმებელია, თუმცა, არსებითად მნიშვნელოვანი შიდა რეორგანიზაციის საკითხია, რაც, მისი თქმით, სამინისტროების ეფექტურ ფუნქციონირებაზე გადამწყვეტ როლს თამაშობს.
,,რეფორმა სწორი მიმართულებით მიდის. მოგეხსენებათ, რომ ბოლო პერიოდში შესამჩნევი იყო მმართველობითი სისტემის კრიზისი, იმისთვის, რომ სისტემა იმართებოდეს, მართვის სწორი ალგორითმია საჭირო. კერძოდ, მნიშვნელოვანია იმ სტანდარტებთან და ტრადიციებთან დაახლოება, რაც მსოფლიოში არსებობს. ვფიქრობ, რომ სასჯელაღსრულებისა და ინფრასტრუქტურის სამინისტროები არ არის ტრადიციული სამინისტროები, შესაბამისად, მათი არსებობა ამძიმებს სისტემას, მაგრამ უნდა ითქვას, რომ მხოლოდ რაოდენობის შემცირება სერიოზულ შედეგს ვერ მოიტანს. აუცილებელია, მოხდეს სამინისტროების შიდა რეორგანიზაცია და ოპტიმიზაცია. წინასწარ თქმა, რომ სამინისტროების გაერთიანება კონკრეტულ ეფექტს მოიტანს, ძნელია“, _ გვითხრა ხუხაშვილმა.
პოლიტოლოგს 2017 წელს საქართველოს მთავრობაში გახორციელებული სტრუქტურული და საკადრო ცვლილებები შევახსენეთ და ვკითხეთ, რამდენად ეფექტური აღმოჩნდა აღნიშნული სამთავრობო რეორგანიზაცია? როგორც პოლიტოლოგი გვეუბნება, აღნიშნული ცვლილებები მექანიკური ხასიათის იყო და არანაირი შედეგი მოიტანა.
,,სამწუხარო ის არის, რომ მაშინ მოხდა მექანიკური გაერთიანება, რამაც არანაირი შედეგი მოიტანა. შიდა ოპტიმიზაცია არ მომხდარა. მაგალითად, ეკონომიკისა და ენერგეტიკის სამინისტროები მექანიკურად გაერთიანდა და არანაირი ოპტიმიზაცია არ განხორციელებულა, ამიტომ ეს არის ორ ეტაპიანი სამუშაო _ ერთი, რაოდენობის შემცირება და მეორე, სამინისტროში არსებული ამოცანების შესაბამისობაში მოყვანა“, _ განაცხადა ხუხაშვილმა.
ცნობისთვის, პრემიერ-მინისტრობის კანდიდატმა, მამუკა ბახტაძემ ,,ქართული ოცნების“ ცენტრალურ ოფისში გამართულ ბრიფინგზე განაცხადა, რომ სამინისტროების რაოდენობა 14- დან 11-მდე შემცირდება. თუ რომელი სამინისტროების გაერთიანება იგეგმება, ამის შესახებ ინფორმაცია ფორმალური მთავრობის დამტკიცების შემდეგ გახდება ცნობილი.
