13 მარტს გაიმართა ოზურგეთის მუნიციპალიტეტის საკრებულოს სხდომა, რომელზეც დღის წესრიგით გათვალისწინებული 17 საკითხი განიხილეს.
ოზურგეთის მუნიციპალიტეტის 2019 წლის დამტკიცებულ ბიუჯეტში ცვლილებებისა და დამატებების შეტანის შესახებ, საფინანსო სამსახურის წარმომადგენელმა პავლე ჭყონიამ ისაუბრა. მან განმარტა, რომ ოზურგეთის მუნიციპალიტეტის ბიუჯეტი, შემოსავლების და გადასახდელების ნაწილში 16 მილიონ 154 702, 43 ლარით იზრდება.
საკრებულოს წევრები, მერიის მიერ ბიუჯეტის პროექტით წარმოდგენილი სატრანსპორტო საშუალებებისთვის გამოყოფილი თანხით დაინტერესდნენ _ ავტოპარკის განახლებისთვის საჭირო თანხა 300 ათას ლარს შეადგენს.
საკრებულოს თავმჯდომარის მოადგილემ, გიორგი ღურჯუმელიძემ აღნიშნულ საკითხთან დაკავშირებით თქვა, რომ აღნიშნული თანხის განკარგვამდე, მიზანშეწონილად მიაჩნია, შესაბამისი წესის პროექტის შემუშავება.
_ აღნიშნული თანხის განკარგვამდე, მიზანშეწონილად მიმაჩნია, მოხდეს შესაბამისი წესის პროექტის შემუშავება, საკრებულოს მიერ დამტკიცება, რომელიც უზრუნველყოფს ავტოპარკის განაწილებას, მის გამოყენებას რაციონალურად და თავსებადი იქნება მთავრობის დადგენილებასთან. საკრებულო მიადევნებს თვალს ამ პროცესს და აქტიურად ჩაერთვება წესის შემუშავებაში, _ თქვა მან.
ღურჯუმელიძემ, ასევე, განმარტა, რომ ავტოპარკის განახლება ნამდვილად საჭიროა, არის ბევრი ძველი ავტომანქანა, რომელიც მთლიანად შავი ლითონის ჯართს წარმოადგენს და მხოლოდ ადგილს იკავებს. თუმცა, ვიდრე პროცესი დაიწყება, მერიაში უნდა შედგეს პროექტი და თანხის ხარჯვა მკაცრ კონტროლს დაექვემდებაროს.
დეპუტატებს საწინააღმდეგო აზრი არ გამოუთქვამთ და მხარი დაუჭირეს მერიის მიერ ბიუჯეტის პროექტით წარმოდგენილ სატრანსპორტო საშუალებებისთვის სამასი ათასი ლარის გამოყოფას.
მართალია, სხდომაზე დეპუტატებმა ავტოპარკის განახლება მოიწონეს, თუმცა, გავრცელებული ინფორმაციის თანახმად, საკრებულოს სხდომას “ქართული ოცნების” რამდენიმე დეპუტატი სწორედ იმიტომ არ დაესწრო, რომ არ ეთანხმებოდნენ საბიუჯეტო ცვლილებას და ავტოპარკის განახლებისთვის სამასი ათასი ლარის გამოყოფას.
მარტის დასაწყისში დაგეგმილი სხდომაც სწორედ ამიტომ გადაიდო, რამაც, ჩვენივე წყაროს ინფორმაციით, მუნიციპალიტეტის მერის განაწყენება გამოიწვია და შარაშენიძეს საკმაოდ მწვავე სიტყვიერი დაპირისპირებაც მოუხდა საკრებულოს “ქართული ოცნების” დეპუტატებთან.
“გურია ნიუსი” ამ დეპუტატებს ესაუბრა, თუმცა, ისინი, ძირითადად, მერთან დაპირისპირებას არ ადასტურებენ.
“გურია ნიუსის” კითხვაზე _ თუ რა მიზეზით არ ესწრებოდნენ სხდომას და მართლა ჰქონდა თუ არა დაპირისპირებას ადგილი, მათ ასეთი განმარტება გააკეთეს:
როზეტა სკამკოჩაიშვილი: “მსგავსი არაფერი ყოფილა. მერთან კამათი მქონდა სოფელ დვაბზუში ინფრასტრუქტურულ სამუშაოებთან დაკავშირებით, რაც ჩვეულებრივი ამბავია და აზრთა სხვადასხვაობაზეა საქმე. კონკრეტულად ეს ეხებოდა სოფლის მხარდაჭერის პროგრამას, მეტი არაფერი“.
მარიკა ჩხიკვიშვილი: “საკრებულოს სხდომას იმიტომ არ დავესწარი, რომ ოფიციალურად შვებულებაში ვიმყოფებოდი. თუმცა, იყო ზოგი საკითხი, რასაც არ ვეთანხმებოდი და რომ ვყოფილიყავი, აუცილებლად დავაფიქსირებდი ჩემ მოსაზრებას. რაც შეეხება მერის დამოკიდებულებას, ეს არახალია. სხვას როგორ მოექცა, არ ვიცი. მე რომ არ მწყალობს, რაც საკრებულოს სხდომის მიმდინარეობისას არაერთხელ გამოუჩენია ყველას მიმართ, წიკვინაც კი მიწოდა, საზოგადოებამ იცის, თუმცა, ამაზე პრობლემა არ აქვს _ მისთვის ძნელი არ არის, შეურაცხმყოფელი იყოს“.
გელა ჩავლეშვილი, “ოცნების” დეპუტატი: “საპატიო მიზეზით არ ვესწრებოდი. მეტს ვერაფერს გეტყვით“.
ლალი სიჭინავა: “მე სხდომას საპატიო მიზეზით ვერ ვესწრებოდი. მეუღლე მყავდა ავად. სხვა მიზეზი არ ყოფილა“.
რაც შეეხება მუნიციპალიტეტის მერს კონსტანტინე შარაშენიძეს, მან ჩვენს სატელეფონო ზარს არ უპასუხა.
ავტოპარკის განახლებისთვის საჭირო სამასი ათასი ლარის გამოყოფასთან და ხარჯვის მიზნობრიობასთან დაკავშირებით, თუ რას და როგორ აპირებს მერია, “გურია ნიუსი” ოზურგეთის მუნიციპალიტეტის მერის პირველ მოადგილეს, ალექსანდრე სურგულაძეს ესაუბრა. მან თქვა, რომ ავტოპარკის განახლება თვითმიზანი და თანხების უყაირათოდ ხარჯვა არ არის:
“ოზურგეთს მუნიციპალიტეტის მერიის სახელმწიფო აუდიტის აუდიტორული ანგარიშის რეკომენდაციების, ამასთან მუნიციპალიტეტის მიერ ლიმიტით განსაზღვრული საწვავის რაციონალურად ხარჯვის მიზნების გახორციელებისთვის, ოზურგეთის მუნიციპალიტეტის მერიის მიერ შემუშავებულია წლის სტრატეგია, რაც გამოიხატება შემდეგში:
მუნიციპალიტეტის ბალანსზე რიცხული 17 ერთეული სამსახურებრივი ავტომობილიდან, აბსოლუტური უმრავლესობა, 10 წელზე მეტი წარმოშობისაა და მათი ტექნიკური მომსახურება ძვირადღირებული სერვისია. სამხარაულის ექსპერტიზის ბიუროს მიერ მოხდა ამ ავტომობილების შეფასება, რის საფუძველზეც მიიღება გადაწყვეტილება, მათი ტექნიკური მდგომარეობიდან გამომდინარე თუ რამდენად ეკონომიური და რაციონალურია შემდგომი ექსპლუატაცია. მისაღებია მუნიციპალიტეტის სამსახურებრივი ავტომანქანებით სარგებლობის წესი, რაზეც მიმდინარეობს მუშაობა და ძირითადი აქცენტები გაკეთდება ე. წ. მორიგე ავტომანქანების პრინციპზე, რაც ამავდროულად გულისხმობს მათ GPS სისტემით აღჭურვას“.
ალექსანდრე სურგულაძემ, ასევე, დააკონკრეტა პასუხი ამორტიზებული, ჯართად შეფასებული ავტომანქანების ჩამოწერისა და რეალიზაციის გახორციელების პროცესის შესახებ:
“ყველაფერი იქნება გამჭვირვალე და კანონმდებლობით გათვალისწინებული მოთხოვნების დაცვით გახორციელდება, რაზეც მიმდინარეობს შესაბამისი პროცედურები. სწორედ ამიტომ, ყოველივე ზემოთ აღნიშნულიდან გამომდინარე, იგეგმება ე. წ. მორიგე მანქანების სტატუსით ერთი მიკროავტობუსის, ერთი პიკაპის და სამი ერთეული სედანის ტიპის ჰიბრიდული ან ელექტროძრავიანი ავტომობილის შეძენა. ყველას შეეძლება, ამ პროცესებს თვალი ადევნოს“, _ გვითხრა სურგულაძემ.
“გურია ნიუსმა” შავი ლითონის ჯართად შეფასებული იმ ავტომობილების ფოტო გადაიღო, რომელიც ამ დროისთვის მერიის შენობის უკანა ტერიტორიაზე დგას.
მუნიციპალიტეტის მერიაში გადმოგვცეს, ასევე, იმ 17 ერთეული სატრანსპორტო საშუალების სია, რომელიც მერიის საკუთრებაშია. აქ მითითებულია იმ რვა ერთეული ავტომობილის თუ ტრაქტორის დასახელება, რომელიც ამორტიზებულია და შეფასებულია შავი ლითონის ჯართად.
“გურია ნიუსი” თვალს მიადევნებს აღნიშნული მოძრავი ქონების პრივატიზების პროცესს, ასევე, კვლავ მიუბრუნდება ავტოპარკის განახლებისთვის სამასი ათასი ლარის გამოყოფის საკითხს და ინფორმაციას დეტალურად მიაწვდის ჩვენს მკითხველს.
