დღეს ჩვენ გვყავს არა 20 დაზარალებული, ან 1 გარდაცვლილი ადამიანი, არამედ დაზიანებული რამდენიმე ავტომობილი და ქუჩის ინფრასტრუქტურა, – ამის შესახებ შს მინისტრის მოადგილე შალვა ხუციშვილმა 11-12 მარტს ბათუმში განვითარებულ მოვლენებზე საუბრისას განაცხადა. როგორც შს მინისტრის მოადგილემ, სახალხო დამცველის 2016 წლის ანგარიშში, ბათუმის მოვლენებზე გამოთქმული კრიტიკის საპასუხოდ განაცხადა, სპეცრაზმის მხრიდან ადრეული რეაგირების შემთხვევაში, უფრო მეტი ადამიანი დაზარალდებოდა და მატერიალური ზიანი უფრო მეტი იქნებოდა, ვიდრე დღეს არის.
”აქციაზე ხალხის გარკვეულ მასას ქმნიდნენ ის ადამიანები, ვინც უბრალო გამვლელი ან უბრალოდ ინტერესის გამო გაჩერებული პირი იყო. რისკებისა და ამ საქმის პროფესიონალების შეფასებით, ცოტა ადრე რომ მომხდარიყო სპეცრაზმის გასვლა და ქუჩის გაწმენდის დაწყება, ეს ჩვენი შეფასებით, გარდაუვლად გამოიწვევდა ადამიანების დაშავებას. მე ახლა ასე დავსვამ კითხვას – ჩვენ რა მოცემულობით ვიმსჯელებდით ამ საკითხზე დღეს, რომ გვყოლოდა აქციის 20 მონაწილე სხეულის მძიმე ან ნაკლებად მძიმე დაზიანებით, რომელიც რა თქმა უნდა, იტყოდა, რომ ის არ მონაწილეობდა ვანდალურ აქტში და გამვლელი იყო და როგორი იქნებოდა შეფასება?! ევროპული სტანდარტი ამბობს, რომ მოქალაქეს და მისი ფიზიკურ უსაფრთხოებას, მიუხედავად იმისა აქციის მონაწილეა თუ არა და არღვევს თუ არა კანონს, ენიჭება უპირატესობა, ვიდრე ქონებას, რომელიც ზიანდება. 2007 წლის 7 ნოემბრის აქციისა და 2011 წლის 26 მაისის აქციების დაზარალებულ მონაწილეებს შსს-მ ათეულობით ათასი ლარი გადაუხადა სასამართლოს გადაწყვეტილების საფუძველზე”, _ განაცხადა შალვა ხუციშვილმა.
მისივე თქმით, ამჟამად ბათუმში განვითარებული მოვლენების შედეგად ზარალი 100-150 ათას ლარს არ აჭარბებს.
”ჩვენ ბევრად მეტი დაგვიჯდებოდა იმ ადამიანებისთვის კომპენსაციის გადახდა, ვინც შეიძლება დაზარალებულიყო პოლიციის ადრეული მოქმედებით. დღეს ჩვენ გვყავს არა 20 დაზარალებული, ან 1 გარდაცვლილი ან რამდენიმე ათეული მსუბუქად დაშავებული ადამიანი, არამედ დაზიანებული რამდენიმე ავტომობილი და ქუჩის ინფრასტრუქტურა, რომლის ფულადი განზომილებაც არის 100 ათასი ლარი”, – განაცხადა შს მინისტრის მოადგილემ.
სახალხო დამცველის შეფასებით, ბათუმში 11-12 მარტს, სამართალდამცავთა სწრაფი და ეფექტური რეაგირების ნაკლოვანებები ბადებს ვარაუდს, რომ სახელმწიფო არ არის მზად გაუმკლავდეს მსგავს კრიზისს.
სახალხო დამცველის შეფასებით საჭიროა გაანალიზდეს აღნიშნული ნაკლოვანებები და შეფასდეს რამდენად არის მზად ქვეყნის უსაფრთხოების სამსახურები და სამართალდამცავი სისტემა დროულად და ეფექტურად გაუმკლავდეს მსგავს კრიზისს.
