BBC ქართული ღვინის შესახებ სტატიას აქვეყნებს.
ბრიტანული მედია მაუწყებელი სტატიაში ყურადღებას ამახვილებს, რომ ყოფილ საბჭოთა კავშირის რესპუბლიკას, საქართველოს, რომელიც ღვინის დაბადების ადგილად მიიჩნევა, მსოფლიოს მასშტაბით აპირებს ექსპორტს, შეუძლია თუ არა გადაიბიროს მსოფლიო ღვინის მომხმარებლები.
სტატიის ავტორი აღნიშნავს, რომ ეწვია ქართული ღვინის მწარმოებელ რამდენიმე კომპანიას, სადაც 2-ათასტონიანი ქვევრებიდან ღვინოც დააგემოვნა.
“ქვევრში ღვინის დაყენება მისი წარმოების უძველესი ფორმაა, რომელიც ისტორიკოსების თქმით, საქართველოში პირველად ქრისტეშობამდე 5980 წელს იყენებდნენ. საქართველო ღვინის მწარმოებელი ერთ-ერთი უძველესი ქვეყანაა, რომელიც ყოველთვის ამაყობდა ყურძნის განსხვავებული სახეობებით.
საუკუნეების მანძილზე მეღვინეობა ქართული ეკონომიკის უმთავრესი შემადგენელი იყო, ხოლო ღვინის ექსპორტის დიდი ნაწილი რუსეთში მიემართებოდა, თუმცა, ურთიერთობა რუსეთთან ყოველთვის საქართველოს სასარგებლოდ არ ვითარდებოდა”,_აღნიშნულია სტატიაში.
სტატიაში ასევე აღნიშნულია, რო წინანდალი იყო პირველი ღვინო, რომლის წარმოებაც ქვეყანამ ბოთლებში დაიწყო.
სტატიაში ასევე ნათქვამია, რომ 2006 წელს, როდესაც ქვეყანა რუსეთის ემბარგოს ქვეშ მოექცა, საქართველოში მიიჩნიეს, რომ მომხდარი იყო პოლიტიკური თავდასხმა, ქვეყნის მაშინდელი პრეზიდენტის, მიხეილ სააკაშვილის პროდასავლური პოლიტიკის მიმართ.
საქართველომ ღვინის ექსპორტისთვის სხვა ქვეყების მოძიება დაიწყო და ახლა ექსპორტს 55 ქვეყანაში ეწევა.
2013 წელს რუსეთში ექსპორტის განახლების შემდეგ, რუსეთის წილი მთლიან ექსპორტში 62%-მდე შემცირდა.
როგორც ღვინის ეროვნული სააგენტოს მარკეტინგისა და საზოგადოებასთან ურთიერობის დეპარტამენტის უფროსის, ირაკლი ჩოლობარგია ამბობს, ძირითადი აქცენტები მიმართულია ევროპისა და ჩრდილოეთ ამერიკის ბაზრებისკენ.
“ჩვენ არ ვართ დიდი სახელმწიფო, ჩვენი წარმოების მაქსიმალური მოცულობა წლიურად 300 მილიონ ბოთლს შეადგენს, რაც ავსტრალიის ერთი დიდი ღვინის საწარმოს პროდუქციის ტოლია. კონკურენციას ვერ გავუწევთ საფრანგეთს, ესპანეთს, ჩილეს და სამხრეთ აფრიკას (სიდიდით), თუმცა ის, რისი შეთავაზებაც შეგვიძლია, არის უნიკალურობა. ყურძნის ჯიშები და ქვევრის ღვინო – ჩვენი ისტორიაა. ახლა ჩვენი სტრატეგიული ძალისხმევა მიმართულია დასავლეთისა და აზიისკენ და ზოგადად, საექსპორტო ბაზრის დივერსიფიკაციისკენ”, _ამბობს ჩოლობარგია.
ღვინის ერთ-ერთი მწარმოებელი არის გია პირადაშვილი, რომლის კომპანიის მიერ წარმოებული ღვინოების ექსპორტი ხდება ბელგიაში, კანადაში, საფრანგეთში, გერმანიაში, იტალიაში, ლატვიაში, ნიდერლანდებში, ამერიკის შეერთებულ შტატებსა და ნორვეგიაში.
მისი თქმით, ღვინით რესტორნები და ღვინის ბუტიკები მარაგდება.
ამერიკელი ღვინის მაგისტრის, ლიზა გრანიკის თქმით, დასავლეთში სულ უფრო და უფრო მეტ ადამიანს სურს დააგემოვნოს და გაიცნოს უძველესი და გამორჩეული ქართული ღვინოები.
მისი თქმით, ერთ-ერთი გამოწვევა არის მდგრადობა რადგან ქართველების უმეტესობა არ ამატებს გოგირდის დიოქსიდს ბოთლის დასაცავად.
“ამიტომ ძნელია, რომ მათ მგზავრობას გაუძლონ”,_ამბობს გრანიკი.
