„გურია ნიუსი“ ახლახან წერდა, ხონში გაჩეხილი წიწვოვანების შესახებ, რომლის მომქმედად, სოციალურ ქსელში, ყოფილი პარლამენტარი და მისი ძმა, კაკო და ლევან ბობოხიძეები სახელდებოდნენ.
„სიტყვები არ მყოფნის, მაგრამ მოვახლაფორთებ რაღაცას:
– ხონში გახლდით მეზობლის დასაფლავებაზე, სადაც ერთი ახლობელი შემხვდა და ისეთი რამ მაცნობა, ჯერ თმები ყალყზე დამიდგა, მერე კი აღშფოთებისგან სუნთქვა შემეკრა, თუმცა კითხვის დასმა კი მოვასწარი:
– ეს მართალია?
-სრულიადო,–მითხრა თვითონაც გაბრაზებულმა, ჩამსვა მანქანაში და იქვე, რამდენიმე კილომეტრში მიმიყვანა.
–ყველა ხონელმა კარგად იცის ეს ადგილი: ყოფილი ქიმიური ქარხნის ყოფილი საერთო საცხოვრებლის მიმდებარედ მდებარე ყოფილი სტადიონი, სადაც ბევრი მრავალათეულწლოვანი ნაძვები იზრდებოდა, საიდანაც მხოლოდ რამდენიმე ათეული დატოვეს მოუჭრელი და მასაც მალე მიადგებიან“ , – წერდა ძიძიგური და იქვე ფოტოებს აქვეყნებდა.
სტატუსის ავტორმა ყოველივე ეს ჩვენთან საუბარშიც დაადასტურა.
„რუსეთთან ომის დროს შეუსყიდია ეს ტერიტორია ლარად და ახლა მიადგა მოსაჭრელად“, – წერს ძიძიგური.
„გურია ნიუსი“ გარემოს დაცვის და სოფლის მეურნეობის სამინისტროს გარემოს დაცვის ზედამხედველობის დეპარტამენტს დაუკავშირდა.
„2019 წლის 01 მარტს, ცხელ ხაზზე შემოსული შეტყობინების საფუძველზე, გარემოს დაცვითი ზედამხედველობის დეპარტამენტის დასავლეთის რეგიონული სამმართველოს უფლებამოსილი პირების მიერ, ხონის მუნიციპალიტეტის სოფელ ივანდიდში, ყოფილი ქიმიური ქარხნის მიმდებარე ტერიტორია დათვალიერდა. ადგილზე გამოვლინდა 11 ძირი წიწვოვანი სახეობის ხე-მცენარის უკანონო ჭრის ფაქტი. ტერიტორიის სარგებლობის ან/და კუთვნილების შესახებ საჯარო რეესტრის ეროვნული სააგენტოს მიერ მოწოდებული ინფორმაციით, ჭრის ტერიტორიაზე საკუთრების უფლება რეგისტრირებული არ იყო. ხე-მცენარეების უკანონო მოჭრით გარემოსათვის მიყენებული ზიანი შეადგენდა 4 950 ლარს, რაც მნიშვნელოვანი ზიანის კატეგორიაა, რის საფუძველზეც, მასალები სისხლის სამართლის დანაშაულის ნიშნებით დასავლეთის საოლქო პროკურატურას გადაეგზავნა.
2021 წლის 19 მარტს მიღებული ინფორმაციის საფუძველზე, ადგილზე გასული გარემოს დაცვითი ზედამხედველობის დეპარტამენტის დასავლეთის რეგიონული სამმართველოს უფლებამოსილი პირების მიერ, მოწოდებული პირველადი მონაცემების ანალიზით, წიწვოვანი ხე-მცენარეები მოჭრილია იგივე ტერიტორიაზე, რომელზედაც სამმართველომ იმსჯელა 2019 წელს, ამჯერად მოჭრილია 36 ძირი წიწვოვანი სახეობის ხე-მცენარე. მოჭრილი ხეები არ განეკუთვნება საქართველოს “წითელი ნუსხის” სახეობებს და დასაწყობებულია ჭრის ტერიტორიაზე. ჭრის კანონიერების დადგენის მიზნით, გარემოსდაცვითი ზედამხედველობის დეპარტამენტის თანამშრომლებმა, ტერიტორიაზე აიღეს ჯიპიეს კოორდინატები, შედგა შესაბამისი აქტი. დაწყებულია საქმის წარმოება. სამართალდარღვევის გამოვლენის შემთხვევაში, გატარდება კანონით გათვალისწინებული ღონისძიებები.
საჯარო რეესტრის ეროვნული სააგენტოდან ინფორმაციის მიღებამდე, გარემოს დაცვითი ზედამხედველობის დეპარტამენტი რეაგირების გატარების შესაძლებლობას მოკლებულია, ვინაიდან, იმ შემთხვევაში, თუ ტერიტორია წარმოადგენს კერძო საკუთრებას და ზემოაღნიშნული გარემოებების გათვალისწინებით, მოქმედი კანონმდებლობის დარღვევის ფაქტი არ გამოიკვეთება, _ გვწერენ გარემოს დაცვით ზედამხედველობის დეპარტამენტის პრესსამსახურიდან.
როგორც ვხედავთ, დეპარტამენტი კითხვაზე პასუხს კითხვისშემცველი ტექსტით გვიბრუნებს _ თუ 2019 წელს არ იყო რეგისტრირებული კერძო საკუთრებად, მერე როგორ მოხერხდა გაფორმება? როცა იმავე ტერიტორიაზე, სადაც ახლა გაჩეხეს, მაშინაც გაჩეხილი იყო იყო წიწვოვანები და დანაშაულის ნიშნების გამო, მასალები პროკურატურას გადაეგზავნა?
„გურია ნიუსი“ დაელოდება ზედამხედველობითი დეპარტამენტის პასუხს რეაგირების შესახებ და პასუხის მიღებისთანავე შევთავაზებთ ჩვენს მკითხველებს.
ამავე თემაზე:
