ა(ა)იპ “ოზურგეთის მუნიციპალიტეტის საზოგადოებრივი ჯანდაცვის ცენტრის“ ეპიდემიოლოგი ელზა სიმონიშვილი სოციალურ ქსელში ტუბერკულოზთან დაკავშირებით პოსტს აქვეყნებს, რომელსაც “გურია ნიუსი“ უცვლელად გთავაზობთ.
“დრო იწურება“ – ეს ამონარიდი არც ლიტერატურული ნაწარმოებიდანაა და არც რაიმე განზოგადოებული ლოზუნგია…
ეს 2021 წლის ტუბერკულოზთან ბრძოლის მსოფლიო დღის თემაა!
შეგრძნება, რომ საათი „ჩაშვებულია“, მსოფლიოს კი დრო არ ყოფნის, რომ ზომები მიიღოს და შეასრულოს გლობალური ვალდებულებები ტუბერკულოზის განკურნების საქმეში, ცოტა არ იყოს დამთრგუნველია, რადგან განაჩენივით ჟღერს:
,,მსოფლიოში ყოველ ერთ წუთში 3 ადამიანი ტუბერკულოზის დიაგნოზით იღუპება”…
-ჩემი-ჯანდაცვის ცენტრის ეპიდემიოლოგის პრაქტიკიდან:
ტუბერკულოზის მართვაში ძირითადი სირთულე და პრობლემა:
–,,ქართული” მენტალიტეტი: ,,- მე ეს პრობლემა არ შემეხება!”
–დაბალი თვითშეგნება;
–სამედიცინო დაწესებულებაში დაგვიანებული მიმართვა;
–მკურნალობის ხანგრძლივობა;
–მკურნალობის პროცესში მდგომარეობის დროებითი გაუმჯობესება, რაც ხშირად ხდება მკურნალობის შეწყვეტის მიზეზი;
–არც თუ ისე იშვიათი გვერდითი მოვლენები;
–სტიგმა ანუ სტერეოტიპების კომპლექსი, რაც აიძულებს პაციენტს, რომ დამალოს დიაგნოზი.
NCDC ჭკვიანი სპეციალისტი, ტუბერკულოზის მართვის პრობლემებში გამოცდილი ქალბატონი ცირა მერაბიშვილი (Tsira Merabishvili)დამეთანხმება, რომ ეპიდკვლევის განხორციელებისას ამ პრობლემების უგულებელყოფა და გაუთვალისწინებლობა პაციენტთან მისასვლელ გზას გვიკეტავს, ამიტომ ჯანდაცვის ეპიდემიოლოგები ცოტათი ფსიქოლოგებიც ვართ.
მახსენდება სულ რამდენიმე წლის წინანდელი შემთხვევები ჩემი ეპიდემიოლოგიური პრაქტიკიდან, როცა ბავშვთა დაწესებულებების პერსონალს დაუდასტურდა ფილტვის ტუბერკულოზის დიაგნოზი.
საბედნიეროდ, ბავშვებსა და დანარჩენ კოლეგებს მაშინ ინფიცირება არ დაუდგინდათ, თუმცა, საკმაო ძალისხმევა და სამედიცინო ეთიკის ნიუანსების გამოყენება დამჭირდა პროვინციულ ქალაქში სტიგმის–სტერეოტიპების კომპლექსის თავიდან ასაცილებლად.
მართალია, ,,ვიკიპედიაში” ადვილად მოიძიებთ, მაგრამ კიდევ ერთხელ გადახედეთ:
-ტუბერკულოზის ყველაზე მეტად გავრცელებული ფორმის– ფილტვის ტუბერკულოზისთვის დამახასიათებელი სიმპტომებია:
ხველა ნახველით;
სხეულის ტემპერატურის მომატება, ოფლიანობა;
წონის კლება;
სისხლიანი ნახველი;
ტკივილი გულმკერდის არეში;
უმადობა;
საერთო სისუსტე, ადვილად დაღლა;
ქოშინი.
გახსოვდეთ!
-საყოფაცხოვრებო კონტაქტით დაავადება არ ვრცელდება;
-ფილტვის ტუბერკულოზი გადაეცემა მიკრობებით გაჯერებული ჰაერის ჩასუნთქვის შედეგად;
განსაკუთრებული საფრთხე ემუქრებათ ავადმყოფის გარშემომყოფებს– ოჯახის წევრებსა და მასთან მჭიდრო კონტაქტში მყოფ პირებს.
ამიტომ!
გთხოვთ, ზემოთ ჩამოთვლილი სიმპტომების გამოვლენისთანავე მიმართოთ სამედიცინო დაწესებულებას, რადგან ტუბერკულოზის გადამდები ფორმით დაავადებული ერთი ადამიანი წლის განმავლობაში შესაძლოა 10-15 ჯანმრთელი ადამიანის დაინფიცირების წყარო გახდეს. – “დრო იწურება“, – წერს ელზა სიმონიშვილი.
