აუდიტის სამსახურის მიერ ჯერ კიდევ 2013 წელს გაცემული რეკომენდაცია, რომელიც სასწრაფო დახმარების სამედიცინო სამსახურში დისპეჩერიზაციის პროგრამის ამოქმედებას გულისხმობს, ჯერ კიდევ შეუსრულებელია.
შესრულდა თუ არა სხვა რეკომანდაციები და რამდენად გამართულია თბილისსა თუ რეგიონებში სასწრაფო სამედიცინო დახმარების ფუნქციონირება _ ამ საკითხზე ,,გურია ნიუსი“ ჯანმრთელობის დაცვისა და სოციალურ საკითხთა კომიტეტის თავმჯდომარეს აკაკი ზოიძეს ესაუბრა.
_ რეგიონულ სასწრაფოებში აუდიტის სამსახურის ყველა რეკომენდაცია შესრულებულია. გაზრდილია ბრიგადების რაოდენობა. გარკვეულ ადგილამდე მისვლის დრო საკმაოდ დამაკმაყოფილებელია.
რაც შეეხება თბილისის სასწრაფოს, ამ შემთხვევაში საუბარი იყო რამდენიმე თემაზე. პრობლემების ძირითად მიზეზად დასახელდა ის, რომ წინა წლებში თანხების გამოძებნა ვერ მოხერხდა იმისთვის, რომ დისპეჩერიზაციის პროგრამა, რომელიც აუდიტის სამსახურის რეკომენდაცია იყო, ამოქმედებულიყო. საუბარი არის კომპიუტერულ პროგრამაზე, რომელიც, დაახლოებით, 700 000 ლარამდე ღირს, ამ თანხას გაიყოფს მერია და შინაგან საქმეთა სამინისტრო და მოხდება პროგრამის შესყიდვა.
მეორე პრობლემა არის დრო. პაციენტამდე მისვლის საუკეთესო პრაქტიკა 8 წუთია, ამის ნაცვლად თბილისში გვაქვს, დაახლოებით, 19 წუთი.
დღეს ბრიგადების რაოდენობა გაზრდილია, შრომის ანაზღაურება გაეზარდათ ექიმებს, გაზრდილია სოციალური დაცულობა, მაგრამ კიდევ არის დასამატებელი ბრიგადები და ეს მანამდე გაგრძელდება, სანამ პირველადი ჯანდაცვა თუ პალიატიური პროგრამები სათანადოდ არ იფუნქციონირებენ.
_ ბატონო აკაკი, თქვენ თქვით, რომ რეგიონულ სასწრაფოებში აუდიტის სამსახურის ძირითადი დასკვნები შესრულებულია და, შესაბამისად, სისტემაში პრობლემები აღმოფხვრილია, თუმცა, რეგიონებში სასწრაფო სამედიცინო დახმარება არც თუ ისე გამართულია, საუბარი მაქვს, სასწრაფო ბრიგადების მცირე რაოდენობასა და შესაბამისად, სასწრაფოს დაგვიანებულ რეაგირებაზე, ვგულისხმობ პაციენტამდე მისვლის დროს. რამდენად სანდოა უწყებების მიერ წარმოდგენილ სტატისტიკური მონაცემები მაშინ, როცა რეალობა სულ სხვაგვარია?
_ აუდიტის დასკვნის მიხედვით, ბრიგადის პაციენტამდე მისვლის საშუალო დრო არის 13-დან 15 წუთამდე. შედარებით მაღალი პრიორიტეტის გამოძახების შემთხვევაში უფრო ჩქარა უნდა მიდიოდეს ბრიგადა ადგილამდე, ვთქვათ 8 წუთში. სწორედ ამისთვის არის საჭირო დისპეჩერიზაციის პროგრამის გახორციელება, რათა უფრო კარგად მოხდეს დადგენა, რომელი პაციენტი საჭიროებს გადაუდებელ და რომელი შედარებით მსუბუქ დახმარებას.
ის რეკომენდაციები, რომელიც აუდიტის სამსახურმა გასცა, არის შესრულებული, თორემ, ზოგადად, პირველადი ჯანდაცვა სანამ არ ამუშავდება, სასწრაფოს გამოძახება მოხდება ისეთი მიზეზების გამო, რომელიც სასწრაფოს დახმარებას არ საჭიროებს. ეს პრობლემა არის რეგიონებში. სწორედ, ამიტომ დისპიჩერიზაციის პროგრამის ამოქმედება და მისი პრიორიტეტულობის განსაზღვრის საკითხი ამ პრობლემის მოგვარებას გულისხმობს.
