ევროპასთან ინტეგრაციისა და საგარეო ურთიერთობათა კომიტეტის სხდომაზე საგარეო საქმეთა მინისტრმა მიხეილ ჯანელიძემ კომიტეტის წევრებსა და დამსწრე საზოგადოებას საქართველოს ევროკავშირში ინტეგრაციის საგზაო რუკის კონცეფციის პრეზენტაცია წარუდგინა. სხდომაზე ,,ნაციონალური მოძრაობის“ წევრი სალომე სამადაშვილი პარლამენტთან გამართულ აქციებს გამოეხმაურა და აღნიშნა, რომ კვირას ევროპული იდეა დამარცხდა. ამასთან, სამადაშვილმა კითხვით მიმართა საგარეო საქმეთა მინისტრს, რას გააკეთებს სახელმწიფო იმ ფაშისტური ჯგუფების დასამარცხებლად, რომლებიც საფრთხეს უქმნიან საქართველოს ევროპულ მომავალს.
,,კვირას, ამ შენობის წინ, უკვე დამარცხდა ევროპული იდეა, როდესაც პოლიციამ, ევროპული მომავლის მოთხოვნით მდგარი ახალგაზრდების ევაკუაცია მოახდინა, რათა დაეცვა ისინი ფაშისტური ჯგუფებისაგან, რომლებიც ამ ქვეყანაში დღეს თარეშობენ. მადლობა მათ, რომ ყველაფერმა ჩაიარა მშვიდობიანად. მაინტერესებს თქვენი, როგორც საგარეო საქმეთა მინისტრის აზრი, რა ღონისძიებები უნდა გაატაროს დღევანდელმა ხელისუფლებამ და სახელმწიფომ მსგავსი ჯგუფების წინააღმდეგ, რომლებიც საფრთხეს უქმნიან ჩვენი ქვეყნის ევროპულ მომავალს? _ მიმართა სამადაშვილმა საგარეო საქმეთა მინისტრს.
საგარეო საქმეთა მინისტრმა სამადაშვილის ბრალდებებს უპასუხა და აღნიშნა, რომ ევროპული იდეა არა კვირას, არამედ მაშინ მარცხდებოდა, როდესაც მომიტინგეებს ხელკეტებით არბევდნენ და კლავდნენ. ამასთან, მიხეილ ჯანელიძის განცხადებით, აუცილებელია ისეთი პოლიტიკის შემუშავება, რომელიც არა კონკრეტულ ჯგუფზე, არამედ ფართო საზოგადოების ინტერესებზე იქნება მორგებული.
,,მინდა გითხრათ, რომ ევროპული იდეა მარცხდებოდა რუსთაველზე მაშინ, როდესაც მომიტინგებს, დემონსტანტებს არბევდნენ ხელკეტებით, კლავდნენ ადამიანებს და როდესაც იყო აბსოლუტური გაუგებრობა ქვეყნის შიგნით თავისუფალი აზრის გამოხატვასთან დაკავშირებით. შესაბამისად, დღეს, როდესაც საქართველომ აჩვენა მაგალითი დემოკრატიული განვითარების ძალიან მაღალი დონის სტანდარტი, ნამდვილად კიდევ ერთი ნაბიჯი გადავდგით ევროპული ინტეგრაციის კუთხით და იმ სანდოობის მოსაპოვებლად, რომელიც სჭირდება ჩვენს ევროპულ ინტეგრაციას. ვფიქრობ, რომ კვირას აბსოლუტურად დაცული იყო ყველა დემონსტრანტის უფლება და დარწმუნებული ვარ, რომ ასე იქნება მომავალშიც. ჩვენ, იმედია, შევძლებთ იმ პოლიტიკის შემუშავებას, რომელიც მისაღები იქნება ფართო საზოგადოებისთვის და არა რომელიმე კონკრეტული ჯგუფისთვის“, _ განაცხადა ჯანელიძემ.
