მწერალთა სახლი და ქართული წიგნის ეროვნული ცენტრი გაუქმდა, მის უფლებამონაცვლედ კი გამოცხადდა ქართული ლიტერატურის ეროვნული ფონდი.
მწერლებმა აღნიშნული ორგანიზაციების აღდგენის მოთხოვნით პეტიცია შექმნეს და ხელმოწერების შეგროვება დაიწყეს, დღეს კი მაჩაბელის 13-ში პრესკონფერენცია გამართეს.
როგორც პრესკონფერენციაზე უკვე გაუქმებული მწერალთა სახლის გათავისუფლებულმა დირექტორმა, ნატა ლომოურმა და ასევე გაუქმებული წიგნის ცენტრის გათავისუფლებულმა დირექტორმა დეა მეტრეველმა განაცხადეს, მათ საქართველოს განათლების, მეცნიერების, კულტურისა და სპორტის მინისტრის მოადგილეების, მიხეილ გიორგაძისა და ლევან ხარატიშვილისგან დაახლოებით 3 თვის წინ მიიღეს დაპირება, რომ სტრუქტურულ ცვლილებების პროცესში ჩართულები იქნებოდნენ, რაც არ მოხდა.
„მიხეილ გიორგაძისა და ლევან ხარატიშვილის მიერ მოცემული დაპირების მიუხედავად, რომ სტრუქტურის შემუშავების პროცესებში ჩართულები ვიქნებოდით და 3 თვე ველოდებოდით, რომ დაგვიძახებდნენ და პროექტს გავაკეთებდით, შემიძლია ვთქვა, რომ დაგვახიეს თავზე ეს ხელწერა და დებულება, რადგან მეილით მოგვივიდა სტრუქტურაც, სახელფასო განაკვეთიც, დებულებაც და ა.შ. არ ჩაგვრთეს და ეს არის ძალიან მნიშვნელოვანი, რადგან წიგნის სახლისა და მწერალთა კავშირის შექმნასაც თავის დროზე წინ ძალიან დიდი კონსულტაციები უძღოდა, გაუქმებას კი მწერლებთან კონსულტაცია არ მოჰყოლია და მოხდა ჩინოვნიკების კაბინეტში“,_ ამბობს ლომოური.
მან ასევე აღნიშნა, რომ ევროკავშირის ექსპერტი, რომლის დასკვნასაც მთავარ არგუმენტად იყენებენ, მწერალთა სახლში არც კი მისულა.
„მნიშვნელოვანი მომენტია, ის რომ მთავარ არგუმენტად იყენებენ ევროკავშირის ექსპერტის დასკვნას, რომელიც მე პირადად თვალით არ მინახავს. ის არ მოსულა მწერალთა სახლში, არ უნახავს აქაურობა, არ გაგვსაუბრებია და არაფერი არ იცის. ამიტომ არ ვიცი, რამდენად სანდოა“, _თქვა ლომოურმა.
დეა მეტრეველის თქმით კი, სამინისტრომ უგულებელყო პრემიერ-მინისტრის წერილი, სადაც პრემიერი თხოვდა, რომ შეხვედროდა სექტორს და წარმართულიყო კონსულტაციები და ეცნობებინა სამინისტროს თუ რა რეფორმასთან გვაქვს საქმე. სამინისტრომ არანაირი რეაგირება არ მოახდინა პრემიერის თხოვნაზე.
პრესკონფერენციაზე ასევე ითქვა, რომ ერთის მხრივ როცა სამინისტრო გვეუბნება, რომ ცვლილება არის დაკავშირებული ამ სფეროს, ამ მიმართულების მოდერნიზებაზე და მეორე მხრივ კი უარს ამბობენ ითანამშრომლონ ორივე ორგანიზაციის წარმატებულ ხელმძღვანელებთან და თანამშრომლების ნაწილთან, ეს გვაფიქრებინებს, რომ ეს არ არის მოდერნიზებაზე გაკეთებული აქცენტი, როდესაც წარმატებული პროექტების ხელმძღვანელებს თანამდებობებიდან ათავისუფლებენ უნდა თქვან, სულ მცირე რატომ და რისთვის.
მწერალთა სახლში გამართულ პრესკონფერენციაზე აღინიშნა, ისიც, რომ იმ ადამიანების ორიენტაცია, ვისი ხმაც ხმამაღლა ისმოდა ფრანკფურტში მიმართულია ევროპისკენ, თუმცა, ხელისუფლების ორიენტაცია მათსას არ ემთხვევა და ხელისუფლებამ უნდა დაიმახსოვროს რომ დღეს საქართველო რუსეთისკენ აღარ გაიხედავს.
მწერლები მოითხოვენ, რომ შეჩერდეს სახელდახელო და გაუაზრებელი რეორგანიზაცია და მიეცეთ საკონსულტაციო პროცესში ჩართვის საშუალება!
გარდა ამისა, რეორგანიზაციის პროცესში მწერალთა სახლისა და წიგნის ეროვნული ცენტრის სამსახურიდან უმიზეზოდ დათხოვნილი დირექტორების ჩართვას და მათთვის ნორმალური სამუშაო პირობების შექმნას.
გარდა ამისა, მათ დაუშვებლად მიაჩნიათ დიდი მეცენატისა და საზოგადო მოღვაწის, დავით სარაჯიშვილის მუზეუმის გაუქმება მისსავე სახლში.
ამავე თემაზე: მწერალთა სახლის აღდგენის მოთხოვნით პეტიცია შეიქმნა
