გურიაში 49 სოფლის ინტერნეტიზაციის თაობაზე განცხადება მთავრობის სხდომაზე ქვეყნის პრემიერმა, გიორგი გახარიამ გააკეთა.
პრემიერის თქმით, ყოველდღიური ცხოვრების აუცილებლობიდან გამომდინარე, უაღრესად მნიშვნელოვანი და სწრაფად გადასაწყვეტი ამოცანაა, რომ თითოეულ ქართულ სოფელში მაღალი ხარისხის ინტერნეტი იყოს. მთავრობის სხდომაზე გაჟღერებული ინფორმაციით, საყოველთაო ინტერნეტიზაცია გურიის მხოლოდ ერთი მუნიციპალიტეტის, ოზურგეთის სოფლებს მოიცავს.
კონკრეტულად როდის და რომელ ლოკაციებზე გახორციელდება გურიაში საყოველთაო ინტერნეტიზაციის პროგრამა, ამის გარკვევა „გურია ნიუსმა“ „ოუფენ ნეტში“ ცადა. სწორედ ამ უწყებამ უნდა განახორციელოს პრემიერის მიერ დაანონსებული პროექტი.
ცნობისთვის, აღნიშნული სამსახური საქართველოში ფართოზოლოვანი, ოპტიკურ-ბოჭკოვანი ინფრასტრუქტურის განვითარების სახელმწიფო პროგრამის გახორციელების მიზნით, ეკონომიკისა და მდგრადი განვითარების სამინისტროს “ინოვაციების და ტექნოლოგიების სააგენტომ” ჯერ კიდევ 2015 წლის 21 ივლისს დააფუძნა.
რაც შეეხება ჩვენი კითხვების საპასუხოდ მიღებულ განმარტებას „ოუფენ ნეტიდან“ ასეთია: „იგეგმება საყოველთაო ინტერნეტიზაციის სახელმწიფო პროგრამის პირველი (საპილოტე) ეტაპის გახორციელება გურიის რეგიონის ოზურგეთის მუნიციპალიტეტის ტერიტორიაზე. ეს გახლავთ ოზურგეთის 49 დასახლებული პუნქტი, სადაც 8 500 ოჯახზე მეტი ცხოვრობს. აღნიშნული ქსელის მშენებლობის დასრულების ვადა განსაზღვრულია მთავრობის # 375 დადგენილებით.
დანარჩენი თეთრი ზონები დაიფარება ეტაპობრივად. მიზნის მისაღწევად მსოფლიო ბანკთან ერთად მიმდინარეობს აქტიური მუშაობა.
საპილოტე რეგიონის შერჩევის კრიტერიუმები:
პროგრამის საპილოტე რეგიონის შერჩევის კრიტერიუმებისა და თეთრი ზონის სამიზნე გეოგრაფიულ არეალებში არსებული დასახლებული პუნქტებისა და მოსახლეობის რაოდენობის, ასევე პროექტის შემჭიდროებულ ვადებში განხორციელების შესაძლებლობის გათვალისწინებით, საპილოტე პროექტი განხორციელდება გურიის რეგიონის ოზურგეთის მუნიციპალიტეტის ტერიტორიაზე, რომლის ძირითადი პარამეტრებია: დასახლებული პუნქტების რაოდენობა- 49, შინამეურნეობა – 8 516, მოსახლეობის რაოდენობა – 28 576 მოსახლე, ოპტიკური კაბელის საორიენტაციო სიგრძე – 145 კილომეტრი. პროპორციულობის პრინციპიდან გამომდინარე, ოზურგეთის მუნიციპალიტეტში საშუალოდ 1 კმ სიგრძის მაგისტრალის მშენებლობა უზრუნველყოფს 197 ადამიანის წვდომას ფართოზოლოვან მომსახურებებზე, რაც ბევრად აღემატება ნებისმიერი სხვა რეგიონის იგივე მონაცემს, ზოგ შემთხვევაში – 2-ჯერ, 3-ჯერ და მეტჯერაც. მაგალითისთვის არსებულ მონაცემთან ყველაზე ახლოს არის აჭარის მთლიანი რეგიონის მონაცემი – 153. თუმცა რელიეფისა ფა ოპტიკური კაბელის სიგრძის გათვალისწინებით, აღნიშნულ რეგიონში საქართველოში ფართოზოლოვანი ინფრასტრუქტურის განვითარების სახელმწიფო პროგრამით განსაზღვრულ ვადებში მშენებლობა შეუძლებელია.
შემუშავებული მოდელი
შემუშავებული მოდელით ფართოზოლოვანი ინფრასტრუქტურა აშენდება მხოლოდ ე.წ. თეთრი ზონის სამიზნე გეოგრაფიულ არეალებში და უზრუნველყოფს ნებისმიერი ოპერატორისათვის თავისუფალი, შეუზღუდავი და არადისკრიმინაციული პირობებით ღია დაშვების მომსახურების მიწოდებას რათა ოპერატორებმა განავითარონ თავიანთი ფართოზოლოვანი ინფრასტრუქტურა და საკუთარი ქსელების საშუალებით ბოლო მომხმარებლებს მისცენ ფართოზოლოვან ინტერნეტმომსახურებებთან წვდომის შესაძლებლობა.
პროგრამის მიზნებიდან გამომდინარე, “ოუფენ ნეტის” მიერ უზრუნველყოფილი იქნება, სულ მცირე, შემდეგი ღია დაშვების მომსახურებები:
ა) პროგრამის ფარგლებში აშენებულ ოპტიკურ-ბოჭკოვან კაბელში ძარღვ(ებ)ის სარგებლობაში გაცემა;
ბ) ამ პროგრამის ფარგლებში მოწყობილი ქსელის ორ ნებისმიერ დაშვების წერტილს შორის (ერთ-ერთი წერტილი აუცილებლად უნდა იყოს თეთრ ზონაში) მონაცემთა გადაცემის არხ(ებ)ის სარგებლობაში გაცემა;
პროგრამის ფარგლებში უზრუნველყოფილი იქნება საქართველოს მთელ ტერიტორიაზე:
ა) ერთიანი ნეიტრალური ოპტიკურ-ბოჭკოვანი ქსელის შექმნა;
ბ) სამიზნე გეოგრაფიულ არეალში ფართოზოლოვანი საბითუმო მომსახურებების განვითარება;
გ) შექმნილი ქსელის ორ ნებისმიერ დაშვების წერტილს შორის კავშირი.
საგულისხმოა, რომ საქართველოს ეკონომიკისა და მდგრადი განვითარების სამინისტრომ საყოველთაო ინტერნეტიზაციის პროექტის გახორციელების თაობაზე განცხადება 2015 წელსაც გააჟღერა. მაშინდელი დაპირებით, პროექტის პირველი ფაზის ფარგლებში ინტერნეტი ხელმისაწვდომი გახდება საქართველოს 10 რეგიონის _ აჭარის, გურიის, იმერეთის, კახეთის, ქვემო ქართლის, მცხეთა-მთიანეთის, რაჭა-ლეჩხუმის, სამეგრელო-ზემო სვანეთის, სამცხე-ჯავახეთისა და შიდა ქართლის 500-მდე სოფლისთვის.
პირველი ფაზის დასრულების შემდეგ ინტერნეტით უნდა ესარგებლა გურიის 30 სოფელს. მათ შორის, ნიგვზიანს, ქვიანს, ლესას, ბოხვაურს, გვიმრალაურს და აცანას.
საქართველოს ინოვაციებისა და ტექნოლოგიების სააგენტოს მაშინდელი ინფორმაციით, საერთო ჯამში, პროექტის ფარგლებში ინტერნეტი საქართველოს 2000 სოფელში შევიდოდა და მთლიანობაში ხელმისაწვდომი მოსახლეობის 91%-სთვის გახდებოდა. “ოუფენ ნეტ”-ის მაგისტრალური ინფრასტრუქტურის გამოყენებით მომსახურებას მიიღებდა 190,000-მდე აბონენტი. პროექტის განხორციელება, რომლის ღირებულებაც დაახლოებით 150 მილიონი დოლარს შეადგენდა, ბიძინა ივანიშვილის დაფინანსებით უნდა განხორციელებულიყო და 2018 წლისთვის უნდა დასრულებულიყო.
