„სასამართლოს სისტემას დამკვეთები უნდა ჩამოშორდნენ და იუსტიციის უმაღლესი საბჭო, რომელიც პოლიტიკური დამკვეთის შემსრულებელი ორგანო გახდა, სისტემიდან უნდა გაიხვეტოს“, _აღნიშნა „გურია ნიუსთან“ პოლიტიკის ექსპერტმა გია ხუხაშვილმა. მისივე თქმით, „დღევანდელმა ხელისუფლებამ, ვინც მიხეილ სააკაშვილს შეაგინა, ყველა გულში ჩაიხუტა და წინა რეჟიმის დროს ჩადენილი დანაშაულები აპატია, რაც მანკიერებაა“.
_ ბატონო გია, „ქართული ოცნება_დემოკრატიული საქართველოს“ თავმჯდომარე ბიძინა ივანიშვილი ფიქრობს, რომ თანამდებობებზე უვადოდ გასამწესებელ მოსამართლეებთან დაკავშირებით გადაწყვეტილება ფართო მსჯელობის საფუძველზე უნდა იყოს მიღებული. მის მიერ გაკეთებული განცხადების გავრცელების შემდეგ, პოლიტიკურ წრეებში კიდევ უფრო გააქტიურდა საუბარი იმის შესახებ, რომ ბიძინა ივანიშვილი თანამდებობებზე მოსამართლეთა უვადოდ განმწესებას ლობირებს. აღნიშნულთან დაკავშირებით, როგორია თქვენი პოზიცია?
_ მოსაზრებას იმის შესახებ, რომ მოსამართლეთა სია ბიძინა ივანიშვილის დაწერილია, სკეპტიკურად ვუყურებ. ვფიქრობ, პარლამენტში ჩაბუდებული ახალგაზრდა დაჯგუფება საკუთარი ინტერესებიდან გამომდინარე, სიებს ადგეს და ვიზირებისთვის ბიძინა ივანიშვილს სთავაზობს. ე.წ. ვიზის მიღების შემდეგ, ეს ჯგუფი საკუთარ მანკიერ სურვილებს პოლიტიკურ გუნდში ცეცხლითა და მახვილით ატრიალებს, რასაც „ქართული ოცნება“ გუნდურ თამაშს ეძახის. სახელმწიფოში გადაწყვეტილების მიღების სისტემა მანკიერად მუშაობს, რაც ერთ-ერთი უმთავრესი პრობლემაა.
_ ბიძინა ივანიშვილმა, ლევან მურუსიძესთან შეხვედრის შემდეგ, სააპელაციო სასამართლოს აღნიშნული მოსამართლე წინა რეჟიმის მსხვერპლად გამოაცხადა. რატომ არ უნდა ფიქრობდეს იმავეს პარტიის თავმჯდომარე უვადოდ გასამწესებელ მოსამართლეთა სიის შემადგენლობაზე?
_ თუ ბიძინა ივანიშვილი ასე ფიქრობს, ეს მისი შეცდომაა. დღევანდელი ხელისუფლება ისეთ სისტემას აშენებს, რომ ყველაფერში დამნაშავე მიშა სააკაშვილი გამოჰყავთ. რასაც „ქართული ოცნება“ გვთავაზობს მანკიერი ფორმულაა. დღევანდელმა ხელისუფლებამ, ვინც მიშას შეაგინა, ყველა გულში ჩაიხუტა და წინა რეჟიმის დროს ჩადენილი დანაშაულები აპატია. ხელისუფლება გვეუბნება, ვინც საკაშვილთან თანამშრომლობა მოინანია, ყველა მსხვერპლიაო, რაც მანკიერებაა და სახელმწიფოებრივად დამაზიანებელი მოქმედებაა.
_ “ქართული ოცნებაში“ მოსამართლეებთან დაკავშირებით მწვავე დაპირისპირებაა. შიდაპარტიულ ბრძოლაში ვინ გაიმარჯვებს _ ბიძინა ივანიშვილის მიერ მხარდაჭერილი ახალი გვარდიის შემადგენლობა, რომელიც თანამდებობებზე მოსამართლეთა უვადოდ განმწესებას ლობირებს თუ ძველი გვარდიის წარმომადგენელთა ნაწილი, რომელიც აღნიშნულს პრინციპულად ეწინააღმდეგება?
_ მგონია, რომ შიდაპარტიული ბრძოლა და მოსამართლეთა სიის ამ შემადგენლობით გასვლა მთავარი არ არის. პრობლემა არა საკუთრივ ამ სიაშია, არამედ ალგორითმში, რომლითაც აღნიშნული სიები დგება. პარლამენტში წარმოდგენილი მოსამართლეთა სიაც რომ ჩავარდეს, თუ შერჩევის ალგორითმი იგივე დარჩა და პოლიტიკურ ვერტიკალში სასამართლო სისტემა კვლავ შენარჩუნდა, იუსტიციის უმაღლესი საბჭოს წევრები სხვა სიას შემოგვთავაზებენ, უარესებს ვერ იპოვიან თუ?! მთავარი ამოცანა მოსამართლეთა შერჩევის ალგორითმის შეცვლაშია. ამ პროცესებს დამკვეთები უნდა ჩამოშორდნენ და იუსტიციის საბჭო, რომელიც პოლიტიკური დამკვეთის შემსრულებელი ორგანო გახდა, სისტემიდან უნდა გაიხვეტოს. აუცილებელია, ახალი იუსტიციის საბჭოს დაკომპლექტება და ჰორიზონტალურ სისტემაზე გადასვლა. რაც მთავარია, მოსამართლეთა შერჩევის ერთ-ერთი მთავარი კრიტერიუმი პროფესიონალიზმთან და კეთილსინდისიერობასთან ერთად, რეპუტაცია უნდა იყოს. ასეთ შემთხვევაში, დარწმუნებული ვარ, ბევრ მოსამართლეს მანტიის გახდა მოუწევს, მათ შორის, ე.წ მსხვერპლად შერაცხულ ლევან მურუსიძესაც. თუ აღნიშნული კათარზისი არ გავიარეთ, სასამართლო სისტემას არაფერი ეშველება.
_ ბიძინა ივანიშვილის მიერ მოსამართლეებთან დაკავშირებით გაკეთებული განცხადების შემდეგ ჩანს, რომ ეკა ბესელიას გუნდი, მმართველ პარტიას კიდევ უფრო დააშორდა. უახლოეს მომავალში პარტიის დაშლა გარდაუვალია?
_ პროცესებს მივყვეთ და ყველაფერი გამოჩნდება. არამგონია, „ქართულ ოცნებში“ ვინმეს დამოუკიდებლად პოლიტიკური თამაშის გაგრძელების რესურსი ჰქონდეს. ფაქტია, რომ გუნდში შიდაპარტიული კრიზისია. პარტია თავიდანვე ეკლექტური წარმონაქმნი იყო. ამ ადამიანებს არაფერი აერთიანებთ. შიგნით ზიზღი და ურთიერთაგრესია ყოველთვის არსებობდა, უბრალოდ, ახლა გამოვიდა სააშკარაოზე. “ქართული ოცნების“ მცირე ჯგუფი ბიძინა ივანიშვილთან გარკვეულ საკითხს ათანხმებს, იმ დეპუტატს, რომელიც აღნიშნულს არ მიიღებენ, გუნდური თამაშის დარღვევაში ადანაშაულებენ, ეს არის ჯანსაღი სისტემა?! ბუნებრივია, არა!
_ არსებობს მოსაზრება, რომ კლანური დაჯგუფება არა მარტო სასამართლოში, არამედ საკანონმდებლო და აღმასრულებელ ორგანოებშიც მართავს პროცესებს. „ქართული ოცნების“ მმართველობითი სისტემის დემოკრატიულობა კითხვის ნიშნის ქვეშ დგას?
_ საქმე სისტემურ პრობლემასთან გვაქვს. სასამართლოში, პარლამენტში, აღმასრულებელ ხელისუფლებასა და ძალოვან სტრუქტურებში არსებობენ კლანური დაჯგუფებები, რომლებიც ძალაუფლების ხელში ჩაგდებას ცდილობენ. ბუნებრივია, სასამართლო და იუსტიციის უმაღლესი საბჭო ამდენს ვერ გაბედავდა, ძალოვან სტრუქტურებსა და პარლამენტში საკუთარი ლობისტები რომ არ ჰყავდეთ. საქმე გვაქვს ჯგუფურ თამაშთან, რომელიც მმართველობით სისტემას არის მოდებული.
