„რა მნიშვნელობა აქვს “კოლექტიური ზარდიაშვილები“ ბაღში შეხვდებიან, რესტორნებში თუ მაგიდის ქვეშ?! ეს მანკიერი სისტემა იმდენად აშკარაა, რომ დამატებითი მტკიცებულებები აღარ სჭირდება“, _ აღნიშნა „გურია ნიუსთან“ პოლიტოლოგმა გია ხუხაშვილმა, რომელიც პარლამენტის მიმდებარე ტერიტორიაზე „ქართული ოცნების“ დეპუტატის ვანო ზარდიაშვილის, უზენაესი სასამართლოს უვადოდ დანიშნული მოსამართლის ლევან მურუსიძის, მიხეილ ჩინჩალაძის, გიორგი მიქაუტაძისა და ვალერი ცერცვაძის შეხვედრას გამოეხმაურა.
ხუხაშვილმა ბესელიას ღია წერილთან დაკავშირებითაც გააკეთა კომენტარი და აღნიშნა, რომ ჯერ კიდევ „ქართული ოცნების“ მოქმედმა დეპუტატმა პრობლემებზე საუბარი დააგვიანა.
_ ბატონო გია, სოციალურ ქსელში ეკა ბესელიას ფარული ჩანაწერების შესაძლო გავრცელების შემდეგ, „ქართული ოცნების“ დეპუტატმა საზოგადოებას ღია წერილით მიმართა, რომლის ერთ-ერთ ნაწილში აცხადებს, ციტირება _“კოლექტიური მოძალადე ფრაგმენტულად, მაგრამ დიდი დოზით შემოვიდა ჩვენს “გუნდში“, შიგნიდან დაგვიწყო რყევა და ჯაყჯაყი“. ჩანს, რომ ბესელია მმართველ პარტიაში შექმნილ კრიზისულ ვითარებაზე პასუხისმგებლობას წინა ხელისუფლებიდან „ქართულ ოცნებაში“ პორტირებულ პირებსა თუ იმ მოსამართლეებს აკისრებს, რომლებიც „ნაციონალური მოძრაობის“ მსახურნი იყვნენ. თქვენ როგორ აფასებთ ბესელიას მიერ გაკეთებულ განცხადებას ?
_ აქ საუბარია სისტემაზე, რომელმაც მძევლად აიყვანა ის ფასეულობათა სისტემა და იდეალები, რომელთა გამოც 2012 წლის გამარჯვება შედგა და ამ კუთხით, გარკვეულწილად, კონტრევოლუციას აქვს ადგილი. ხელისუფლების გარკვეულ ნაწილს გაუჩნდა განცდა, რომ ამ ურჩხულს მოათვინიერებდა, სინამდვილეში პირიქით მოხდა. მანკიერი სისტემა ყველაფერს არის მოდებული, მათ შორის, სასამართლო სისტემასაც. ბესელიამ გვიან, მაგრამ შეამჩნია, რომ პრობლემა ბევრად უფრო მასშტაბური და სისტემურია. თუ ეკა ბესელია ამ განცხადებაში კონკრეტულ ჯგუფებს გულისხმობს და ილუზია აქვს, რომ ერთი და ორი კაცის გადაჯგუფებით, თუნდაც შეწირვით, რამე გამოსწორდება, ბუნებრივია, სინამდვილეში ასე არაა.
_ თქვენი აზრით, ფარული ჩანაწერების გავრცელების გზით, ვის სურს ეკა ბესელიას დისკრედიტაცია?! პოლიტიკური პროცესების გათვალისწინებით, ლეგიტიმურია კითხვა _ სასამართლო თუ საპარლამენტო ჯგუფს, რომელიც ბესელიას უვადოდ გასამწესებელ მოსამართლეებთან დაკავშირებით დაუპირისპირდა?
_ შესაძლოა, ეკა ბესელიას მიმართ ვინმეს შურისძიების სურვილი ამოძრავებს, მაგრამ პოლიტიკური სამიზნე არ შეიძლებოდა მხოლოდ ის ყოფილიყო. ამ ჩანაწერების გავრცელების პოლიტიკური სამიზნე „ქართული ოცნებების“ სხვა წევრებიცაა, რომლებსაც ეუბნებიან, ჭკვიანად იყავით, თორემ თქვენი ჩანაწერიც გამოქვეყნდება. პირადად ბიძინა ივანიშვილისთვის ყველაზე დრამატული ის არის, რომ ამ პროცესში საზოგადოება მას აკისრებს პასუხისმგებლობას. ვფიქრობ, რომ ირიბად ეს დარტყმა ბიძინა ივანიშვილის წინააღმდეგაც არის განხორციელებული. იმისთვის, რომ რაღაც გარკვეული პროცესების დეტონაცია მოახდინოს. ჩანაწერები, შეიძლება, ხელისუფლების გარკვეული ინტერესჯგუფების მხრიდან იყოს გავრცელებული. თუ ხელისუფლება სისტემურ რეორგანიზაციას არ დაიწყებს, ამ მანკიერებას თავად გადაჰყვება.
_ თანამდებობებზე უვადოდ გასამწესებელ მოსამართლეებთან დაკავშირებით აგორებული სკანდალის შემდეგ, „ქართული ოცნების“ წევრთა ერთიანობა ბიძინა ივანიშვილის გამოჩენამდე კითხვის ნიშნის ქვეშ კიდევ ერთხელ დადგა. მიუხედავად იმისა, რომ „ოცნების“ თავმჯდომარემ გუნდის გამაერთიანებლის როლი კიდევ ერთხელ შეასრულა, როგორც ჩანს, ბიძინა ივანიშვილისთვის მმართველი პარტიის გარკვეულ წევრთა შენარჩუნება შეუძლებელი გახდება. ეკა ბესელია ღია წერილში ამბობს_“მე-7 წლისთავზე ვწყვეტ შიგნით საუბარს, წუხილსა, სამდურავს. საჯაროდ ვამბობ, ს ა კ მ ა რ ი ს ი ა“. აღნიშნული განცხადება ნიშნავს, რომ ბესელია „ქართული ოცნებიდან“ მიდის და დამოუკიდებლად ახალი პოლიტიკური თამაშისთვის ემზადება?
_ სამწუხაროდ, ეკა ბესელიამ სისტემის მანკიერება შვიდი წლისთავზე დაინახა?! ამ მხრივ, ძალიან დააგვიანა. რაც შეეხება დატოვებს თუ არ დატოვეს პარტიას, სიმართლე გითხრათ, ჩემთვის არ არის საინტერესო. ბესელია რაღაც განსაკუთრებულ პოლიტიკურ ფიგურა არ არის. როგორც ჩანს, მის მოქმედებებში ემოციები სჭარბობს, ის ცდილობს, რომ მასსა და მმართველ პარტიას შორის გადებული ხიდი საბოლოოდ არ დაწვას. ეკა ბესელიას თანავუგრძნობ და ამ ბრძოლაში მხარს ვუჭერ.
_ ხშირად საუბრობთ ქვეყანაში არსებულ მანკიერ მმართველობით სისტემაზე და აცხადებთ, რომ შექმნილ ვითარებას ბიძინა ივანიშვილის გაპრემიერება გამოასწორებს. სურვილი ერთია, თუმცა რამდენად შესაძლებელია პროცესის აღნიშნული მიმართულებით განვითარება?
_ ქვეყანაში ძალიან ბევრი პრობლემა დაგროვდა. მოთხოვნა იმის შესახებ, რომ ბიძინა ივანიშვილი წავიდეს ხელისუფლებიდან, არაკონსტრუქციულია, რადგან ალტერნატივა ძალის ცენტრებში არ არსებობს. შეიძლება ჩვენ ბიძინა ივანიშვილთან გარკვეული პრეტენზიები გვაქვს, მაგრამ უნდა გვესმოდეს, რომ ნგრევის პროცესის შეჩერება მხოლოდ ივანიშვილს შეუძლია. სხვა ინსტრუმენტი ქვეყანაში, უბრალოდ, არ არსებობს. რაც უნდა პრეტენზიები გვქონდეს მის მიმართ, უნდა ვუბიძგოთ, რომ თავისი გუნდის ფორმალიზება მოახდინოს და გახდეს პრემიერ-მინისტრი იმისთვის, რომ ქვეყანაში სტაბილიზაცია მოხდეს. ქაოტური ვარდნის პროცესის შეჩერების რესურსი მხოლოდ ბიძინა ივანიშვილს გააჩნია. ბიძინა ივანიშვილი რომ წავიდეს, ხელისუფლება ვის დარჩება?!
