“ჯადო” და “ჯადოს” ასახსნელად გამოძახებული სამაშველო სამსახური ოზურგეთში

ახლახან, ოზურგეთის ერთ-ერთ სოფელში, რომელიც ქალაქთან ახლოს მდებარეობს, სურსათის ეროვნული საააგენტოს გურიის სამსახურის წარმომადგენლებმა  მავნებელ აზიური ფაროსანას (მარმარა ბაღლინჯო) ფერომონიანი საჭერი სათხილეში დაამაგრეს. მეპატრონე, რომელიც ძირითადად აქ არ ცხოვრობს და თხილის ფართობში სამუშაოდ დადის, ადგილზე ნასვამ მდგომარეობაში მივიდა.  აქა-იქ მიბმული მავნებლის საჭერი რომ დაინახა, მიუახლოვდა და გაბრაზებულმა იყვირა, ეს ჯადო  სათხილეში ვინ დამიდგაო?  კიდევ უფრო მიუახლოვდა ფირფიტას და ხელი სტაცა.  როცა საჭერზე ხელის გულით მიეკრა,  მერე მეორე ხელი მიაშველა და უფრო დაეწება,  ყვირილს მოუმატა: ვთქვი თუ არა, რომ ეს ჯადოა? ეს რა მომიწყვეს, ეს ვინ გამიკეთა? მერე კი საჭერი ჩამოგლიჯა და ცეცხლი წაუკიდა, რასაც მისივე დაფნის კორომი შეეწირა.

ჩვენი წყაროს ინფორმაციით, მალე სამაშველო სამსახური გამოიძახეს, რაც საბოლოოდ იმით დასრულდა, რომ განრისხებული ჯადოს „აღმომჩენი“, დააწყნარეს.  აღმოჩნდა, რომ  მეზობლის ბავშვი, რომელსაც მავნებლის  საჭერის დამაგრების შესახებ დაუბარეს და გააფრთხილეს, რომ სათხილის პატრონისთვის ინფორმაცია მიეწოდებინა, იმ მომენტში,  როცა ნასვამი კაცი „ჯადოს“ დასდევდა, ეძინა.  მოგვიანებით კი უთხრა,  რომ მას დაუბარეს მავნებლის საჭერის  დამაგრების შესახებ.

  გურიაში, მავნებელი მწერის, აზიური ფაროსანას წინააღმდეგ სამოქმედოდ,  სურსათის ეროვნული სააგენტოს გურიის სამსახურის წარმომადგენლებმა სათხილეებში სპეციალური ფერომონიანი საჭერები განათავსეს.  საჭერი დამონტაჟდა სოფლების  უბნების მიხედვით და მიზანი ამ  პროცედურისა არის, გამოიკვლიონ რა რაოდენობითაა შემოსული საშიში მავნებელი, რომ შემდეგ  შეწამვლის პროცესი დაიწყოს.

მოსახლეობის გარკვეული ნაწილი მაინც უნდობლად ეკიდება მავნებლის წინააღმდეგ ღონისძიების გატარებას _ ან საერთოდ არ სჯერა, რომ არსებობს საშიში მწერი,  ან მიიჩნევს, რომ მავნებლის წინააღმდეგ შეწამვლის პროცესი თუ დაიწყო, ეს მათ კარმიდამოსა  თუ ჯანმრთელობაზე ცუდად აისახება. ჩვენი წყაროს მიერ მოწოდებული ინფორმაციაც „ჯადოს“ სკანდალის შესახებ,  სწორედ  ასეთი  მიდგომითაა განპირობებული.

 სეს-ის გურიის წარმომადგენლები, რა თქმა უნდა,  ამ სათხილეში დაკვირვებისთვის  საჭერს აღარ დადგამენ და სხვა უბანს აირჩევენ.

ზოგადად, მოსახლეობაში  ჭორის გავრცელებაც ხშირად ხდება. მიუხედავად იმისა, რომ სეს-ის წარმომადგენლები  ხალხს ოპერატიულად აწვდიან  ინფორმაციას, დარიგდა ლიფლეტები, ტარდება სემინარები, მაინც აქტიურად ვრცელდება  „ჯადო ამბები“, თითქოს, ამ მავნებლის წინააღმდეგ  დაწყებულმა შეწამვლამ  სოფელ გომში ძროხა მოკლა. ეს მაშინ, როცა  პრეპატატი ჯერ საწყობიდან არავის გაუტანია და მხოლოდ მონიტორინგის პროცესია. უფრო მეტიც, ზოგის ფანტაზიით, მავნებლები, თითქოს,  ბიძინა ივანიშვილის გადარგულ ხეებზე  ბუდობს და  აქტიურად მხოლოდ  მცენარის  ადგილის შეცვლის მერე ვრცელდება…