სოფლის მეურნეობის მინისტრის მოადგილე, გელა ხანიშვილი დღეს ოზურგეთში იმყოფებოდა, სადაც ჩოხატაურელ და ოზურგეთელ ფერმერებს შეხვდა. შეხვედრას ესწრებოდნენ გურიის მხარის გუბერნატორი ზურაბ ნასარაია, ოზურგეთის მუნიციპალიტეტის ვიცე-მერი ალექსანდრე სურგულაძე, ოზურგეთის მუნიციპალიტეტის საკრებულოს თავმჯდომარე დავით დარჩია, ოზურგეთის მუნიციპლიტეტის ეკონომიკური სამსახურის და სოფლის მეურნეობის სამინისტროს საინფორმაციო ცენტრის წარმომადგელები და ჟურნალისტები.
გელა ხანიშვილმა ზოგადად ისაუბრა გურიაში შეღავათინი კრედიტების შესახებ. ასევე, რეგიონში გასახორციელებელი პროექტების შესახებ და თქვა, რომ მხარეში ოთხმოცი მიმართულების პროექტია ჩადებული. ასევე, ისაუბრა თხილის მასიური დაავადების შესახებ, რაც გულის სიდამპლეს ეხება. აღნიშნა, რომ წლევანდელი წელი დადებითი ტენდენციით ხასიათდება, იყო უხვი მოსავალი ყველა მიმართულებით.
შეხვედრაზე ხვარბეთელმა ფერმერმა, პედაგოგმა ქალბატონმა მაგული ჯინჭარაძემ ხაზი გაუსვა სოფელში მცხოვრები ხალხის უკიდურესად მძიმე ეკონომიკურ ყოფას.
_სოფელი არის ქვეყნის განვითარების ხერხემალი დ ეს ხერხემალი შუაზე არის გატეხილი. ირგვლივ სულ გაჭირვებაზე საუბარი ისმის. მეზობელმა მითხრა, ძროხას გავყიდი,ჩემთვის არ მაქვს საჭმელი და ძროხას რა ვაჭამოო? ხალხი რომ რვაჯერ ვერ მოწამლავს თხილის თუ მანდარინის პლანტაციას, ამის გაგება ვიღაცას არ სურს. გეუბნებით, სული ხდება მოსახლეობას გაჭირვებით. მე, პირადად, ციტრუსის მოვლა-მოკრეფა მთლიანი შემოსავლის მიხედვით, კილოგრამზე ორმოცი თეთრი მიჯდება. რაღა დამრჩა? კარგი, ვისაც დამხმარე სახლში ჰყავს, ცოტა უფრო ნაკლები დაუჯდება, მაგრამ ეს არ არის შეღავათი. აუცილებელია ციტრუსზე ფასის მომატება. ეს კი შეიძლება თბილისის ბაზრის დაცვით. მთელი თბილისი თურქული ციტრუსოვანებით არის სავსე. მილიონობით პროდუქციას ვუსაღებთ, ეს მანდარინი მაინც დაგვითმონ. თხილზე ვინმე დაგვეხმარა? აქ რომ სამი ლარი ღირდა ერთი კილოგრამი და თურქეთში თორმეტი, ვინმემ შეუშვა იქ ჩვენი გლეხი და გააყიდვინა? გთხოვთ, მთავრობამდე მიიტანოთ ჩვენი თხოვნა, გაგვითავისუფლეთ თბილისის ბაზარი თურქული ციტრუსოვანებისგან. საქართველო ერთადერთი ქვეყანაა მსოფლიოში, სადაც ხალხი მუშაობს, მშრომელზე მაქვს საუბარი და არაფერი რჩება, _ მიმართა მაგული ჯინჭარაძემ მინისტრის მოადგილეს.
მინისტრის მოადგილემ თავისებური ახსნა მოუძებნა ამ ფაქტს და პასუხად უთხრა, რომ არ შეიძლება ვიმსჯელოთ ისე, რომ თურქეთი არ შემოვუშვათ.
_ ჩაკეტილი რომ ვიყავით, პური რომ ტალონებზე იყო, ის იყო ძალიან ცუდი პერიოდი, _ თქვა მან. თუმცა, როგორც მინისტრის მოადგილეს მაგული ჯინჭარაძემ მიმართა, ის თურქეთის გაძევებას კი არ ითხოვდა ბაზრიდან, არამედ ქართული ციტრუსოვანებისთვისაც ითხოვდა ადგილს.
გელა ხანიშვილს კითხვებით „ გურია ნიუსმა“ მიმართა. ხანაშვილის განმარტებით, ერთი ჰა თხილის ფართობის შესაწამლად წელიწადში პესტიციდებისთვის ასორმოცდაათი ლარია საჭირო. როცა ვუთხარით, რომ ეს არანაირად არ არის საკმარისი თანხა, მაშ რამდენიო, ჩაგვეძია და თან კითხვა დასვა _ ვის აქვს ერთი ჰექტარი თხილი გურიაში?
_მე მაქვს და ჩემს მეზობლებს, _ ვუპასუხე.
როგორც ჩანს, მინისტრის მოადგილე ფიქრობს, რომ მცირემიწიან გურიაში მოსახლეობის ძირითად ნაწილს მიწის მცირე ფართობზე აქვს თხილი გაშენებული.
ვრცელ სტატიას მინისტრის მოადგილის ოზურგეთში სტუმრობის შესახებ „გურია ნიუსის“ უახლოეს ნომერში შემოგთავაზებთ.
