reuters– ის ინფორმაციით, მეცნიერები ამბობენ, რომ ცენტრალურ ევროპაში მოსული ძლიერი ნალექი, რამაც არაერთ ქვეყანას მიაყენა ზარალი, კლიმატის ცვლილებით იყო განპირობებული.
როგორც ცნობილია, ბოლო ორი ათწლეულის განმავლობაში ცენტრალურ ევროპაში მომხდარ ყველაზე ძლიერ წყალდიდობას 24 ადამიანი ემსხვერპლა, ქალაქები ტალახით და ნამსხვრევებით იყო მოფენილი, დაზიანდა შენობები, ჩამოინგრა ხიდები და მიყენებული ზარალი მილიარდ დოლარს შეადგენს.
World Weather Attribution-ის, მეცნიერთა საერთაშორისო ჯგუფის მოხსენებამ, რომელიც სწავლობს კლიმატის ცვლილების გავლენას ექსტრემალურ ამინდზე, დაადგინა, რომ ქარიშხალი ბორისის მიერ მოტანილი წვიმის ოთხი დღე იყო ყველაზე ძლიერი, რაც კი ოდესმე დაფიქსირებულა ცენტრალურ ევროპაში.
მოხსენებაში ნათქვამია ისიც, რომ კლიმატის ცვლილებამ ასეთი წვიმების ალბათობა მინიმუმ ორჯერ და 7%-ით გააძლიერა.
„კიდევ ერთხელ, ეს წყალდიდობები ხაზს უსვამს წიაღისეული საწვავით გამოწვეული დათბობის დამანგრეველ შედეგებს. სანამ ნავთობი, გაზი და ქვანახშირი არ შეიცვლება განახლებადი ენერგიით, ბორისის მსგავსი ქარიშხალი კიდევ უფრო ძლიერ ნალექს გამოიწვევს, რაც ეკონომიკისთვის დამღუპველი იქნება”,_ განაცხადა ჯოის კიმუტაიმ, ლონდონის იმპერიული კოლეჯის გრანტჰემის ინსტიტუტის მკვლევარმა და კვლევის თანაავტორმა.
თუმცა, ნათქვამია, რომ ასეთი შტორმები გამოიწვევს მინიმუმ 5%-ით მეტ წვიმას და დაახლოებით 50%-ით უფრო ხშირად მოხდება, ვიდრე ახლა, თუ დათბობა პრეინდუსტრიული დონეებიდან 2 გრადუსს მიაღწევს, რაც მოსალოდნელია 2050-იან წლებში.
