“საერთო ძალისხმევით ჩვენ დავამარცხეთ ამ ვერაგ და ძალზე საშიშ მტერს _ აზიურ ფაროსანას! გავიხსენოთ ჩვენი ქვეყნის დევიზი _ ძალა ერთობაშია! დღეს არა მხოლოდ დევიზის გახსენების, არამედ ამ დევიზის მიხედვით მოქმედების დროა”, _ ამბობს “გურია ნიუსთან” საუბრისას გარემოს დაცვისა და სოფლის მეურნეობის მინისტრი ლევან დავითაშვილი.
ლევან დავითაშვილის თქმით “ფაროსანას განადგურება უნდა გახდეს თითოეული მოქალაქის ყოველდღიური საზრუნავი”:
_ ფაროსანას სრული აღმოფხვრა დღეისთვის შეუძლებელია, შესაძლებელია მხოლოდ მისი პოპულაციის და, შესაბამისად, გავრცელების არეალის შემცირება. ამ მწერს არ გააჩნია ბუნებრივი მტერი და აქვს მაღალი რეპროდუქციის და სწრაფად და ინტენსიურად გავრცელების უნარი.
ფაროსანა საფრთხეს წარმოადგენს მარცვლოვანი, კურკოვანი, სათესლე და ა. შ. კულტურებისთვის და ინვაზიის პირობებში შეუძლია გაანადგუროს მოსავლის 90%.
სამწუხაროდ, შარშან აზიურმა ფაროსანამ მასშტაბურად დააზიანა თხილის მოსავალი საქართველოში და წელს ყველაფერი უნდა გავაკეთოთ ზიანის შესამცირებლად. შარშან შეიწამლა და დამუშავდა 110 000 ჰექტარი ფართობი, შევიძინეთ და დავარიგეთ შესაწამლი პრეპარატები, ფერომონის ხაფანგები. ფერმერებს ჩაუტარდათ ტრენინგები და მერწმუნეთ, რომ არა სახელმწიფოს დროული ძალისხმევა, წელს სავალალო მდგომარეობა იქნებოდა სოფლის მეურნეობის უკლებლივ ყველა სეგმენტში, _ ამბობს დავითაშვილი.
_ ბატონო ლევან, ამბობთ, რომ ფაროსანას საფრთხე მასშტაბურია. ხომ არ ფიქრობთ, რომ სამინისტრომ ფართო საინფორმაციო კამპანია უნდა ჩაატაროს და ეს ყველაფერი მოსახლეობას კარგად აუხსნას?
_ ჩვენ შარშან ჩავატარეთ, ჩემი აზრით, წარმატებული საინფორმაციო კამპანია და ამ კამპანიის შედეგად ქვეყნის მოსახლეობამ მოახდინა აზიური ფაროსანას იდენტიფიკაცია, როგორ საშიში მწერის. თუმცა, გეთანხმებით, რომ წელს ჩვენს წინაშე დგას სტრატეგიული ამოცანა _ ეს არის მოსახლეობის განწყობის შეცვლა, რომელიც უნდა გადავიდეს პრაქტიკულ ჩვევაში ფაროსანას წინააღმდეგ ბრძოლაში. ფაროსანას განადგურება უნდა გახდეს თითოეული მოქალაქის ყოველდღიური საზრუნავი, ერთგვარი რუტინა. ამის გარეშე ფაროსანასთან ეფექტიანი ბრძოლა შეუძლებელია. წელს ჩვენ ვიწყებთ მასშტაბურ კამპანიად, მათ შორის, საინფორმაციოსაც! საერთო ძალისხმევით ჩვენ დავამარცხებთ ამ ვერაგ და ძალზედ საშიშ მტერს _ აზიურ ფაროსანას! გავიხსენოთ ჩვენი ქვეყნის დევიზი _ ძალა ერთობაშია! დღეს მხოლოდ დევიზის გახსენების, არამედ ამ დევიზის მიხედვით მოქმედების დროა.
_ ფაროსანასთან ბრძოლის ეფექტიანობის თვალსაზრისით, თქვენი აზრით, ყველაზე მნიშვნელოვანი რა არის?
_ მთავარი ამოცანა არის პრობლემის გათავისება, რისკის გაცნობიერება, ფერმერებში და მთლიანად მოსახლეობაში იმ განცდის და განწყობის ჩამოყალიბება, რომ აზიური ფაროსანას მიერ მოყენებული პოტენციური ზარალის მინიმიზაცია გამორიცხულია საერთო სამოქალაქო კონსოლიდაციის და აქტიური, ერთობლივი მოქმედების გარეშე. მხოლოდ ჩვენი _ სახელმწიფოს, ფერმერების, სოფლად და ქალაქში მცხოვრები მოსახლეობის ძალისხმევის შედეგად ჩვენ შევძლებთ ზიანის შემცირებას!
_ ბატონო ლევან, განცხადებები, ბროშურები, ინფორმაცია კარგია, მაგრამ ამ ეტაპისთვის არც თუ სახარბიელო მდგომარეობა გვაქვს _ უკვე დათბა და მწერიც გამოჩნდა. მოსახლეობის დიდი ნაწილი ფიქრობს, რომ გამოსავალი არ არის…
_ გამოსავალი არის და ეს უკვე ვთქვი _ ერთად უნდა ვებრძოლოთ მავნებელს. მინდა გითხრათ, რომ ჩვენთან ერთად მუშაობენ მსოფლიოში ყველაზე ავტორიტეტული მეცნიერები და ექსპერტები ენტომოლოგიის დარგში! ჩვენ შევიძინეთ დღეისთვის ყველაზე ეფექტური და აქტუალური პრეპარატები და ტექნოლოგიები, რომელთა გამოყენებით და სწორად მოხმარების შედეგად, ჩვენ მნიშვნელოვან დარტყმას მივაყენებთ ფაროსანას. ჩვენ შევიძინეთ თანამედროვე ტექნიკა, რომელიც ასევე გაგვიადვილებს ფრონტალურ შეტევას. და მთავარი _ დარწმუნებულები ვართ, რომ უკლებლივ ყველა სოციალური ფენის კონსოლიდაციის, დარაზმვის და მობილიზაციის შედეგად შევინარჩუნებთ მოსავალსაც და განვითარების პერსპექტივას! _ ამბობს მინისტრი “გურია ნიუსთან” საუბრისას.
ლევან დავითაშვილის თქმით, აზიური ფაროსანა არ კბენს ადამიანს, შინაურ ცხოველებს და არ გადააქვს ადამიანთა და ცხოველთა დაავადებები:
_ შესაძლებელია ზოგიერთი ადამიანი იყოს ალერგიული და/ან მგრძნობიარე “სუნიანი ხოჭოს” მიერ გამოყოფილი ნივთიერების მიმართ, თუმცა, ეს არაა სიცოცხლისთვის სახიფათო, _ აღნიშნავს ლევან დავითაშვილი.
მინისტრი მოსახლეობას ურჩევს, რომ აზიური ფაროსანას მიერ გამოწვეული ზიანის შესამცირებლად, გაითვალისწინონ და განახორციელონ გარემოს დაცვისა და სოფლის მეურნეობის სამინისტროსა და საქართველოს შრომის, ჯანმრთელ ობისა და სოციალური დაცვის სამინისტროს მიერ მოწოდებული რეკომენდაციები:
_ თუ თქვენ, თქვენი საცხოვრისის გარშემო მექანიკური ან სხვა საშუალებებით შეძლებთ შეამციროთ აზიური ფაროსანას რიცხოვნობა _ შემოდგომაზე ნაკლებ შემაწუხებელი იქნება მათი შემოჭრა სახლებში. გაითვალისწინეთ, რომ შემოდგომაზე აზიური ფაროსანა იწყებს გამოსაზამთრებელი ადგილის ძებნას.
ასეთი ადგილი შეიძლება იყოს საცხოვრებელი სახლები, ცხოველთა სადგომები და ყველა ის შენობა, სადაც მშრალი და თბილი გარემოა, განსაკუთრებით მიტოვებული შენობები. თქვენს საცხოვრისში აზიური ფაროსანას შემოჭრის თავიდან აცილება შეიძლება ე. წ. სინათლის ხაფანგებით, ხოლო შემოჭრის შემთხვევაში, იდეალურია მათი მექანიკური განადგურება. ფაროსანას მექანიკური განადგურება შესაძლებელია ფრთხილად დაჭერით და მათი საპნიან ხსნარში ჩაყრით. ფაროსანების მისატყუებლად და შესაგროვებლად შესაძლებელია 2-4-ნახვრეტიანი და კარგად შეკრული მუყაოს ყუთების განთავსება შენობების აივნებზე ან შენობებთან ახლოს დასველებისგან დაცულ ადგილებზე; ფაროსანას განადგურება შენობებში შესაძლებელია იმ სადეზინფექციო საშუალებებითაც, რომელთა გამოყენება საფრთხეს არ შეუქმნის ადამიანთა ჯანმრთელობას; სადეზინფექციო სამუშაოები უნდა ჩატარდეს ბავშვების შენობებში არყოფნის პერიოდში; სამუშაოების დასრულების შემდეგ მოხდეს დამუშავებული ობიექტის დალაგება, გამოყენებული პრეპარატის ინსტრუქციის გათვალისწინებით, _ აღნიშნავს მინისტრი.
ლევან დავითაშვილის თქმით, წელს აზიური ფაროსანას კონტროლის ღონისძიებების პროგრამის ფარგლებში დამუშავდება როგორც სახელმწიფო, ასევე კერძო საკუთრებაში არსებული ინვაზიის მაღალი რისკის მქონე ტერიტორიები:
_ გამოყენებული იქნება ბიფეტრინის შემცველი ინსექტიციდები; ზეთოვანი ინსექტიციდები (თერმული ნისლის ტექნოლოგია); ფერომონიანი სატყუარები _ “მოიზიდე და მოკალი”, ქიმიური დამუშავებისთვის გამოყენებული იქნება სამანქანო-სატრაქტორო შემასხურებელი საშუალებები, საჭიროების შემთხვევაში _ დაუსახლებელ ტერიტორიებზე სპეციალიზირებული ტექნიკა და მსუბუქი საავიაციო ტექნიკა შესაბამისი გარემოს დაცვითი ნორმებისა და უსაფრთხოების ზომების დაცვით. გარდა ამისა, აზიური ფაროსანას წინააღმდეგ ბრძოლის ყველა ეტაპზე გარემოს დაცვისა და სოფლის მეურნეობის სამეცნიერო-კვლევითი ცენტრთან ერთად სრულად იქნება ჩართული საქართველოს სამეცნიერო-აკადემიური წრეები. სამეცნიერო-კვლევით საქმიანობაში ქართველ მეცნიერებთან ერთად, ჩართულები იქნებიან უცხოელი სპეციალისტები და საერთაშორისო ორგანიზაციები. მკვლევართა ჯგუფი შეისწავლის საქართველოში აზიური ფაროსანას ბიოლოგიასა და რიცხოვნობის დინამიკას. შეიქმნება მონაცემთა ბაზა და ციფრული რუკები მწერის გავრცელების შესახებ, რომლითაც მოხდება მისი გადაადგილებისა და ქცევის მონიტორინგი; შემუშავდება მავნებელთან დაკავშირებული სხვა კვლევითი აქტივობები, მათ შორის: ბიოანტაგონისტებისა და ბიოლოგიური მტრების გამოვლენა, მცენარეთა დაცვის საშუალებების ეფექტიანობის შესწავლა.
გარდა ამისა, სახელმწიფო უზრუნველყოფს მეცნიერების მივლინებას უცხოეთში საერთაშორისო თეორიული და პრაქტიკული ცოდნისა და გამოცდილების მიღების მიზნით, მათ შორის ხელს შეუწყობს ახალგაზრდა მეცნიერების უცხოეთში გადამზადებას; ადგილობრივი ცოდნის გაზიარებას მიზნით მოეწყობა სხვადასხვა ღონისძიებები კონფერენციები, შეხვედრები, სემინარები და სხვა ღონისძიებები, _ აღნიშნა ლევან დავითაშვილმა.
გარემოს დაცვისა და სოფლის მეურნეობის მინისტრის თქმით, ამ თემასთან დაკავშირებით შეხვედრა მალე გურიაშიც გაიმართება, სადაც მოსახლეობას ყველა საჭირო ინფორმაციას მიაწვდიან.
ერთ-ერთი შეხვედრა “ივლიტას ბიბლიოთეკაშიც” გაიმართება, სადაც მინისტრი პირადად უპასუხებს დაინტერესებული ადამიანების კითხვებს.
