ბათუმის კერძო სკოლის “ნიკეას“ მეოთხეკლასელებმა ანა კალანდაძის შემოქმედებითი საღამო გამართეს. სკოლის ადმინისტრაციის მოწვევით, ღონისძიებაზე პოეტის ძმისშვილი ვახტანგ კალანდაძე და მისი მეუღლე ლარისა მანჯავიძე იმყოფებოდნენ.
საღამო მოკრძალებული იყო. ბავშვებმა ორიგინალურად წარმოაჩინეს პოეტის შემოქმედება. შესრულდა ანა კალანდაძის ლექსებზე დაწერილი სიმღერები, ასევე, იყო ხალხური ცეკვებიც.
სკოლის მოსწავლეებმა აღნიშნეს, რომ ისინი იმყოფებოდნენ ანა კალანდაძის სახლში. თქვეს, რომ სახლის სახურავის შეკეთებაში მონაწილეობისთვის მცირედი თანხაც შეაგროვეს.
“ჩვენ ვიყავით ხიდისთავში, პოეტის სახლში, რომლის სახურავი დაზიანებულია. გვინდა, მალე შეკეთდეს სახურავი. ჩვენ იქ დავტოვეთ პოეტის ჩვენ მიერ შექმნილი პორტრეტი. იმედია, სახურავიდან ჩამოსული წვიმა არ დააზიანებს“, _ თქვეს ღონისძიებაზე ბავშვებმა.
ღონისძიების დასასრულს ლარისა მანჯავიძემ აღნიშნა, რომ საღამო ისეთივე მოკრძალებული იყო, როგორიც იყო თავად ანა კალანდაძე.
„ახლა ანა ცოცხალია, რადგან მისი შემოქმედებითი საღამო შედგა. ის მანამ იქნება ცოცხალი, სანამ ასეთი საღამოები გაიმართება და მის ლექსებს საჯაროდ წაიკითხავენ. ანას შვილი არ ჰყავდა, მაგრამ მისი შვილები მის მიერ დაწერილი ლექსები იყო“, _ ლარისა მანჯავიძემ.
მადლობის სიტყვები არ დაიშურა სკოლის დირექციის და მოსწავლეების მიმართ ვახტანგ კალანდაძემ.
“ჩემთვის ეს საღამო იყო ემოციურია და მადლობის მეტი რა მეთქმის _ მადლობა ანას დაფასებისთვის“, _ აღნიშნა პოეტის ძმისშვილმა.
ბათუმის შოთა რუსთაველის სახელმწიფო უნივერსიტეტის განათლების ფაკულტეტის პროფესორმა ლელა თავდგირიძემ აღნიშნა, რომ მსგავსი ღონისძიებები ხშირად უნდა იმართებოდეს.
შეხვედრის ბოლოს, ასევე, სიტყვით გამოვიდა ნანა მამულაძე, ბათუმის შოთა რუსთაველის სახელმწიფო უნივერსიტეტის განათლების ფაკულტეტის პროფესორი.
“მადლობას გიხდით დღევანდელი ინტელექტუალური, სანახაობრივი და აღმზრდელობითი ღონისძიების მომზადებისთვის. მინდა ვთქვა, რომ, როდესაც ჩვენ გარშემო, სკოლებში მომძლავრდა ძალადობის ფაქტები, თუ მსგავსი ტიპის ღონისძიებებით გაძლიერდება, დარწმუნებული ვარ, ჩვენ გადავრჩებით და საუკეთესო თაობას გავუზრდით ქვეყანას“, _ თქვა ნანა მამულაძემ.
ნანა კვაჭაძე, ბათუმის საჯარო ბიბლიოთეკის მთავარი ბიბლიოთეკარი: “ქართული პოეზიის დედოფლის, ანა კალანდაძისადმი მიძღვნილი საღამო ჩემთვის ყოველთვის ზეიმია. მადლობა ღონისძიებაში მონაწილე ყველა ბავშვს, რადგან ბრწყინვალედ წარმოაჩინეს ანას შემოქმედება.
სკოლის ქართული ენისა და ლიტერატურის მასწავლებლის თინა ჭეიშვილის თქმით, სანამ დაიწყებდნენ პროექტზე მუშაობას, მათ ნახეს სიუჟეტი, სადაც ქალბატონი ლარისა ჰყვებოდა იმ პრობლემების შესახებ, რაც აუცილებლად მოსაგვარებელია.
პოეზიის საღამოზე გამოთქვეს იმედი, რომ ხიდისთავში შემდეგი სტუმრობისას სახლის სახურავი _ შეკეთებული და ანას მუზეუმი გახსნილი დახვდებათ.
