რეგიონებში კორონავირუსზე ვაქცინაცია დაბალი ტემპით მიდის. ამის შესახებ ჯანდაცვის სამინისტროში აცხადებენ და როგორც ცნობილია, ჯანდაცვის მინისტრი პირადად აპირებს ვაქცინაციის პროცესს გურიასა და სხვა რეგიონებში პირადად გაეცნოს.
ჩოხატაურში ამ დროისთვის კორონავირუსზე 20 ექიმია აცრილი. ვაქცინაციის პროცესი, რომელიც 17 მარტს დაიწყო 2 დღეში დასრულდა, მიზეზად ჯერ ასაცრელების არასათანადო რაოდენობა დასახელდა, შემდეგ კი პროცესი საერთოდ შეწყდა და ჩოხატაურის „მედალფადან“ „ასტრაზენეკას“ 198 ფლაკონი დაავადებათა კონტროლის ცენტრმა უკან წაიღო.
საზოგადოებაში ვაქცინის მიმართ უნდობლობის გაჩენას ხელი 27 წლის ახალციხელი ექთანის დაღუპვამაც შეუწყო.
„გურია ნიუსი“ დაინტერესდა, აპირებენ თუ არა ჩოხატაურელი ექიმები კორონავირუსზე ვაქცინის გაკეთებას,_ ამის გასარკვევად კლინიკა „მედალფას“ ვესტუმრეთ.
77 წლის ქირურგი, ცისანა გოგოლაძე გვეუბნება, რომ ვაქცინის გაკეთება ერთ-ერთ პირველს სურდა, მაგრამ ჯანმრთელობის მდგომარეობამ ხელი არ შეუწყო.
„მედპერსონალიდან ერთ-ერთი პირველი მე უნდა ვყოფილიყავი, ვინც ვაქცინას გაიკეთებდა, მაგრამ თავი შევიკავე. გულთან დაკავშირებული პრობლემების გამო საავადმყოფოში ვიწექი, ერთი კვირაა, რაც გამწერეს. ვაქცინის გაკეთებით ვიცავთ ჩვენ თავს და სხვასაც. ვაქცინის გაკეთება ისეთივე აუცილებელია, როგორც, მაგალითად, ბავშვის წითელაზე აცრა. სავარაუდოდ, აცრას ქუთაისში გავიკეთებ. „ფაიზერით“ ავიცრები თუ „ასტრაზენაკათი“ ჩემთვის სულერთია. გართულება ყველა წამალს აქვს. დაზღვეული ადამიანი არაფრისგან არ არის. ალერგიული რეაქცია ნებისმიერმა წამალმა შეიძლება მისცეს“,_ ამბობს ქირურგი გოგოლაძე.
თერაპევტის, კოვიდგანყოფილების კოორდინატორის, ლევან მეგრელიშვილის თქმით, ვაქცინის გაკეთებას აპირებს, მაგრამ ამისთვის კორონავირუსის გადატანიდან საჭირო დრო უნდა გავიდეს.
„აუცილებლად უნდა ავიცრა, იმიტომ რომ პანდემიასთან ბრძოლის და დამარცხების ერთადერთი საშუალება არის ვაქცინა. ვაქცინაციის დროს გამოწვეული ალერგიული რეაქციები მინიმალურია და სარგებელი ვაქცინის დიდია. პირდად გადავიტანე კოვიდ- 19. ვირუსი მძიმე ფორმით არ მქონდა, მაგრამ გართულების ძალიან დიდი საფრთხე არსებობდა. ინფიცირების წყარო უცნობია. იმდენად მძიმე დაავადებაა, რომ მსოფლიომ მისი მკურნალობის სქემა ვერ შექმნა, ამიტომ ვირუსის მოსპობა მხოლოდ ვაქცინით შეიძლება. ან „ასტრაზენეკათი“ ავიცრები ან „ფაიზერით“,_ გვითხრა მეგრელიშვილმა.
თერაპევტი, ენდოკრინოლოგი თამთა დოლიძე კი იმ ექიმთა სიაშია, ვინც კორონავირუსზე ვაქცინა უკვე გაიკეთა.
დოლიძე გვეუბნება, რომ ინექციის შემდეგ არანაირი გართულება არ ჰქონია, მხოლოდ ნანემსარი ადგილი სტკიოდა, როგორს ეს სხვა ინექციის გაკეთების შემთხვევაში ხდება.
კითხვაზე, რატომ მიიღო ვაქცინის გაკეთების გადაწყვეტილება, მაშინ როცა მისი ეფექტურობის საკითხი ბევრ ქვეყანაში კითხვის ნიშნის ქვეშ იდგა,- დოლიძე გვპასუხობს:
„პირადად მე არანაირი გართულება აცრის შემდგომ პერიოდში არ მქონია. ჩვეულებრივად, ადგილობრივად ნანემსარი მტკიოდა. სხვადასხვა ქვეყანაში მედპერსონალის აცრებთან დაკავშირებით მოვიძიეთ ინფორმაცია. გვქონდა საუბარი ამ ხალხთან ვინც სხვა ქვეყნებში გაიკეთა ვაქცინა. მივიჩნიე საჭიროდ, რომ ის რისკები რაც ახასიათებს ამ ვირუსს გადაწონიდა ამ აცრით მოყენებულ საფრთხეს. ამიტომ გადავწყვიტე რომ გამეკეთებინა. ავიცერი იმიტომ რომ არ ყოფილიყო ჩემი ჯანმრთელობა რისკის ქვეშ და არც ის ხალხი ჩამეგდო რისკის ქვეშ, ვისთანაც შეხება მაქვს. მე არ ვყოფილიყავი ინფიცირების გავრცელების წყარო, მითუმეტეს რომ კოვიდინფიცირებულ ხალხთან შეხება მაქვს. ადამიანმა თავად უნდა გადაწყვიტოს და შეაფასოს რისკები არა მხოლოდ საკუთარი თავიდან გამომდინარე, არამედ ელემენტარულად ოჯახის წევრებთან არ ჰქონდეს მაღალი რისკი, რომ ინფიცირებას მიუტანს. ვაქცინის გაკეთებამდე არანაირი კვლევა არ ჩამიტარებია. თავს ვგრძნობდი ჯანმრთელად“.
მეან-გინეკოლოგი სალომე თურმანიძე ამბობს, რომ ისიც იმათ რიცხვს მიეკუთვნება, ვინც კორონავირუსი გადაიტანა. შესაბამისად ვაქცინის გასაკეთებლად საჭირო დროის მოსვლას ელოდება, მაგრამ რომელ ვაქცინას გაიკეთებს, ჯერ გადაწყვეტილი არ აქვს.
„გადატანილი მაქვს კორონავირუსი. 120 დღიანი ვადა, რაც ვაქცინის გასაკეთებლად კორონავირუსის გადატანის შემდეგ აუცილებელია, თვის ბოლოს გადის და ვაპირებ ვაქცინის გაკეთებას. არ მაქვს გადაწყვეტილი რომელ ვაქცინას გავიკეთებ“,_ გვეუბენა თურმანიძე.
კითხვაზე, იცის თუ არა ინფიცირების წყაროს შესახებ და რა ფორმით გადაიტანა კორონავირუსი, მეან-გინეკოლოგი გვპასუხობს:
„ზუსტად არ ვიცი ვინ იყო ჩემი ინფიცირების წყარო. ვერ ვიტყვი რომ კლინიკაში დავინფიცირდი. მსუბუქად გადავიტანე. ტემპერატურა მქონდა რამდენიმე დღე 37.2 და სისუსტის შეგრძნება მქონდა, როგორც გრიპის დროს“.
ნევროლოგი ელისო სიხარულიძე კი გვეუბნება, რომ ვაქცინის გასაკეთებლად მზად არის და ამას თუნდაც გარდაცვლილი მეგის სულის პატივსაცემად აპირებს.
„მარტო გარდაცვლილი მეგის სულისთვის ავიცრები. ჩემი კოლეგები „ასტრაზენეკათი“ აიცრნენ და მეც მაგით ავიცრები. არჩევანის უფლება გვაქვს. „ფაიზერის“ ვაქცინა ჩამოსულია და ვისაც უნდა ამით აიცრება. ყველა ექიმი, სამედიცინო სფეროს ყველა თანამშრომელი უნდა აიცრას, ეს არის აქსიომა.“,_ გვითხრა ელისო სიხარულიძემ.
“გურია ნიუსი” კლინიკა „ჯანმრთელობის სახლი გურიაში“ მთავარ ექიმს, თემურ კოროშინაძეს ტელეფონით დაუკავშირდა. ბატონი თემურის თქმით, მან უკვე გაიკეთა კორონავირუსზე ვაქცინა. როგორც კლინიკის მთავარმა ექიმმა გვითხრა, ვაქცინაცია ჩაუტარდა, მედპერსონალის გარკვეულ ნაწილს.
კითხვაზე _ აპირებს თუ არა მედპერსონალის დანარჩენი ნაწილი აიცრას კორონავირუსზე, კოროშინაძე გვპასუხობს, რომ ეს ინდივიდუალურია და კონკრეტული ადამიანის გადასაწყვეტია, აიცრება თუ არა.
“მე უკვე გავიკეთე აცრა. დანარჩენი ექიმები და მედპერსონალიც, რა თქმა უნდა, აპირებენ აიცრან. ეს არის ინდივიდუალურად გადასაწყვეტი, პიროვნებამ თავად უნდა მიიღოს გადაწყვეტილება”, _ გვითხრა კოროშინაძემ.
შეგახსენებთ, რომ გურიაში კორონავირუსზე მედპერსონალის ვაქცინაცია 15 მარტს ოზურგეთიდან დაიწყო, 17 მარტს კი ვაქცინაციის პროცესში ჩოხატაური და ლანჩხუთიც ჩაება, თუმცა რამდენიმე დღეში რეგულაცია შეიცვალა და ამჟამად ადგილი, სადაც კორონავირუსზე ვაქცინის გაკეთება შესაძლებელია ოზურგეთის „მედალფაა“.
ცნობისთვის, რეგიონში COVID19-ის საწინააღმდეგო 1100 ,,ასტრა ზენეკას“ ვაქცინა შემოვიდა, რაც შეეხება „ფაიზერს“ მისი შემოტანა გურიაში ამ ეტაპზე როგორც ჩანს არ იგეგემება.
ჯანდაცვის მინისტრის განცხადებით, „ფაიზერით“ აცრა შესაძლებელი მხოლოდ თბილისის 4 კლინიკაში, ასევე ქუთაისში და ბათუმში იქნება შესაძლებელი.
