ქვეყანაში განვითარებულ პოლიტიკურ პროცესებზე ,,გურია ნიუსი“ „ქართული ოცნების“ ყოფილ წევრს, პოლიტოლოგ მამუკა არეშიძეს ესაუბრა.
_ ბატონო მამუკა, საქართველოს პრეზიდენტის მიერ დანიშნული იუსტიციის არამოსამართლე წევრი ანა დოლიძე ამბობს, რომ იუსტიციის საბჭოში კლანური მმართველობაა და იქ განსხვავებული აზრი იდევნება. როგორ აფასებთ საბჭოს საქმიანობას?
_ იუსტიციის საბჭო არის ორგანო, რომელიც სასამართლო სისტემას აკონტროლებს. ჩემი ინფორმაციით, ლევან მურუსიძე და მისი ჯგუფი გავლენას ახდენს საბჭოზე. თავის დროზე, ადეიშვილმა სასამართლო სისტემა მთლიანად დაიქვემდებარა და სწორედ ეს ადამიანები მოქმედებდნენ ერთ ვერტიკალში. იუსტიციის საბჭო არ არის ისეთი ტიპის ორგანო, რომელიც თავისი დებულებიდან გამომდინარე, კონტროლს გაუწევს სასამართლო სისტემას. იქ სხვადასხვა ტიპის შეკვეთებსა თუ დავალებებს ასრულებენ. საბჭოში რომ ჯანსაღი ვითარება არ არის, ყველასთვის ფაქტია.
_ საქართველოში 2017 წლის მონაცემებს თუ დავუჯერებთ, ეკონომიკა, ტურიზმი და ექსპორტი გაიზარდა. აგრეთვე შემცირდა ბიუჯეტის დეფიციტი. როგორ ფიქრობთ, ეს მაჩვენებელი ადამიანის ცხოვრების დონეზე დადებითად აისახა?
_ ეკონომიკური მიმართულებით გარკვეული წარმატებებია, მაგრამ ეს არ აისახება კონკრეტული ადამიანის სოციალურ მდგომარეობაზე. საქართველოში ხორციელდება გარკვეული პროექტები, მაგარამ მოსახლეობის შრომით დასაქმებაზე გავლენას არ ახდენს. რაც მთავარია, საარსებო მინიმუმი გაიზარდა, მაგრამ შემოსავლები შეუმცირდა მოსახლეობას. საგარეო პოლიტიკის თვალსაზრისით, ძალიან სერიოზული გარღვევები გვაქვს, მაგრამ კონფლიქტების თვალსაზრისით _ სტაგნაციაა. ხელისუფლების ყველაზე დიდი მინუსი ინდუსტრიის განუვითარებლობაა. უსაფრთხოების სისტემა ისე რომ არ მუშაობს, როგორც უნდა მუშაობდეს, ფაქტია. არაჯანსაღი ვითარებაა რეგიონებში უსაფრთხოების თვალსაზრისით, მათ შორის გურიაში.
_ რას გულისხმობთ კონკრეტულად?
_ არ მომწონს ის, რაც გურიაში ხდება. ვხედავ, რომ ძლიერდება მესამე ქვეყნის _ თურქეთისა და რადიკალური ისლამის გავლენები. ის, რაც იყო, დავუშვათ, 10 წლის წინ პანკისის ხეობაში, დღეს იგივე სიტუაციაა საქართველოს 5 რეგიონში და მათ შორის, გურიაში. გარდა ამისა, მინდა გითხრათ, რომ ხელისუფლება ვერ ახერხებს საზოგადოებასთან კომუნიკაციის მყარი სისტემის შექმნას და თავისი მიღწევების ხაზგასმას. პრაქტიკულად, მათ შორის ხიდია ჩატეხილი, ამის გამო გაუცხოების ხარისხი საკმაოდ მაღალია.
_ არსებობს აზრი, რომ ,,ქართულ ოცნებაში“ ე. წ. კლანური მმართველობაა, ანუ გუნდში არსებობენ ისეთი ადამიანები, რომლებიც ზედმეტი პრივილეგიებით სარგებლობენ. როგორ ფიქრობთ, გუნდში ერთეულები ქმნიან დღის წესრიგს?
_ ძალთა გადანაწილება და კლანური მმართველობა რომ არსებობს არ ეტყობა დღევანდელ პარლამენტს? არსებობენ პრივილეგირებული პირები. როცა ადამიანები, იღებენ წარმოუდგენელი რაოდენობის სარგოსა და დანამატებს, ამ შემთხევაში არ ვსაუბრობ მხოლოდ პარლამენტარებზე, ნათელი ხდება, რომ საზოგადოების აზრი მათ საერთოდ არ აინტერესებთ. ყველა ჩინოვნიკი ასეთი არ არის, მაგრამ არსებობს 20-25% ჩინოვნიკებისა, რომლებიც თვლიან, რომ ასე უნდა მოიქცნენ.
_ 2012 წელს თქვენ ,,ქართული ოცნების“ წევრი იყავით და ამავე პერიოდში წარდგენლი იყავით გარდაბანში მაჟორიტარად. მიუხედავად იმისა, რომ არჩევნებში დამარცხდით რატომ დატოვეთ პარტია?
_ მე იმ დაპირებებს ვიძლეოდი, რომლებიც, ჩემი აზრით, უნდა შესრულებულიყო. როცა დავინახე, რომ ეს დაპირებები არ სრულდებოდა წამოვედი პარტიიდან. ჩემი მთავარი დაპირება იყო, რომ გარდაბნის რაიონი განთავისუფლდებოდა მიხეილ სააკაშვილის გუნდის გავლენებისგან, რაც არ შესრულდა. ვინც მე გამიყალბა არჩევნები დღეს ის გარდაბნის მერია. ადამიანები, რომლებიც წინა რეჟიმის მსახურები იყვნენ და ხალხს ავიწროებდნენ გაგიკვირდებათ და დღეს კოჰაბიტაციის საუკეთესო ნიმუშს წარმოადგენენ ქვემო ქართლში. ადამიანები, რომლებიც ,,ნაციონალური მოძრაობის“ დროს არ უშინდებოდნენ ზეწოლასა და ხელისუფლების მუქარას ,,ქართული ოცნების“ ხელისუფლების მიღმა დარჩნენ. მინდა გითხრათ, რომ დღეს გარდაბნის მაჟორიტარი ,,ქართული ოცნებიდან“ სავალან მირზოევია. ადამიანი, რომელიც ადრე ,,ნაციონალური მოძრაობის“ წევრი იყო.
მმართველი გუნდის წევრი რევაზ არველაძე პოლიტოლოგის მიერ გამოთქმულ მოსაზრებას უსაფუძვლოს უწოდებს და დასძენს, რომ საქართველოში ეკონომიკის ზრდამ ადამიანების ცხოვრების დონეზე პოზიტიური გავლენა მოახდინა.
,,ტურიზმი და ეკონომიკა რომ ვითარდება, რა თქმა უნდა, ადამიანის ცხოვრების დონეზე დადებითად ისახება. როდესაც ვლაპარაკობთ, რომ ტურისტთა რაოდენობა ერთი მილიონით გაიზარდა, ცხადია, ეს ყველაფერი დადებითი შედეგის მომტანია. ბუნებრივია, ეკონომიკური ზრდა ყველა ადამიანზე ვერ აისახებოდა, მაგრამ ადამიანების გარკვეულ ნაწილზე ხომ მოახდინა გავლენა. ერთი რამე მინდა გითხრათ, ყველა კრიტიკაზეა გადასული. ხომ შეიძლება ხელისუფლების ასეთი პათეტიკური სიტყვებით ლანძღვის მაგივრად ადამიანს წინადადება შესთავაზო და უთხრა, რომ ასე გავაკეთოთ უკეთესი იქნებაო“, _ განაცხადა მმართველი გუნდის წევრმა.
არველაძე ,,ნაციონალურ მოძრაობასთან“ შემრიგებლურ დამოკიდებულებას არარეალურს უწოდებს. მისი თქმით, ყოველთვის წინააღმდეგი იყო წინა ხელისუფლებასთან კოჰაბიტაციის.
,,მე არაერთხელ ვთქვი, რომ არავითარი კოჰაბიტაცია არ უნდა შემდგარიყო წინა ხელისუფლებასთან. დამნაშავე უნდა დასჯილიყო. ვინც იყო მოსაცილებელი, ის უნდა მოგვეცილებინა. ოპოციზია ყველაფერს აკეთებს რომ ქვეყნის განვითარებას ხელი შეუშალოს. ახლა არ არის სახარბიელო სიტუაცია ჩვენი ქვეყნის გარშემო, თუმცა, მოვლენები ნადვილად პოზიტიურად ვითარდება“, _ გვითხრა არველაძემ.
რაც შეეხება იუსტიციის საბჭოში განვითარებულ მოვლენებს, მმართველი გუნდის წევრი ზედმეტი განცხადებების გაკეთებისგან თავს იკავებს.
,,მე ნამდვილად ვერ გეტყვით, რა ხდება იუსტიციის უმაღლეს საბჭოში. შესაბამისმა ორგანოებმა უნდა განიხილონ, არიან თუ არა იქ ისეთი ადამიანები, რომლებიც ე.წ. დავალებებს ასრულებენ“, _ გვითხრა მმართველი გუნდის წარმომადგენელმა.
