მართალია, ჩოხატაურში, დაბის სასაფლაოს ჭიშკარიც აქვს და ღობეც, თუმცა, მცხოვრებლები ამბობენ, რომ პირუტყვი სასაფლაოზე ხშირად შედის.
“პირუტყვი შედის სასაფლაოზე. არ ვიცი, სასაფლაოს კარს ტოვებენ ღიას თუ ღობიდან გადმოდის, მაგრამ რამდენჯერაც მოვედი, იმდენჯერ ხან ძროხა დამხვდა, ხან _ ღორი. მეშინია, საფლავი არ დააზიანონ”, _ გვითხრა ერთ-ერთმა ქალბატონმა.
“გურია ნიუსის” გადამღები ჯგუფი დაბის სასაფლაოზე იმყოფებოდა, თუმცა, ტერიტორიაზე პირუტყვი ვერ დავაფიქსირეთ. აღმოჩნდა, რომ მსგავსი ინფორმაცია არც იმ ადამიანების ნაწილს აქვს, ვინც სასაფლაოზე დადის.
“არ ვიცი არაფერი, არც ფაქტს წავსწრებივარ”, _ გვითხრა სასაფლაოზე მყოფმა მამაკაცმა.
მართალია, მოქალაქეების ნაწილმა შემთხვევის შესახებ, როგორც აღმოჩნდა, არაფერი იცის, მაგრამ სასაფლაოზე პირუტყვის შესვლის ფაქტს “გურია ნიუსთან” საუბრისას ჩოხატაურის მერის წარმომადგენელი დაბის ტერიტორიულ ერთეულში, გოჩა ჯინჭარაძე ადასტურებს.
ჯინჭარაძე ამბობს, რომ სავარაუდოდ, მოქალაქეები ჭიშკარს ტოვებენ ღია და პირუტყვი სასაფლაოზე ამიტომ შედის.
“მოქალაქეები, ალბათ, ჭიშკარს ტოვებენ ღიად და ამიტომ შედის პირუტყვი”, _ გვითხრა ჯინჭარაძემ.
ჯინჭარაძესთან საუბრის შემდეგ ჩოხატაურის მუნიციპალიტეტის მერს, ირაკლი კუჭავას დავუკავშირდით. როგორც აღმოჩნდა, მერსაც მისი წარმომადგენლის მსგავსი პოზიცია აქვს _ მისი თქმით, იმისთვის, რომ პირუტყვი არ შევიდეს სასაფლაოზე, მოქალაქეებმა ჭიშკარი ღია არ უნდა დატოვონ.
“სასაფლაო შეღობილია. ძირითად შესასვლელ ჭიშკარს გასულ წელს ჩაუტარდა რესტავრაცია, ისევე, როგორც ღობეს. ასევე, მეორე შესასვლელიდან მოეწყო კიბეები. სასაფლაოს ჰყავს მომვლელი. მთავარია, ჩვენმა თანამოქალაქეებმა ჭიშკარი არ დატოვონ ღია”, _ გვიპასუხა ირაკლი კუჭავამ.
მოქალაქეები სასაფლაოს ჭიშკარს ღიად ტოვებენ და
მიმდებარე ტერიტორიაზე არც ნაგვის დაყრას ერიდებიან
