დღეს ოზურგეთის რაიონულ სასამართლოში, სოფელ მელექედურში მომხდარ მკვლელობასთან დაკავშირებით პირველი სასამართლო პროცესი გაიმართა. მკვლელობა 2016 წლის 27 დეკემბერს მოხდა.
სოფელში მცხოვრები ზვიად ღლონტი, მეზობლებმა და ახლობლებმა ქუჩაში გარდაცვლილი იპოვეს. მას ცივი იარაღით მიყენებული ჰქონდა ჭრილობა გულის არეში. აღნიშნულ ფაქტთან დაკავშირებით, სამართალდამცავებმა ერთი პირი, ამავე სოფელში მცხოვრები, წარსულში ნასამართლევი ალექსანდრე ხინთიბიძე დააკავეს. მას სსკ108 მუხლით აქვს წაყენებული ბრალი.
ალექსანდრე ხინთიბიძე, როგორც მან დღეს მოსამართლე ბიძინა სტურუას განუცხადა, თავს დამნაშავედ არ სცნობს.
ბრალდების მხარეს წარმოადგენს პროკურორი მალხაზ სირაძე, ხოლო ხინთიბიძის უფლებებს ადვოკატი ნანა დარჩია იცავს.
პროკურორმა მალხაზ სირაძემ სასამართლოზე განაცხადა, რომ 2016 წლის 27 დეკემბერს, 23 საათზე ზვიად ღლონტსა და ალექსანდრე ხინთიბიძეს მოუვიდათ შელაპარაკება, რომელიც ფიზიკურ დაპირისპირებაში გადაიზარდა, რის შემდეგაც, პროკურორის განცხადებით, ალექსანდრე ხინთიბიძემ გულ-მკერდის არეში ცივი იარაღით მიაყენა ჭრილობა ზვიად ღლონტს და შემთხვევის ადგილიდან მიიმალა. მალხაზ სირაძის თქმით, აღნიშნულ ინციდენტს ჰყავს უშუალო მოწმეები, თვითმხილველები, პოლიციელები, რომლებიც, ასევე, ადასტურებენ განზრახ მკვლელობის ფაქტს.
ადვოკატის ნანა დარჩიას განმარტებით, კი მისი დაცვის ქვეშ მყოფი პირი დანაშაულს არ აღიარებს:
“ფაქტი მოხდა, თუმცა, მკვლელობას არ ჰყავს მოწმე, არავინ შესწრებია, არავის დაუნახავს“.
აღნიშნულ საქმესთან დაკავშირებით, შემდეგი სასამართლო პროცესი 10 აპრილს გაიმართება და მოწმეების დაკითხვა დაიწყება.
