საქართველოს პარლამენტის თავმჯდომარის სკამიდან რუსი დეპუტატ გავრილოვის მიერ გახსნილი მართლმადიდებელი დეპუტატების ასამბლეის სხდომა, საზოგადოების პროტესტი და სისხლით შეღებილი რუსთაველის გამზირი _ეს თბილისში ბოლო რამდენიმე საათში განვითარებული მოვლენებია.
როგორ აფასებთ აფხაზეთის და სამხრეთ ოსეთის, როგორც დამოუკიდებელი ქვეყნის მაღიარებელი, რუსი დეპუტატების საქართველოს პარლამენტში ყოფნას, ვის ეკისრება პასუხისმგებლობა რუსთაველზე განვითარებულ მოვლენებზე, როგორ შეიძლება შეფასდეს რუსეთის მხარის მიერ გაკეთებული განცხადებები და რას უნდა ველოდოთ მომხდარის შემდეგ _ ამ საკითხებზე “გურია ნიუსი” პოლიტოლოგ ვახტანგ ძაბირაძეს ესაუბრა.
როგორც პოლიტოლოგი ამბობს, რუსთაველის გამზირზე განვითარებული მოვლენების შემდეგ ხელისუფლება ალბათ თავის მართლებას დაიწყებს, თუმცა, სამართლებრივად მართლები რომც იყვნენ, საზოგადოების წინაშე მორალურად მართლები არ არიან და რუსთაველზე განვითარებულ მოვლენებს 2007 წელს მომხდარს ადარებს.
“ქართულმა ოცნებამ, როგორც პოლიტიკურმა ძალამ უკვე დაასრულა თავისი არსებობა. ამის შემდეგ რამდენ ხანს იქნება ხელისუფლებაში ეს ცალკე თემაა. რაც რუსთაველზე ხდებოდა ყოვლად წარმოუდგენელი რამაა, მიუხედავად იმისა, ვინმე აპირებდა პარლამენტში შეჭრას თუ არ აპირებდა. მოწოდება “შევიჭრათ პარლამენტში” ხელისუფლებამ გამოიყენა აქციის დასარბევად. სანამ აქცია დაირბეოდა მანამდე ვთქვი, რომ ძალიან ჰგავდა 2007 წელს რუსთაველზე განვითარებულ მოვლენებს და ხელისუფლებამაც და ოპიზიციამაც უნდა გაითვალისწინოს რა მოხდა მაშინ. არ ველოდი დარბევას, მოწმენდილ ცაზე გავარდნილი მეხივით იყო, მაშინაც და დღესაც ასეა.
საზოგადოებას უნდოდა პროტესტი და ამან ამოხეთქა. სამწუხაროდ, ერთმაც და მეორე მხარემაც გაიმეორა ის, რაც მოხდა მაშინ ნოემბერში.
აქციები დააანონსეს, ყოველ შემთხვევაში ამ პროცესს გაგრძელება ექნება და იმედი მაქვს ძალადობას არცერთი მხარე არ გამოიყენებს. პროტესტი უნდა გაგრძელდეს რადგან ხელისუფლებამ, როგორც არ უნდა იმართლოს თავი ამ მასშტაბის ძალის გამოყენება ყოველთვის მუშაობს ხელისუფლების წინააღმდეგ და არ შეიძლება დავიწყოთ გამართლება. ალბათ, თავის გამართლებას დაიწყებენ და შეიძლება სამართლებრივად მართლებიც იყვნენ, მაგრამ მორალურად მართლები არ არიან მას შემდეგ რაც დარბევა მოაწყვეს”, _ამბობს ძაბირაძე.
პოლიტოლოგის თქმით, პარლამენტში რუსი დეპუტატების ყოფნის შესახებ ერთმნიშვნელოვანი აზრია ჩამოყალიბებული, რომ ისინი იქ საზოგადოებას არ უნდა ეხილა, ხოლო, ვის ეკისრება პასუხისმგებლობა მომხდარზე ეს გამოძიებამ უნდა დაადგინოს.
“ზოგადად, იმაზე, რაც მოხდა, პასუხისმგებლობა ხელისუფლებას ეკისრება, მაგრამ გასარკვევია, კონკრეტულად ვისი პასუხისმგებლობაა, ვინ მიიღო გადაწყვეტილება, ვინ შეადგინა პროტოკოლი. ის რომ უმრავლესობის წევრების ნაწილმა არ იცოდა რა ხდებოდა პარლამენტში, არ მიკვირს, რადგან შეიძლება არ იყვნენ საქმის კურში რა და როგორ ხდებოდა. პროტესტი რომ იქნებოდა, ამას ლაპარაკი არ უნდა”, _ამბობს ძაბირაძე.
რაც შეეხება რუსეთის მხარის მიერ გაკეთებულ განცხადებას, რომ ასამბლეის წევრებზე თავდასხმა მოხდა, პოლიტოლოგის შეფასებით, მათზე თავდასხმა არ მომხდარა და ქუჩაშიც და პარლამენტის შენობაშიც უბრალოდ იყო სამართლიანი პროტესტის გამოხატვა. რაც შეეხება გავრილოვის ნათქვამს, გასარკვევია რამდენად სწორად ამბობს და რამდენად არა.
ის ასევე აღნიშნავს, რომ საქართველოს ვერცერთმა ხელისუფლებამ და ვერც საზოგადოებამ ვერ ჩამოაყალიბა რა სახის ურთიერთობა უნდა რუსეთთან.
“ზოგადად, ჩვენმა ვერცერთმა ხელისუფალმა ვერ გაარკვია რუსეთთან ურთიერთობა, ისევე როგორც საზოგადოებამ. ვერ ჩამოვყალიბდით რა ფარგლებში გვაქვს თანამშრომლობა რუსეთთან, რას წარმოადგენს. ამიტომ გვიწევს უფრო ღრმა ემოციური დამოკიდებულება, ვიდრე პოლიტიკური და ანალიტიკური. დროა გავარკვიოთ რა გვინდა რუსეთისგან, რას მოვითხოვთ და რა ფარგლებში ვთანამშრომლობთ თუ არ ვთანამშრომლობთ, თორემ სრული ქაოსია”,_ამბობს ძაბირაძე.
