ოზურგეთის მუნიციპალიტეტის სოფელი ჯუმათი ზღვის დონიდან 120 კმ-ზე მდებარეობს. სოფელი საკმაო მანძილითაა დაშორებული ქალაქის ცენტრიდან.
_ 15 კილომეტრამდე მანძილის გავლა ჭირდა ცუდი გზების გამო. დღეს არის საუკეთესო გზა და მოძრაობა არ ჭირს, თუმცა, სოფლის შიდა გზები არა ერთგან მოუწესრიგებელი და დაზიანებულია. მათ შორის არის ისე ძალიან დაზიანებულიც, სადაც მსუბუქ ავტომობილს გავლა უჭირს, _ გვეუბნებიან ადგილობრივები.
ერთ-ერთი დაზიანებული აღმართი გასდევს მონასტრის ქუჩას, რომელიც ნიაღვრისგან დასერილია, ხოლო სადაც ჰორიზონტალურია, ორმოებითაა სავსე.
ჯუმათის მკვიდრი, მინდია კვაჭაძე გზის პრობლემაზე ღიად საუბრობს:
_ პირველ რიგში, ვიტყვი, რომ ჯუმათში ძალიან კარგი გზა გაკეთდა. ბევრ აღმართშიც დაიგო ბეტონის მონაკვეთები. თუმცა, მონასტრის ქუჩის გაგრძელება, რომელიც ორ კილომეტრამდე იქნება, ორმოებითაა სავსე. მსუბუქ მანქანებს კი არა, მიკროავტობუსებსაც ძალიან უჭირთ გადაადგილება. არაერთხელ იყვნენ, ჩვენც მივმართეთ მერიას და გვპირდებიან, რომ 2020 წელს გაკეთდება. ალბათ, არ მოგვატყუებენ, _ თქვა მან.
_ მონასტრის ქუჩის გაგრძელებაზე, აღმართი სადაც მთავრდება და თავქვე ეშვება, გზა ისეა დაზიანებული, ცალ ფეხზე ხტუნვით გამოვდივარ. მივმართეთ შესაბამის უწყებას, მაგრამ არ გაკეთდებაო, _ გვითხრეს. რა ვქნათ, ხუთი ოჯახი ვართ იქ და ასე საცალფეხო გზით გამოვდივართ, ასე ვთქვათ, სამშვიდობოს, _ გვითხრა ჯუმათის მკვიდრმა, ქეთევან მეგრელიშვილმა და მეტი სიზუსტისთვის, განგვიმარტა, რომ მის უბანს “დობირო” ჰქვია.
მეგრელიშვილს მისივე მეზობელი მარი ჩხარტიშვილი გამოეპასუხა და შეახსენა, რომ აღნიშნული უბანი არამყარი ადგილია და რაკი მოძრავი ქანები და არამდგრადი გეოლოგიური გარემოა, ამიტომ არ მოხერხდება აქ გზის დაგება:
_ ისეთი მოძრავი მიწაა, ვერ დაეყრდნობი. არავინ იცის, როდის დაიძრება. უფრო ეს იყო თავშეკავების მიზეზი. ძალიან შორსაც არ არის სამანქანო გზა, რომ ვერ შევძლოთ გამოსვლა, თუმცა, ხუთ ოჯახს მაინც დისკომფორტს გვიქმნის, _ გვითხრა მარი ჩხარტიშვილმა.
იგივე გვითხრა ჯუმათელმა ქრისტინა ჯანიაშვილმაც:
_ ჩვენ არაერთხელ მივმართეთ ოზურგეთის მუნიციპალიტეტის მერიას. არც იმის თქმა შეიძლება, რომ გზის გაკეთების მხრივ უყურადღებოდ ვართ. მით უფრო, ჯუმათში მრავალი უბანია, მთიანი რელიეფი აქვს. ყველგან იყო პრობლემა. ბევრიც გაკეთდა. თუმცა, ეს გზა, რომელიც მონასტრის ქუჩის გაგრძელებაა, მიდის მონასტრამდე. ასევე, სკოლაშიც ამ გზით მიდიან ბავშვები. კი შეგვპირდნენ, მაგრამ დაჩქარებაა საჭირო. იმედია, 2020 წელს გაკეთდება, როგორც გვითხრეს. ხომ ხედავთ, ზაფხულივით ამინდებია დეკემბერში და გზა ნახეთ _ უზარმაზარ ორმოებში რამხელა გუბეები დგას. ხომ ადვილი წარმოსადგენია, წვიმასა თოვლში გადაადგილება რომ საერთოდ შეუძლებელი იქნება. ამიტომ ვწუხვართ, უმადური არ ვართ, მაგრამ შიდა გზების გაკეთება არ უნდა გაიწელოს, _ თქვა ქრისტინა ჯანიაშვილმა.
ჯუმათელები ამბობენ, რომ სოფელში ბევრი პრობლემაა, თუმცა, ამ ეტაპზე გზასა და ციტრუსოვანთა გასაღების ბაზარზეა აქცენტი გადატანილი. ბაღებში ციტრუსის კრეფა თითქმის დასრულებულია. აქა-იქ ჩანს ჯერ კიდევ დაუკრეფავი ფორთოხალი და ლიმონი.
_ წელს საუკეთესო ამინდია. ამ მხრივ გაგვიმართლა, თუმცა, მოსავალი ნაკლებია. 17 ტონა ციტრუსს ვკრეფ სეზონზე, წელს მსხმოიარობა არ იყო ისე, როგორც გასულ წელს. სამაგიეროდ, ხარისხიანია. თუ არ შეწამლე, არაფერი გამოვა. ხუთჯერ შევწამლე, როგორც მანდარინი, ისე _ თხილი. წამალი ძვირია, ხშირად ხარისხი საეჭვოა. ამიტომ ეს საქმე უნდა გამოსწორდეს. მკაცრად შემოწმდეს, როგორი წამალი შემოდის და ვისგან. თუ ცოტა უფრო იაფადაც იქნება, ხალხი ამოისუნთქავს, _ ამბობს 85 წლის ჯემალ თავართქილაძე.
როგორც ბატონი ჯემალი გვიყვება, მეუღლე ხუთი წლის წინ გარდაეცვალა. ეს უბედურება ასაკში შესული კაცისთვის ძალიან მძიმე აღმოჩნდა, თუმცა, ფარ-ხმალი არ დაუყრია:
_ რა უნდა ვქნა, სამი შვილი მყავს. ყოველ შაბათ-კვირას მოდიან. მე ოჯახს და კარმიდამოს ვხედავ. მიყვარს მიწა, შრომა. საუკეთესო ქვეყანა გვაქვს. გურია წალკოტია, თუმცა, მოვლა უნდა. ცოტა უკეთესობა არის. მანდარინს წლების წინ ვერ ვყიდდით, ლპებოდა და ვყრიდით, ავსებული იყო ღელეები. ახლა შედარებით გამოსწორდა. ერთიანად გავყიდე. ერთი კილოგრამი 60 თეთრად. მე მეტიც კი მინდოდა, მაგრამ არაა მთლად მასე. ახლა მთავარი ისაა, ხალხს დაეხმარონ ხარისხიანი წამლის მიწოდებაში. მანდარინიც ამოისუნთქავს და მშრომელი კაციც, _ ამბობს ჯემალ თავართქილაძე და სოფლის გზების კეთილმოწყობის შესახებ საუბრობს
_ ახლა განსაკუთრებით საჭიროა გზა. კლიენტი მოდის, მალე ახალი წელიც მოვა. გზაა მთავარი. ჯუმათი მთიანი სოფელია, ძნელად მისადგომი ბევრი უბანი აქვს და ბუნებრივია, მეტ ყურადღებას ითხოვს, ვიდრე ბარში, ქალაქთან ახლოს მდებარე სოფლები, _ გვითხრა მან და ოპტიმისტურად დაგვემშვიდობა:
_ ახლა ჩემი მორთმეული ციტრუსი ინებეთ და მომავალ წელსაც დამელოდეთ, გაისად კარგი მოსავალი იქნება და არც მე ვაპირებ სადმე წასვლას.
“გურია ნიუსი” ოზურგეთის მუნიციპალიტეტის მერიას დაუკავშირდა და ჯუმათში მონასტრის ქუჩისა და შიდა საუბნო გზების შესახებ ჰკითხა.
_ აღნიშნულ სოფელში შიდა გზების პრობლემები, უმეტესწილად, მოწესრიგებულია. რაც შეეხება მონასტრის ქუჩას, დაგეგმილია და 2020 წელს ისიც გაკეთდება, _ გვითხრა მერიის პრესსამსახურის ხელმძღვანელმა ეკა მგელაძემ.
