დღეს ხმაური იყო ჩოხატაურის მუნიციპალიტეტის სოფელ ბუკნარში _ ამ სოფელში მცხოვრები მუსლიმები ამბობენ, რომ მათ უფლება აქვთ, სალოცავი ჰქონდეთ სოფელში და მის აშენებას ითხოვენ.
ამ მოთხოვნას მართლმადიდებელ და მუსლიმ მრევლს შორის სიტყვიერი და ფიზიკური დაპირისპირება მოყვა, რის გამოც მოგვიანებით დაბა ჩოხატაურში, კლინიკა “მამქოლში“ გადაყვანეს ორი მოქალაქე, რომლებსაც ექიმების დახმარება დაჭირდა.
ჩოხატაურის მუნიციპალიტეტის მერი ირაკლი კუჭავა “გურია ნიუსთან“ საუბრის დროს ამბობს, რომ სოფელ ბუკნარში, მუსლიმმა მოქალაქეებმა იყიდეს სახლი, სადაც ყოველ პარასკევს ატარებდნენ ლოცვას:.
“სოფელში არის წინააღმდეგობა სალოცავთან დაკავშირებით. ბოლო სამი კვირის განმავლობაში არის შეხვედრები და ვცდილობთ, რომ ეს საკითხი ოპტიმალურად მოგვარდეს. ასეთი შეხვედრა დღესაც იყო გურიის გუბერნატორთან ზურაბ ნასარაიასთან ერთად.
მიუხედავად მოლაპარაკებებისა, სოფლის მცხოვრებლებს შორის დაპირისპირება მოხდა. ამ დროისთვის ინციდენტი დასრულებულია და ხვალისთვის დაგეგმილია მორიგი შეხვედრა. ყველაფერს გავაკეთებთ იმისთვის, რომ ეს პრობლემა მოგვარდეს“, _ გვითხრა ირაკლი კუჭავამ.
“ერთიანი ნაციონალური მოძრაობის“ ლანჩხუთის ორგანიზაციის თავმჯდომარე კახა ასკურავა ჩოხატაურში მომხდარ ფაქტს ფეისბუქზე ეხმაურება.
“ჩოხატაურის მუნიციპალიტეტის სოფელ ბუკნარში განვითარებული კონფლიქტი, რომელიც, სამწუხაროდ, რელიგიურ ნიადაგზეა წარმოშობილი და ერთმანეთს ერთი სოფლის მართმადიდებელი და მუსლიმი მოსახლეობა ფიზიკურად დაუპირისპირდა, სრულიად არის “ქართული ოცნების” და ადგილობრივი ხელისუფლების უპასუხისმგებლო პოლიტიკის დამსახურება. ისინი თითქმის ყველა არჩევნების წინ არა მხოლოდ ჩოხატაურში, არამედ მთელს რეგიონში ხმების სანაცვლოდ ევაჭრებიან ადგილობრივ მუსლიმებს, რომ თუ არჩევნებში მათ დაუჭერენ მხარს, ხელს არ შუშლიან სალოცავის მოწყობაში.
როცა არჩევნები სრულდება, მერე ადგილობრივ მართლმადიდებელებს არ ინაწყენებენ და სიტუაციას ხელოვნურად უშვებენ მის ნებაზე, რაც, უმეტეს შემთხვევაში, მთავრდება ფიზიკური დაპირისპირებებითა და მძიმე შედეგებით.
ბუკნარში დღეს მომხდარი ფიზიკური დაპირისპირება მართმადიდებელ და მუსლიმ თემებს შორის, სამწუხაროდ, არ არის ერთადერთი ფაქტი გურიის რეგიონში და სავარაუდოდ არც უკანასკნელი იქნება, სანამ ადგილობრივი თუ ცენტრალური ხელისუფლება თავს არ დაანებებს რელიგიური გრძნობებით ვაჭრობას საკუთარი პოლიტიკური ინტერესების სასარგებლოდ და საკითხს არ მიუდგება ისე, როგორც ეს კანონმდებლობითაა განსაზღვრული.
პირადად მე, სამარცხვინოდ, მიმაჩნია საქართველოს მსგავსი მრავალეთნიკური და ტოლერანტობის უდიდესი წარსულის მქონე ქვეყანაში, 21-ე საუკუნეში, რელიგიურ ნიადაგზე ქვებს ვესროდეთ ერთმანეთს. მე მყავს მუსლიმი მეგობარები, რომელიც არც ერთი წუთით არ განმისხვავებია ჩემი ქრისტიანი მეგობრებისგან!“ _ წერს კახა ასკურავა.
