“ნასაკირალისკენ რომ ჩაიქროლა პრემიერმა ესკორტით, აქეთაც გამოიხედოს!”

8 აპრილს, ოზურგეთის მუნიციპალიტეტის სოფელ მელექედურში, მოსახლეობამ, გაზის შემოყვანის მოთხოვნით, აქცია მოაწყო.

სოფლის ცენტრში თავმოყრილმა აქციის მონაწილეებმა უპირველეს პრობლემად ბუნებრივი აირის უქონლობა დაასახელეს.

_ არაერთხელ მოგვატყუეს და მეტ ტყუილს არ მოვითმენთ. სამი დღის წინ მოვილაპარაკეთ მშვიდობიანი აქციის მოწყობის თაობაზე და თავად დავურეკეთ გურიის მხარის გუბერნატორს, ზურაბ ნასარაიას. არ გვინდა მშვიდობიანი პროტესტი უშედეგოდ დასრულდეს, თორემ მერე გზას ყველა მხრიდან გადავკეტავთ.

ჩვენ ბევრი გასაჭირი გვაქვს, მაგრამ დღეს, კონკრეტულად, გაზის მოთხოვნით ვაკეთებთ აქციას. პრემიერმა ესკორტით რომ ჩაიქროლა ნასაკირალისკენ, ყველაფერს იქით რომ ექაჩებიან, ჩვენი ამბავიც იკითხოს დალოცვილმა. ჩვენ არ ვეჯიბრებით ვინმეს, არც იმას ვამბობთ, ვთქვათ, ნასაკირალს არ გაუკეთონ, მაგრამ ახლა მითხარით, მე რომ 50 ადამიანი გამოვიყვანე და  “ქართულ ოცნებას ” ხმა მივეცით, ენერგეტიკის მინისტრის მოადგილემ, ნათია თურნავამ კი სანაცვლოდ მოტყუებული დაგვტოვა _ დაგვიბარა, რომ 2018 წლის ბოლოს, მაქსიმუმ, ამ წლის თებერვლამდე მელექედურის გაზიფიცირება მოხდებოდა, ახლა რა ქნა?! ის ჩემი მეზობლები თურნავასთან კი არ მიდიან, მოდიან და მე მთხოვენ პასუხს, _ გვეუბნება მელექედურის მკვიდრი მაყვალა ცხომელიძე.

აქციაზე გურიის გუბერნატორი ზურაბ ნასარაია და მისი მოადგილე აკაკი შენგელია მივიდნენ. ნასარაია ესაუბრა აქციის მონაწილეებს და შეპირდა, რომ მაისში ცნობილი იქნება და ვებგვერდზე ათ მაისამდე გამოქვეყნდება პროექტი, რომლის მიხედვითაც, როგორც მელექედურის, ისე სხვა დარჩენილ სოფლებში გაზის შეყვანა მოხდება.

_ “სოკარმა” 2019 წელს უნდა დაიწყოს ბუნებრივი აირის გაყვანა. აუცილებლად იქნება მელექედური იმ სამ სოფელს შორის, სადაც გაზიფიცირება მოხდება, _ თქვა ნასარაიამ.

_ კაი, ბებო, კაი, გეიხარე, მარა ქარი არ დარჩეს სიტყვა. ადრე ყველამ მოგვატყუა, _ უთხრა მას აქციაზე მოსულმა ნანული მხეცაძემ.

მელექედურელებმა, მართალია, გაზის შემოყვანა პირველ მოთხოვნად წამოაყენეს, თუმცა, როცა აღნიშნულ თემაზე პასუხი მიიღეს, ხალხი სხვა პრობლემებზეც ალაპარაკდა:

_ ფაროსანას საწინაღმდეგო ღონისძიებები უფრო კარგად უნდა ჩატარდეს. ჩვენ არ შეგვიძლია ასევე, ამ მძიმეწონიანი მანქანების მოძრაობის ატანა. გზა ფუჭდება, მტვერმა დაგვახრჩო. გზისპირა არხები ამოვსებულია, ზოგან ჭაობია გაჩენილი, ტბა დგას, _ თქვა ნანული მხეცაძემ.

ზურაბ ნასარაია აქციის მონაწილეებს ესაუბრა ფაროსანას წინააღმდეგ დაგეგმილი ღონისძიებების შესახებ.

_ ჩვენ აქტიურად ვართ ჩართული ფაროსანას საწინააღმდეგო ღონისძიებებში. დღეს (8 აპრილს. რედ.) დაიწყება აქ ფერომონების განთავსდება. ძირითადი ბაზა ფაროსანას წინააღმდეგ საბრძოლველად იქნება გურიაში. ვისაც ფუტკარი ჰყავს, აუცილებლად უნდა გამოაკრან უბანში ან ჭიშკართან პატარა ბანერი, წარწერით _ “ფუტკარი”. ფაროსანასთან ბრძოლის დროს თითოეული თქვენგანის თხოვნა გათვალისწინებული იქნება, _ უთხრა მათ ზურაბ ნასარაიამ.

გუბერნატორმა კონკრეტულად მიმართა სოფლის წარმომადგენელს მუნიციპალიტეტის საკრებულოში, ლევან კილაძეს, შეედგინა თითოეული აქ მცხოვრების სატელეფონო სია, რომ საჭიროების შემთხვევაში დაეხმარონ.

სოფლის მკვიდრმა, გუგული ხინთიბიძემ გუბერნატორს მიმართა სოციალური დახმარების მოხსნის გამო:

_ ავადმყოფი მოხუცი ვარ, შემწეობა რატომ არ უნდა მქონდეს? ვერ გავიგე, ქულებს როგორ წერენ. მოვიდნენ და ნახოს ყველამ, როგორ ვცხოვრობ. მიჭირს და მომეხმარეთ, _ თქვა მან.

ზურაბ ნასარაია შეპირდა მას, რომ შესაძლებლობის ფარგლებში დაეხმარება.

საბოლოოდ, აქციის მონაწილეებმა თქვეს, რომ ენდობიან გუბერნატორის სიტყვას და ათ მაისამდე წყვეტენ პროტესტის ყველანაირ ფორმას:

_ დღეს აქცია მოვაწყვეთ და სხვა რაიმე გამწვავებას ადგილი არ ჰქონია. თუ დანაპირები არ შესრულდება და ისევ მოგვატყუებენ, მერე ყველა მხრიდან გადავკეტავთ გზას და არც დავიშლებით. ამდენი მოტყუება ამოვიდა ყელში, _ გვითხრა მაყვალა ცხომელიძემ.