პროფესორი რეზო გაგუა გარდაიცვალა.
ამის შესახებ ინფორმაცია „გურია ნიუსს“ თბილისის ონკოლოგიურ ცენტრში დაუდასტურეს.
ცნობისთვის, რეზო გაგუა იყო საქართველოს ონკოლოგთა ასოციაციის პრეზიდენტი, საქართველოს ონკოლოგიის ნაციონალური ცენტრის გენერალური დირექტორი მედიცინის მეცნიერებათა დოქტორი, მედიცინის მეცნიერებათა აკადემიის აკადემიკოსი, საქართველოს სახელმწიფო და ეროვნული პრემიების ლაურეატი, პროფესორი.
დაიბადა ქ.ფოთში, 1945 წელს. 1963 წელს ოქროს მედალზე დაამთავრა ქ.ფოთის №7 საშუალო სკოლა. იმავე წელს ჩაირიცხა თბილისის სახელმწიფო სამედიცინო ინსტიტუტის სამკურნალო ფაკულტეტზე, რომელიც დაამთავრა 1969 წელს.
1970 წლის ნოემბერში ჩაირიცხა მოსკოვის საკავშირო კლინიკური და ექსპერიმენტული ქირურგიის სამეცნიერო კვლევითი ინსტიტუტის კლინიკურ ორდინატურაში. 1972 წელს კლინიკური ორდინატურის დამთავრების შემდეგ ჩარიცხული იქნა მოსკოვის ი.სეჩენოვის სახელობის სამედიცინო ინსტიტუტის ასპირანტურაში.
ორდინატურისა და ასპირანტურის წლებში სპეციალურ მომზადებას გადიოდა თორაკალურ ქირურგიაში აკადემიკოს მ.პერელმანის ხელმძღვანელობით. ასპირანტურაში ვადაზე ადრე 1975 წელს დაიცვა საკანდიდატო დისერტაცია თემაზე – “რეთორაკოტომია ფილტვისა და შუასაყრის ქირურგიაში”.
1976 წლის ნოემბრიდან 1979 წლის ივლისამდე მუშაობდა აკადემიკოს კ.ერისთავის სახელობის ექსპერიმენტული და კლინიკური ქირურგიის სამეცნიერო კვლევითი ინსტიტუტის ფილტვებისა და შუასაყრის ქირურგიის განყოფილებაში ჯერ უმცროს, ხოლო შემდეგ უფროს მეცნიერ მუშაკად. 1979-1989 წლებში, სამშობლოში დაბრუნებისთანავე, იგი მუშაობას შეუდგა საქართველოს ჯანდაცვის სამინისტროს ონკოლოგიის სამეცნიერო ცენტრში თორაკალური განყოფილების ხელმძღვანელის თანამდებობაზე.
მის სახელთანაა დაკავშირებული ფილტვის ქირურგიის განყოფილების ჩამოყალიბება, რომელმაც საკმაოდ მოკლე პერიოდში მოიპოვა დამსახურებული ავტორიტეტი და აღიარება რესპუბლიკის ფარგლებს გარეთაც. 1987 წლიდან აღნიშნული განყოფილების მასშტაბები გაფართოვდა საყლაპავისა და კუჭის პროქსიმალური ნაწილის კიბოს ქირურგიული მკურნალობის პრობლემების შესწავლით. ამ პერიოდიდან განყოფილებას ეწოდა თორაკალური ონკოლოგიის განყოფილება.
იყო ქალაქ თბილისისა და საქართველოს ონკოლოგთა და ქირურგთა საზოგადოების თავმჯდომარის მოადგილე, ონკოლოგიის სამეცნიერო ცენტრის საკოორდინაციო და სამეცნიერო საბჭოს თავმჯდომარე, თბილისის სახელმწიფო სამედიცინო უნივერსიტეტის სპეციალიზებული სადისერტაციო საბჭოს წევრი.
მის მიერ პირველად საქართველოში განხორციელდა ფილტვის სიმსივნის დროს პერიფერიული ბრონქების კათეტერიზაცია ფიბრობრონქოსკოპის საშუალებით, ტრაქეის გულმკერდის ნაწილის ცირკულარული რეზექცია, ლობექტომია მთავარი ბრონქის ცირკულარული რეზექციით, ტრაქეის ბიფურკაციის რეზექცია, ფილტვის მეტასტაზური სიმსივნეების ქირურგიული მკურნალობა, ფილტვის კიბოს რეციდივის ქირურგიული მკურნალობა, ფილტვის კიბოს დროს გაფართოებულ-კომბინირებული ოპერაციები.
1994 წელს რ.გაგუა არჩეულ იქნა მედიკო-ბიოლოგიურ მეცნიერებათა აკადემიის ნამდვილ წევრად. 1997 წელს მიწვეული იყო ქ.ათენში (საბერძნეთი) თორაკალურ ქირურგთა საერთაშორისო კონგრესის ორგკომიტეტის წევრად. ამავე წელს მისი დამსახურება სამამულო ონკოლოგიაში აღინიშნა სამთავრობო ჯილდოთი – “ღირსების მედლით”.
1999 წელს რეზო გაგუა დაინიშნა ონკოლოგიის ნაციონალური ცენტრის გენერალურ დირექტორად, მას დიდი და რთული გზის გავლა მოუწია რათა შეენარჩუნებინა კლინიკა და მთლიანად ონკოლოგიური დარგი ქვეყნისათვის ძალიან რთულ პერიოდში.
