საქართველოს პარლამენტი მარიხუანის კულტივაციის შესახებ კანონპროექტს აღარ განიხილავს, თუმცა, ჯერჯერობით, უცნობია, როდის გაიწვევს პარლამენტი სამთავრობო ინიციატივას.
მარიხუანის კულტივაციის შესახებ კანონპროექტზე ,,გურია ნიუსთან“ ეკონომიკის ექსპერტი იოსებ არჩვაძე საუბრობს.
_ საერო და სასულიერო პირების ძალისხმევის შედეგად, პარლამენტმა მარიხუანის კულტივაციის შესახებ კანონპროექტის განხილვა შეაჩერა.
პროცესებს ეტაპობრივად რომ მივყვეთ, ბევრ კითხვას აჩენს და საკმაოდ ბუნდოვანია კანონპროექტის წარმომავლობა, ასევე _ პოლიტიკოსთა მცდელობა, რომ თითქოს, კანონპროექტი ქვეყნისთვის საზიანო კი არა, პირიქით, მცირე დროში ეკონომიკის ზრდის გარანტია. ყოველივე ამის შემდეგ, ხალხმა იხილა ხელისუფლების უკან დახევა. როგორ უყურებთ ამ პროცესებს?
_ მოგეხსნებათ, აღნიშნული კანონპროექტის მიმართ მოსახლეობის აბსოლუტურად დიდმა ნაწილმა, მართლმადიდებელმა მრევლმა უარყოფითი დამოკიდებულება გამოხატა.
ბუნებრივია, გადამწყვეტი იყო საქართველოს საპატრიარქოსა და მისი უწმინდესობის მიერ ცალსახად კატეგორიულად გამოხატული უარყოფითი პოზიცია, რამაც პარლამენტს უკანდახევისკენ უბიძგა.
ხელისუფლების პოზიცია და მარიხუანისგან სარგებლის მიღების მოლოდინი სულხან-საბა ორბელიანის იგავის _ ,,გლახაკი და ქილა ერბოს“ პერსონაჟის იმედებს ჰგავს.
საქართველოს აქვს პოტენციალი, საკმაოდ საინტერესო გეოგრაფიული მდებარეობა, ბუნებრივი პირობები და რესურსები იმისთვის, რომ წარმოების განვითარებით მივაღწიოთ მაღალ ეკონომიკურ შედეგებს და არა მარიხუანის ექსპორტით, რომელიც დიდი რისკების შემცველია.
_ ბატონო იოსებ, როგორც საკანონმდებლო ინიციატივის ავტორები აცხადებენ, კანონპროექტის შემუშავების მთავარი მიზეზი ეკონომიკის განვითარებაზე ზრუნვაა. მთავრობის წარმომადგენლებს უკვე დაანგარიშებულიც კი აქვთ, რა შემოსავლის მომტანია აღნიშნული ინიციატივა.
ფინანსთა მინისტრი ივანე მაჭავარიანი მომავალი ორი-სამი წლის განმავლობაში მარიხუანის ექსპორტიდან მილიარდი ლარის სარგებლის მოტანას ელოდება..
_ მსოფლიოში ყველაზე მომგებიან ბიზნესად ითვლება იარაღით ვაჭრობა, ტრეფიკინგი, ნარკოტიკი და პროსტიტუცია, მაშინ სხვა მიმართულებითაც ხომ არ გამოგვეჩინა ძალისხმევა?!
ფინანსთა მინისტრი უნდა ზრუნავდეს ფისკალურ ასპექტებზე, მორალურად მისაღები საქმიანობის ფორმებიდან შემოსავლების მიღებაზე და არა საეჭვო საქმიანობის სფეროდან მოტანილი ფულით ეკონომიკის გამდიდრებაზე.
_ ის ადამიანები, რომლებიც წინ აღუდგნენ აღნიშნული კანონპროექტის მიღებას, მათ შორის, საპატრიარქოს წარმომადგენლები, აცხადებენ, რომ კანონპროექტის უკან კონკრეტული პირების ინტერესები იკვეთება. ეჭვი გაქვთ, რომ აღნიშნული ინიციატივის მიღება ხელისუფლებას კონკრეტულმა პირებმა შეუკვეთეს?
_ რა თქმა უნდა, იკვეთება კონკრეტული პირების ბიზნესინტერესები და არა მარტო ქვეყნის შიგნით მოქმედი პირების ბიზნესინტერესებზე ვსაუბრობ.
დღეს მსოფლიო ეკონომიკა გლობალურ ხასიათს ატარებს და არ გამოვრიცხავ, რომ შიდა ცალკეული ბიზნესჯგუფებისა და გარე ძალების ინტერესების თანხვედრას ჰქონდეს ადგილი.
_ ბატონო იოსებ, პარლამენტში აღნიშნული ინიციატივის წარმდგენია შს სამინისტრო, რომლის ფუნქცია ცალსახად ნარკოტიკებთან ბრძოლაა.
შს მინისტრის, გიორგი გახარიას თქმით, სამინისტრო კანაფის წარმოების ეფექტური კონტროლის განხორციელებას შეძლებს. რისკები, რომლებიც კონონპროექტის მიღებას ახლავს თან, ხელისუფლებას კარგად გაცნობიერებული არ აქვს?
_ მეზობელი მეზობელს ეკითხება: კი მაგრამ, ამდენი სისულელის ჩადენას როგორ ახერხებო, პასუხობს, ადრე ვდგები, ძამაო. ასეთი აქტიურობა ყოველთვის არ იძლევა დადებით შედეგს.
ვფიქრობ, ის პოზიტიური კაპიტალი, რომელიც შინაგან საქმეთა მინისტრს ბოლო თვეების განმავლობაში დაუგროვდა, სერიოზული რისკის ქვეშ დააყენა პარლამენტში აღნიშნული პროექტის წარდგენით.
არ ვიცი, რამდენად თავისუფალი იყო ან რამდენად გაცნობიერებული ჰქონდა მას ამ პროექტის სოციალური მნიშვნელობა და რეზონანსი, მაგრამ ცალსახაა, რომ თავისი რეპუტაცია ეჭვქვეშ დააყენა.
იმ შემთხვევაში, თუ პარლამენტი საკითხს დღის წესრიგში ისევ დააყენებს, მივიღებთ კონტროლიდან გასულ მდგომარეობას, რომლის გამოსწორებას ვერც შს სამინისტრო და ვერც სხვა უწყება შეძლებს. ქვეყანაში იქნება სელექციური სამართალი, რომელიც გაამძაფრებს უსამართლობის გრძნობას, რაც საბოლო ჯამში, ხელისუფლების რეპუტაციაზე აისახება.
