მომავალი წლის ლანჩხუთის მუნიციპალიტეტის მთავარი საფინანსო დოკუმენტის პროექტი ჯერ კიდევ განხილვის სტადიაშია. მერიამ საკრებულოს პროექტის შესწორებული ვარიანტი უკვე წარუდგინა.
ჯერჯერობით, უცნობია საკანონმდებლო ორგანოსთვის, რომელიც, ძირითადად, მმართველი გუნდის წევრებითაა დაკომპლექტებული, მისაღებია თუ არა აღმასრულებელი რგოლისგან შემოთავაზებული პროექტის კორექტირებული ვარიანტი, მაგრამ ფაქტია, რომ ამ მხრივ შენიშვნები აქვს საკრებულოს ოპოზიციონერ წევრსა და ექსპერტს თვითმმართველობის საკითხებში ამირან გიგინეიშვილს. იგი 2020 წლის ბიუჯეტის პრობლემებზე საჯაროდ ამჯობინებს საუბარს.
“ბიუჯეტი ორგანიზაციის ერთწლიანი სამუშაო გეგმაა თანხებში გამოხატული. მუნიციპალიტეტის ბიუჯეტი შედგება შემოსულობებისგან, ხარჯებისგან და ნაშთისგან. ბიუჯეტი სწორადაა გათვლილი, თუ ნაშთი ნულის ტოლია. ვნახოთ, რა ხდება ლანჩხუთის 2020 წლის ბიუჯეტის პროექტში”, _ ამბობს ამირან გიგინეიშვილი და იქვე დასძენს, რომ ეს პოპულარულ ენაზე თარგმნილი რამდენიმე შენიშვნაა, თუმცა, ფინანსისტებისა და მაკროეკონომიკის სპეციალისტებისთვის უფრო სიღრმისეული ანგარიშიც შეიძლება.
“მაგალითად, საჯარო მოხელეთა და საბიუჯეტო ორგანიზაციის თანამშრომელთა შრომის ანაზღაურება შეადგენს 4 932 500 ლარს, რაც მთელი ბიუჯეტის 47,8%-ია. გამოდის, რომ ბიუჯეტი ორიენტირებულია არა პროგრამებზე, სერვისებზე, მოსახლეობის საცხოვრებელი პირობების გაუმჯობესებაზე, არამედ _ ხარჯვაზე.
ბიუჯეტის ხარჯვის პროცესში წარმოშობილ ეკონომიას და ასევე, სხვა სახის ეკონომიას, რომელიც წლის ბოლოს რჩება, თავისუფალი ნაშთი ქვია. 2020 წლის ბიუჯეტის პროექტში განმარტებულია, რომ 2019 წელს მუნიციპალიტეტს თავისუფალი ნაშთის სახით, 405 ათას ლარამდე დარჩება. ამ თანხის ასახვას ახალ ბიუჯეტში თავიდანვე რატომღაც არ აპირებენ და ასახავენ მაშინ, როცა დასჭირდებათ. ეს საბიუჯეტო კოდექსთან მიმართებაში კითხვებს აჩენს. გაქვს შემოსავალი? ასახე ხარჯვაში”, _ განმარტავს ამირან გიგინეიშვილი.
თვითმმართველობის ექსპერტი აქცენტს წყლის განვითარების პროგრამაზეც აკეთებს:
“აქ წერია, რომ ყველა დასახლებაში (54 დასახლებაა მუნიციპალიტეტში) მოქმედებს სასმელი წყლის მიწოდების 24-საათიანი გრაფიკი. რეალურად, რაც აქ წერია, მიღწევადია? ძალიან მეეჭვება. ჯერ ერთი, შეუძლებელია ყველა დასახლებას ამ დროისთვის, ზოგადად, წყლის სისტემა ჰქონდეს და სასმელი წყალი ხომ საერთოდ ზღაპარია. რაც სასმელი წყლის ტექნიკურ რეგლამენტშია გაწერილი, იმ კონდიციის წყალი რომ მიაწოდო მოსახლეობას, ამისთვის გამწმენდი ნაგებობები, ქიმიური, ბიოლოგიური ან ელექტრო-ქიმიური მეთოდები უნდა გამოიყენო ყველა დასახლებაში. თუ შევხედავთ ამ პროგრამისთვის გამოყოფილ თანხას, მისახვედრია, რომ შეუძლებელია ასეთი შედეგის დადება.
ბიუჯეტიდან სასაფლაოების მოვლა-პატრონობა ხორციელდება მხოლოდ ქალაქში. მუნიციპალიტეტის დანარჩენ 53 დასახლებაში მცხოვრები ადამიანები მეორეხარისხოვან ჯგუფს წარმოადგენდნენ და წარმოადგენენ?!
დასუფთავება და ნარჩენების გატანა, ცხადია, მუნიციპალიტეტის მნიშვნელოვანი ვალდებულებაა. ამასობაში მოსალოდნელი შედეგი ასეთია _ “გარდა ქალაქისა, დასუფთავდება სხვა ტერიტორიები”. გასაგებია, რომ სხვა ტერიტორიებში შედის ზღვის სანაპირო ზოლი, ისიც მხოლოდ ორი თვით და სხვაგან სად? რატომაა მუნიციპალიტეტის პოლიტიკა ისეთი, რომ სადაც ასფალტი არაა, იქ არ დგას ნაგვის ურნები. რა იმ ადგილებში მცხოვრები ოჯახები მეორეხარისხოვანი მოსახლეობა ვართ, თუ პირიქით, პრივილეგირებულები ვართ და ნაგავი ხევში უნდა გადავყაროთ?!”
როგორც ირკვევა, მომავალი წლის მთავარი საფინანსო დოკუმენტის პროექტში გაზრდილი რაოდენობითაა წარმოდგენილი მერიის შრომის ანაზღაურება:
“მიუხედავად იმისა, რომ მერიაში მომუშავეთა რიცხოვნება არ იზრდება, მატულობს შრომის ანაზღაურება რატომ და სადაა დასაბუთება? ბაღების თანამშრომელთა რაოდენობა იკლებს 11 ადამიანით, _ რატომ?!
სპორტული ცენტრის ხელშეწყობის აღწერაში წერია, რომ აქ არის 11 სპორტული მიმართულება, მათ შორის, ფეხბურთი (200 ბავშვი). მუნიციპალიტეტში ცალკე არსებობს საფეხბურთო სკოლა, სადაც 180 ბავშვია. ფეხბურთის ჯგუფი რაღა საჭიროა სპორტულ ცენტრში? ანუ გვაქვს ორი მუნიციპალური ორგანიზაცია, რომელიც ერთი და იმავე საქმეს აკეთებს?!
ცენტრში დასაქმებულია 103 თანამშრომელი, რომელთაგან 60 ტექნიკური და ადმინისტრაციული მუშაკია, 43 კი მწვრთნელი. გამოდის “მუშებზე” 1,5-ჯერ მეტი “ბრიგადირია”.
და კიდევ, ქალთა სპორტის განვითარება. ეს ქალთა საფეხბურთო გუნდ “ლანჩხუთის” ხელშეწყობის პროგრამაა. მოსალოდნელ შედეგებშია წერია, რომ გუნდმა ეროვნულ ჩემპიონატში უნდა დაიკავოს საპრიზო ადგილი. “ლანჩხუთი” საქართველოს ჩემპიონია და ეს რაა, ჩემპიონობიდან უკან?” _ კითხვას სვამს ამირან გიგინეიშვილი.
