ჩოხატაურის მუნიციპალიტეტის, სოფელ სურებში ,შპს “სუფსა ენერჯი“ 7,8 მგვტ სიმძლავრის ჰესის აშენებას გეგმავს _ ამ საკითხზე დღეს ზემო სურებში სოფლის კრება გაიმართა.
“დიდი ვანის, შუა სურების და ზემო სურების მცხოვრებლების უმრავლესობას არ უნდა ამ ჰესის აშენება“, _ გვითხრა ადგილობრივმა ზურა დარსალიამ.
მისივე თქმით, სუფსის ხეობის სამივე სოფელი მიგრაციულია.
ზურა დარსალია: „როგორც გავიგეთ და ვიცი, დაგეგმილია ოთხი ჰესის მშენებლობა. სოფლის კრებაზე მოხდა განხილვა, რომელზედაც მოსახლეობამ სასტიკი უარი უთხრა ამ პროექტის წარმომადგენლებს. არ გვჭირდება ჩვენ ჰესები, არ გვაქვს გასაყიდი მიწა. თავიდან გუბერნიაში შეიტანეს განაცხადი, რომ 49-წლიანი იჯარით მიიღონ მიწის ნაკვეთები ზემო სურებში.
ჰესი იმიტომ არ გვინდა, რომ იგი არის დამაქცევარი ხეობისთვის _ დაშრება წყლები, მდინარე სუფსაში არის სამეფო კალმახი, რომლის სახეობა წითელ წიგნშია შეტანილი _ მას გაანადგურებენ და კიდევ ათასი რამ, რის განადგურება ადგილობრივების დიდ ნაწილს არ გვინდა. ამ სოფლებში უნდა განვითარდეს ტურიზმი, სასოფლო მეურნეობა უნდა გაკეთდეს და განვითარდეს სოფელი _ ეს გვინდა ხალხს და ამას მიხედოს ხელისუფლებამ“. .
სიკო ლაგვილავა: “პირდაპირ ვიტყვი _ არ მინდა ეს ჰესი. ტურისტებს მოწონT ეს მხარე და ამ კუთხით მოხდეს სოფლის გაძლიერება და განვითარება. ჩვენ სანამდე შეგვეძლება, აქ ჰესს არავის არ ავაშენებინებთ”.
გიორგი ტრაპაიძე: “მილებში უნდა გატარდეს ჩვენი მდინარე სუფსა. ეს ის სუფსაა, რომლის მიდამოებში ვიძინებდით მე და ჩემი მეგობრები. ახლა ისე მიდის საქმე, რომ აპირებენ ამ ხეობის დანგრევას. მთებს შორის რომ მდინარე გადის, აღარ იქნება და ამ პროექტზე თანახმა რატომ უნდა ვიყო?! ჩვენ ბევრი ვართ და ჩვენია ეს სოფელი, ეს მთა ჩვენია, ეს მდინარე ჩვენია. ამიტომ, აქ ჰესი არ აშენდება“.
პროექტის შესახებ მედიასთან ისაუბრა “სუფსა ენერჯის“ მენეჯერმა დავით მეზვრიშვილმა.
“ტექნიკურად ჰესი ითვალისწინებს 500 კვ.მ.-ი აუზის აშენებას, რაზეც იქნება მიერთებული მილსადენი, რომელიც გამოივლის სამი კილომეტრიან არსებულ გზას. გაიჭრება ეს გზა, ჩაიდება მილი და დაიმარხება. გზა ზემოდან იქნება უფრო მეტად კარგ მდგომარეობაში ვიდრე ახლაა. ქვემოთ, ბარამიძის წყალზე, ხიდთან გაკეთდება ქვესადგური, რომელიც გამოიმუშავებს დენს და იგივე ბარამიძის წყალში დაბრუნდება არსებული წყალი. რაც შეეხება თევზსავალს _ ზემოთ თევზისთვის ვტოვებთ 20%-ს წყალს, შემდგომ ამ სამი კილომეტრის მანძილზე შენაკადები იმდენად ძლიერია, 40%-ი წყალი შიგნით რჩება. თევზისთვის არეანაირი საშიშროება არ არის. დამატებით ვიღებთ ვალდებულებას, რომ მოვიყვანთ ლიფსიტების გარკვეულ რაოდენობას და ჩავუშვებთ წყალში.
შევხედოთ, როგორ განვითარდება მოვლენები. ჩვენ აუცილებლად დაველაპარაკებით მოსახლეობას. ვრცელდება არასწორი ინფორმაციები, მაგალითად _ იგეგმება მხოლოდ ერთი ჰესის მშენებლობა და არა რამდენიმე ჰესის, როგორც ავრცელებენ ხმებს. ერთზე მეტი ჰესის მშენებლობას ჩვენი კომპანია არ განიხილავს.
ასევე, ხეობის არანაირი დატბორვა არ მოხდება და არც გარემოზე მავნე ზეგავლენას ექნება ადგილი.
ამასთან ერთად, ბევრი სახარბიელო და სასიკეთო პროექტები გვაქვს სახელმწიფოს და სოფლის სასარგებლოდ ჩაფიქრებული“, _ აღნიშნა დავით მეზვრიშვილმა.
როგორც მედიისთვის გახდა ცნობილი, ამ კრებაზე უნდა გადაწყვეტილიყო, გადაეცემოდა თუ არა “სუფსა ენერჯის“ მრავალწლიანი იჯარით მიწის ნაკვეთი, სადაც ჰესის მშენებლობა არის დაგეგმილი _ სოფლის კრებაზე დამსწრე საზოგადოებამ “სუფსა ენერჯის“ იჯარაზე უარი უთხრა.
