დღეს, ოზურგეთის მუნიციპალიტეტის საკრებულომ 2018 წლის ბიუჯეტი 41 ხმით დაამტკიცა. ბიუჯეტი 18 მილიონ 619 ათასი ლარითაა წარმოდგენილი და ოთხ ძირითად პრიორიტეტს მოხმარდება: ინფრასტრუქტურის მშენებლობა, რეაბილიტაცია და ექსპლოატაცია; განათლების ხელშეწყობა; კულტურა; მოსახლეობის ჯანმრთელობის დაცვა და სოციალური უზრუნველყოფა.
აღნიშნულთან დაკავშირებით „გურია ნიუსთან“ კომენტარი გააკეთა „ახალგაზრდა იურისტთა ასოციაციის“ ოზურგეთის ოფისის ხელმძღვანელმა თამაზ ტრაპაიძემ. ტრაპაიძის შეფასებით, ოზურგეთში, როგორც თვითმმართველ ერთეულში, შესაძლებელია დემოკრატიის განვითარება.
_ ოზურგეთის მუნიციპალიტეტი სერიოზული გამოწვევის წინაშე დგას. დემოკრატიული განწყობის მქონე ოზურგეთელი ამომრჩევლის ნების გამოვლენის შემდეგ, დღეს დიდია ინტერესი _ შეძლებს თუ არა ოზურგეთი განახორციელოს დემოკრატიული თვითმმართველობა. თუ შეძლებს, ეს, მეტ-ნაკლებად, ყველა ოზურგეთელის დამსახურება იქნება. რა თქმა უნდა, ლომის წილი მუნიციპალიტეტის მერსა და საკრებულოზე მოდის. დემოკრატიული თვიმმართველობის გახორციელება, პირველ რიგში, დამოკიდებული იქნება მათ მიერ გახორციელებულ კოჰაბიტაციურ მუშაობაზე. მე, პირადად, არ მქონდა მოლოდინი, რომ 2018 წლის ოზურგეთის ბიუჯეტი უნაკლო იქნებოდა, რადგან საბიუჯეტო პროცესი არა ნოემბერში და მით უმეტეს, დეკემბერში, არამედ გაცილებით ადრე, მარტში იწყება. იმ დროს კი ოზურგეთის მუნიციპალიტეტი, რა სახითაც დღესაა წამოდგენილი, უბრალოდ, არ არსებობდა. თან, თუ წინა წლებსაც გადავავლებთ თვალს, არც ოზურგეთის მუნიციპალიტეტის, არც ქალაქ ოზურგეთის და არც ოზურგეთის თემთა გაერთიანების მუნიციალიტეტების ბიუჯეტები ყოფილა იდეალური და უნაკლო. ასეთი შეფასება ზედმეტ ძალისხმევასა და კვლევებსაც არ საჭიროებს, რადგან ყველა წინამორბედ ბიუჯეტში წლის განმავლობაში ცვლილებები მინიმუმ 12-ჯერ, ანუ, საშუალოდ, თვეში ერთხელ მაინც შედიოდა, ეს კი ბიუჯეტის არასწორ დაგეგმვასა და შესრულებაზე მიუთითებს, _ ამბობს ტრაპაიძე და განმარტავს, რომ ყველასთვის მოსაწონი თვითმმართველობის ბიუჯეტის მიღება შეუძლებელია;
_ ზოგს მიაჩნია, რომ იგი სოციალური პროგრამებით უნდა იყოს დატვირთული, ზოგი კულტურასა და განათლებაზე მიმართულ ბიუჯეტს ანიჭებს უპირატესობას, ზოგიც ინფრასტრუქტურული პროეტებით გაჯერებულ ბიუჯეტს და ა.შ. ყველა კი ერთზე თანმხდება: ბიუჯეტში, რაც შეიძლება მცირე უნდა იყოს ადმინისტრაციული ხარჯები.
ჩემთვის თვითმმარველობის იდეალური ბიუჯეტი არის: თვითმმართველობის საკუთარი უფლებამოსილებების განხორციელებაზე მიმართული ბიუჯეტი, სადაც მრავლადაა გათვლისწინებული ინფრასტრუქტურული პროექტები და რომელიც გათვლილია მუნიციპალიტეტის განვითარების გრძელვადიან პერსპექტივაზე. იმედია, დღეს თუ არა, ახლო მომავალში ოზურგეთი მიაღწევს ამას.
ვულოცავ თითოეულ ოზურგეთელს ბიუჯეტის დამტკიცებას, პირველ რიგში, კი საკრებულოს წევრებსა და მერს, რამეთუ კიდევ ერთხელ დავინახეთ, რომ საერთო ინტერესების დასაცავად შეუძლიათ, გვერდზე გადადონ ვიწრო ინტერესები და ოზურეგთში, როგორც თვითმმართველ ერთეულში, შესაძლებელია დემოკრატიის განვითარება“, _ ამბობს ტრაპაიძე.
