ოზურგეთის მუნიციპალიტეტის სოფელ ნატანებში, მეექვსე უბნის მცხოვრებლებმა აქცია გამართეს. მათი თქმით, ფაროსანამ თხილის მოსავალი გაანადგურა და საშიშროება ციტრუსოვნებსა და მარცვლეულსაც ემუქრება.
აქციის დროს მოსახლეობამ “გურია ნიუსთან” არა ერთ პრობლემებზე ისაუბრა.
მზია ბაქანიძე: _ მე ვარ ირაკლი ბაქანიძის დედა. ჩემმა შვილმა ჩვენი ქვეყნის თავისუფლებას შეწირა თავი.
ძალიან უჭირს მოსახლეობას: წყალი არ გვაქვს, გზა არ არის, გაზი შემოგვიყვანეს, მაგრამ რამდენი იქნება გადასახადი, არავინ იცის.
უზარმაზარი ვალები გვაქვს ბანკებში. თავი ხომ უნდა ვირჩინოთ? ხალხმა თხილის პლანტაციები გააშენა, შეღობეს, მოუარეს და მაინც საშინელი მდგომარეობაა. ეს ფაროსანა გვიტევს და გვიტევს.
მაყვალა ქუტიძე: _ 200 ლარის ღირებულების წამალი მჭირდება თვეში. პენსიაზე ვართ დამოკიდებული მე და ჩემი მეუღლე. სოციალური დახმარება მქონდა და მომიხსნეს.
რომან კუპრაძე: _ თხილი, მსხალი, ვაშლი გაანადგურა ფაროსანამ. გზა და წყალი, დიდი ხანია, არ გვაქვს. ვნახოთ, როდის მოიცლის ხალხისთვის ხელისუფლება. რა არის ჩვენს სოფელში მოწესრიგებული, იქნებ, გვითხრას ვინმემ? ყველა ოჯახს ბანკის ვალი აქვს. მხოლოდ პარლამენტარებს უნდათ საუკეთესო ცხოვრება?
მაყვალა დანელია: _ ბანკის ვალები გვაქვს, ყანა და თხილი გაფუჭდა, ახლა მანდარინის იმედზე ვართ, მაგრამ, არ მგონია, ფაროსანას გადაურჩეს. რით ვიარსებოთ? დაგვეხმაროს ხელისუფლება, კომპენსაცია მოგვცეს?
ნაირა გობრონიძე: _ ვითხოვთ მთავრობისგან, მოგვაქციოს ყურადღება. ფაროსანამ გაანადგურა თხილის მოსავალი, აწი ჩვენ შეგვჭამს. არჩევნები რომ მოდის, სოფელში მანქანა მანქანაზე მოდის _ ყველაფერს გვპირდებიან, მაგრამ არჩევნების დასრულების შემდეგ არავინ კითხულობს ხალხის ამბავს.
გუშინ პური ნისიად წამოვიღე. თხილის იმედზე ვიყავით და აღარ არის ეს თხილი. კახეთში ყოველ სეტყვაზე კომპენსაციას აძლევენ მოსახლეობას, გურიას კი პატრონი არ ჰყავს.
ნაირა გობრონიძეს საუბარში თანასოფლელი ჩაერია და ლარის გაუფასურების საკითხი შეახსენა:
_ ლარზე რატომ არ ამბობთ არაფერს, ასე რომ გაუფასურდა?!_
_ ლარი თუ არ მაქვს, რას გამიუფასურებს?! კიდევ ერთხელ ვამბობ: ხუთშაბათს და პარასკევს მთელი სოფელი გამოვალთ. კეთილი ინებოს ხელისუფლებამ და მოგვაქციოს ყურადღება, _ თქვა ნაირა გობრონიძემ.
ოზურგეთის მუნიციპალიტეტის მერის წარმომადგენლის სოფელ ნატანებში ნაირა კვაჭაძის თქმით, “ფაროსანას საწინააღმდეგო წამლობა მიმდინარეობდა გეგმიურად. სურსათის ეროვნულ სააგენტოსთან შეთანხმებით, ყველა სოფელი შეიწამლა ეტაპობრივად, არ ყოფილა შეფერხება”.
ჟურნალისტების კითხვაზე რამდენად საფუძვლიანია მოსახლეობის მოთხოვნა, ნაირა კვაჭაძე პასუხობს: “მოსახლეობის მოთხოვნა საფუძვლიანია _ მათ დახმარება ჭირდებათ და მე მათ გვერდით დავდგები.
თუ გადაწყდება კომპენსაციის დარიგება, შევაგროვებ ინფორმაციას სოფელში და აღვწერთ, რა მდგომარეობა”.
სურსათის ეროვნულ სააგენტოში განმარტავენ, რომ აზიური ფაროსანას საწინააღმდეგოდ 2018 წელს დამუშავდა 27 მუნიციპალიტეტის 523 სოფელი. მათ შორის, ღონისძიებები ჩატარდა ლანჩხუთის, ოზურგეთის, ჩოხატაურის მუნიციპალიტეტების სოფლებში:
“შარშანდელთან შედარებით სახეზეა ხელშესახები შედეგი _ მნიშვნელოვნად არის შემცირებული მავნებლის პოპულაცია და მისი გეოგრაფიული არეალი არ გაზრდილა. სტრატეგიის შესაბამისად, სახელმწიფო ყოველდღიურ რეჟიმში ახორციელებს ღონისძიებებს. ამავე დროს, მოუწოდებს მოსახლეობას, საკუთარ ნარგავებში ჩაატაროს სამუშაოები, რადგან შედეგის მიღწევა მხოლოდ ერთობლივი ძალისხმევით არის შესაძლებელი. ამასთან, თხილში გავრცელებულია სხვა მავნე ორგანიზმები, სოკოვანი, ბაქტერიული, ვირუსული დაავადებები, რომლებიც აზიანებს თხილის მოსავალს და საჭიროებს მოსახლეობის მხრიდან ჩართულობას და შეწამვლითი სამუშაოების ჩატარებას”, _ გვითხრეს სურსათის ეროვნულ სააგენტოს პრესსამსახურში.
