“სერვისი ვერ მისდევს ფასებს”, _ ასე აფასებს “გურია ნიუსთან” “საერთაშორისო ბიზნესის განვითარების და ინვესტიციების ხელშეწყობის ცენტრის” თავმჯდომარე ზვიად ელიზიანი ოზურგეთის კურორტებს.
მისი თქმით, ეს შეფასება მხოლოდ გურიის კურორტებს არ ეხება და ეს ზოგადი პრობლემაა საქართველოში.
“შეკვეთილი და ურეკი საინტერესო ადგილია ტურისტებისთვის. აქ არის მაგნიტური ქვიშა და ამიტომ, რაც შეიძლება მეტი ინფრასტრუქტურული პროექტებია გასახორციელებელი.
სასტუმროები, კაფეები, ჯერჯერობით, განვითარების დონეზეა და ბევრი რამ არის გასაკეთებელი, რომ საჭირო დონეს მიაღწიოს. არ არის საუბარი იმაზე, რომ პირველ ეტაპზე ევროპულ კურორტებს გაუწიოს კონკურენცია, მაგრამ თუ ბათუმის დონეს მაინც გაუტოლდება, კარგი იქნება.
დიდი სამუშაოებია ჩასატარებელი პლაჟების კეთილმოწყობისთვის, უფრო მეტი კაფე-ბარები, სასტუმროები, გასართობი ცენტრებია საჭირო, რომ ტურისტებისთვის მიმზიდველი გახდეს ეს ადგილები. რაც შეეხება ფასებს და სერვისს, ეს პრობლემა მთელ საქართველოშია _ ფასები მაღალია, სერვისი კი ვერ მისდევს ფასებს”, _ გვითხრა ზვიად ელიზიანმა.
“დიდ ყურადღებას არავინ აქცევს ზღვისპირა ზოლს და არ ვიცით, ეს სანამ გაგრძელდება. ეს ბოლო დღეებია, დაიწყეს პლაჟის დალაგება, მანამდე, ეტყობა, ვერ გაიგო ადგილობრივმა ხელისუფლებამ, რომ ტურისტული სეზონი დაიწყო”, _ გვითხრა შეკვეთილის დამსვენებლების ერთმა ნაწილმა.
ახლა რაც შეეხება ფასებს: შეკვეთილში, კომფორტულ კოტეჯში დასვენების ღირებულება 120 დოლარიდან იწყება.
“ერთ დღე-ღამეში ვიხდით 120 დოლარს. მე და ჩემი ოჯახი კმაყოფილები ვართ. ამაზე დიდი ფასებიც არის და როგორც ვიცი, ზღვისპირეთის სასტუმროებში უფრო მეტი ჯდება დასვენება. რაც შეეხება გარე კვებას და გასართობ საშუალებებს, რის საშუალება აქვს ადამიანს, იმის ფარგლებში, გაჭირვებით მოუწევს თავის გატანა”, _ გვითხრა ერთ-ერთმა დამსვენებელმა.
ა(ა)იპ “ოზურგეთის მუნიციპალური მომსახურების სერვისცენტრის” უფროსის თენგიზ ქუტიძის თქმით, ყველაფერი კეთდება იმისთვის, რომ დამსვენებლებს, რაც შეიძლება მეტი კომფორტი შეუქმნან:
“დილიდანვე იწყება ურეკისა და შეკვეთილის სანაპიროების დასუფთავება სპეციალური ტექნიკით. ასევე, სეზონურად 60 ადამიანი გვყავს დასაქმებული, რომლებიც ყოველდღიურად ასუფთავებენ კურორტს. სანაგვე ურნები დილით და საღამოს თავისუფლდება ნაგვისგან. არ ვიცი, ვინ რას ამბობს, მაგრამ ეს რეალობაა და ყველაფერს ვაკეთებთ, რაც შეიძლება სუფთა გარემო იყო კურორტებზე”, _ თქვა ქუტიძემ.
ოზურგეთის მუნიციპალიტეტის მთის კურორტზე, გომისმთაზე წელს ახალგაზრდების სიმრავლეა. ა(ა)იპ “კურორტ გომის მთის” უფროსი სპეციალისტი ზურაბ ჩხარტიშვილი ამბობს, რომ წელს პირველად, ერთი თვის განმავლობაში, კურორტზე აგრარული უნივერსიტეტის სტუდენტების ჯგუფი დაისვენებენ:
“სტუდენტებმა გომისმთის ტერიტორია საყოფაცხოვრებო ნარჩენებისგან დაასუფთავეს. უკვე მეორე ჯგუფი იმყოფება და ცოტა ხანში მესამე ჯგუფი ამოვა აქ. ასევე, ყოველ შაბათ-კვირას ტურისტების რიცხვი მატულობს. ასობით კარავია გაშლილი და ძალიან თბილი გარემოა”, _ გვითხრა ჩხარტიშვილმა.
მთაზე ამ დრომდე ვერ მოგვარდა წყლის პრობლემის. ოზურგეთის მუნიციპალიტეტის ბაზაზე არსებული შპს “სატისის” დირექტორი დავით ცერცვაძე ამბობს, რომ კურორტის გენერალური გამანაწილებელი ქსელი არ არის გაკეთებული.
“გურია ნიუსი” ასევე დაინტერესდა, რამდენი დაუჯდება სახლის დაქირავება კურორტზე დამსვენებლებს:
“სეზონზე სახლების ფასს 300 ლარიდან იწყება და 500 ლარამდე ადის. კურორტზე არის მაღაზიები და თონე. ყოველ წელს სიახლეებით ხდება დამსვენებლებს კურორტი. იმედია, მომავალ წელს შუქი იქნება და ამას დაემატება წყლის პროექტის ბოლომდე მიყვანა”, _ გვითხრა ზურაბ ჩხარტიშვილმა.
გომისმთაზე შეყვარებული, ქალაქ თბილისში მცხოვრები გიორგი წერეთელი სოციალურ ქსელში რამდენი წელია, კურორტის პოპულარიზაციას ეწევა.
“1) თუ თბილისიდან მიდიხართ, პირველი და მარტივი გზა არის შემდეგი: “ვაგზლიდან” მიყვებით თბილისი-ოზურგეთის მატარებელს (რომლის ბილეთები არც ისე ძვირი ღირს; თუ სტუდენტი ხართ, მით უმეტეს), რომელიც საღამოს 10-ის ნახევარზე გადის და ოზურგეთში დილის 6 საათზე იქნებით. ქალაქის დასათვალიერებლად გექნებათ 1 საათი. დაახლოებით, 07:30 წუთზე კი ავტოსადგურიდან გაყვებით შემოქმედის “მარშრუტკას” (შემოქმედი, გომი). მძღოლი 50 თეთრს გამოგართმევთ და 30 წუთში მიგიყვანთ ჰესთან, სადაც გამოივლის ყველა მანქანა, რომელიც გომის მთაზე მიდის. გურულები და, ჩვენი გავლენით, იქ დამსვენებლებიც, ძალიან გულისხმიერი ხალხია,. დიდი ხნით ცდა არ მოგიწევთ, აუცილებლად გამოივლის მანქანა, რომელიც, დაახლოებით, 40 წუთში აგიყვანთ გომის მთაზე.
2) სამარშრუტო ტაქსი ან ავტობუსი ოზურგეთიდან პირდაპირ გომის მთაზე არ მიდის, მაგრამ ქობულეთიდან კი, “მარშრუტკა”, დაახლოებით, 14:00 საათზე არის შემოქმედში, 10 წუთით ადრე ოზურგეთში და შეგიძლიათ, მას გაყვეთ, მაგრამ ბევრი თავისუფალი ადგილი არ ექნება.
3) თუ დილით ჩამოხვედით ოზურგეთში, მაგრამ ეს ვარიანტი არ მოგწონთ და გსურთ მალე ახვიდეთ, ოზურგეთიდან ტაქსი 50 ლარი დაგიჯდებათ (შევაჭრების შემთხვევაში, 40 ან ნაკლები), რომელიც 50 წუთში აგიყვანთ გომისმთაზე. პ. ს. შეგიძლიათ ტაქსით ჰესამდე ახვიდეთ, რაც 10-12 ლარი დაგიჯდებათ, ჰესიდან კი გამომვლელი მანქანის იმედად, რომელიც აუცილებლად მოვა, არც ისე დიდ დროში.
4) თუ საღამოს მუშაობდით და დილით შეგეზარათ წამოსვლა, შეგიძლიათ “მარშრუტკით” ან ავტობუსით წამოსვლა ოზურგეთში, რაშიც 15 ლარს გადაიხდით. დაახლოებით, 4 საათზე ოზურგეთში იქნებით, 5-ის ნახევარზე გაყვებით “მარშრუტკას”, რომელიც ჰესთან მიგიყვანთ. ამ დროსაც კარგი შანსი გექნებათ, რომ გომის მთაზე უპრობლემოდ ახვიდეთ.
5) ყველაზე იაფი გზა არის თბილისიდან დილის მატარებლით წამოსვლა (კარვით), 6-ზე იქნებით ოზურგეთში. კარავი გექნებათ, რომელსაც, სადაც გინდათ, დადგამთ, დილით კი, “მარშრუტკას” გაყვებით ჰესამდე და მერე ახვალთ გომის მთაზე.
6) შეგიძლიათ ბათუმის მატარებელს გამოყვეთ ურეკამდე, ურეკიდან 2 ლარად ოზურგეთში “მარშრუტკით” (15-20 ლარი ტაქსი) წახვალთ. გაითვალისწინეთ, რომ ოზურგეთიდან ჰესამდე “მარშრუტკა” დილის 07:30-სა და მერე 16:30-ზე გადის. თუმცა, დიდი პრობლემა არც სხვა დროს შეგექმნებათ ჰესამდე ასასვლელად.
7) თუ ბათუმიდან გინდათ გომის მთაზე ასვლა, “მარშრუტკები” დღის განმავლობაში სულ დადის (დაახლოებით, ერთი საათი სჭირდება ოზურგეთამდე და 5 ლარი ღირს). ასევე, მატარებელს შეგიძლიათ გამოყვეთ _ 80 თეთრად საღამოს 6-ის ნახევარზე. იგივე მატარებელი ბათუმის მიმართულებით ოზურგეთიდან დილის 8-ის ნახევარზე გადის. ასევე, შეგიძლიათ ქობულეთში ჩასვლა და იქიდან პირდაპირ გომის მთისკენ წასვლა “მარშრუტკით”, რომელიც, დაახლოებით, 13:00 საათზე გამოვა ქობულეთიდან.
გომის მთაზე კარავში ცხოვრება შეგიძლიათ, მაგრამ, თბილი ტანსაცმელი დაგჭირდებათ. თუ კარავი არ გაქვთ და დარჩენას გადაწყვეტთ, პრობლემა არც ეგ იქნება _ შეგიძლიათ, თხოვოთ იქ მყოფ პოლიციელებს ან გომის მთის ყარაულს, რომლის პოვნაც არ გაგიჭირდებათ და ღამით გარეთ არავინ დაგტოვებთ.
გზად შეგიძლიათ მოინახულოთ სოფელი შემოქმედი, შემოქმედის ეკლესია, ვარლამ სიმონიშვილის სახლ-მუზეუმი, ბჟუჟ-ჰესი და ჰესის კაშხალი, იბანაოთ მდინარე ბჟუჟში, დატკბეთ მისი ხეობის სიმწვანით.
შეგიძლიათ, ეს ინფორმაცია გაუზიაროთ თქვენს მეგობრებს ან ნებისმიერ ადამიანს, ვისაც აინტერესებს, თუ როგორ მოხვდეს გომის მთაზე. თუ კიდევ რამე დაგაინტერესებთ, არ მოგერიდოთ _ შეგიძლიათ, გვკითხოთ. არ ვართ აგრესიული ხალხი”, _ წერს სოციალურ ქსელში გიორგი წერეთელი.
