საქართველოს პრეზიდენტმა, სალომე ზურაბიშვილმა, პარლამენტში ყოველწლიური მოხსენებისას სასამართლო რეფორმაზეც გაამახვილა ყურადღება და აღნიშნა, რომ ზოგი სამართლიანი და ზოგიც – პოლიტიკურად მოტივირებული კრიტიკის მიუხედავად, რეფორმების შედეგად პროგრესი უდავოა.
„აღსანიშნავია, რომ ადამიანის უფლებების სასამართლოში მკვეთრად შემცირებულია საქართველოდან მიმართვიანობა, რომელიც წარმოადგენს სასამართლო სისტემის მიმართ საზოგადოების ნდობის ერთ-ერთ – თუ არა ერთადერთ – ობიექტურ კრიტერიუმს. ასევე უდავოა, რომ ჩვენი სასამართლო სისტემა ჯერ ვერ შეედრება ევროპის საუკუნეთა განმავლობაში ჩამოყალიბებულ და დახვეწილ სასამართლო სისტემას. ეს, ალბათ, გასაკვირიც არ უნდა იყოს, თუ გავიხსენებთ, საიდან მოვდივართ და რა წნეხი მოახდინა საბჭოთა რეჟიმმა. ამიტომ მოსამართლის დამოუკიდებლობა და სასამართლო სისტემის საზოგადოებრივი ნდობის გაზრდა ქვეყნისთვის კვლავ პრიორიტეტად რჩება. ამ კუთხით იუსტიციის უმაღლესი სკოლის რეფორმის სწრაფი და სრული იმპლემენტაცია გვისახავს გზას მომავლისკენ,“_ განაცხადა ზურაბიშვილმა.
