“ყოველდღე ყოველი ახალი ნახატის შექმნა  არის ჩემს თავში ახალი აღმოჩენა”

ახალგაზრდა ხელოვანი მიშო გვამბერაძე მხოლოდ 15 წლისაა და  მისი ავტორობით უკვე 150-მდე ნამუშევარი არსებობს. როგორც მიშო ჩვენთან საუბარში ჰყვება, დიდი სურვილი აქვს, მისი ნამუშევრები ყველა მის ახლობელს ჰქონდეს. ამიტომაც მისი ნახატების ნახევარი უკვე კონკრეტული ადამიანების მფლობელობაშია.

_ ხატვა 12 წლის ასაკში დავიწყე და ჩემი მოტივატორი მხატვარი ბაბუა იყო. ბაბუა ქმნიდა მინიმალისტურ ნახატებს _ ძირითადად, ქალის ნატურებს ხატავდა. მისი გარდაცვალების შემდეგ რაღაც პერიოდი არ დამიხატავს. თუმცა, შემდეგ ისევ გამიჩნდა ხატვის სურვილი, რაშიც დიდი როლი ითამაშა ჩემს სკოლის მასწავლებელმა. მაძლევდა რჩევებს, რომ ხატვა არ შემეწყვიტა. ამან მომცა სტიმული და ხატვა გავაგრძელე ტილოზე”.

მიშოს ნახატების რაოდენობა დღითიდღე იზარდა. დღეს ის თვითნასწავლი მხატვარია. როგორც თვითონ ამბობს, მისი საქმიანობისთვის მნიშვნელოვანია გარემო, რაშიც ძალიან დიდი მხარდაჭერა აქვს ოჯახისგან. მიშომ ხატვა რომ არ შეწყვიტოს მშობლები მაქსიმალურად ცდილობენ, საკუთარი სახსრებით შეიძინონ ყველა საჭირო ინვენტარი.

_ ჩემთვის ნახატში მნიშვნელოვანი ის კი არ არის, რამდენად ლამაზია ის, არამედ ის აზრი, რისთვისაც ნახატი შეიქმნა და რამდენად შევძელი ამის გადმოცემა. შემიძლია, ნებისმიერ დროს, როცა მუზა მომივა, ავდგე და დავხატო. არ აქვს მნიშვნელობა, რომელი საათია. ბევრჯერ ხატვაში დამთენებია.

_ ახლა რა ეტაპზე ხარ?

_ საკუთარი თავის ძიებაში ვარ და ვცდილობ, ფერებით ვწერო, რაც არის ფერწერა თავისი შინაარსით. მწერლები კალმით წერენ თავიანთ გრძნობებზე, მხატვრები კიდევ ფერებით გადმოსცემენ სათქმელს. შეიძლება ადამიანმა იცის სწორად ხაზის გავლება, კონტრასტი და ის დეტალები, რაც ხელოვნებაშია, მაგრამ ეს არ ნიშნავს იმას, რომ მან იცის ხატვა. მხატვარს ნამუშევრის შექნის პროცესში უნდა შეეძლოს გრძნობების გადმოცემა. ამ დროს ის სრულ თავისუფლებას უნდა გრძნობდეს. 

_ როგორია შენი სამომავლო გეგმები?

_ ვაპირებ  ჩავაბარო არქიტექტურის ფაკულტეტზე და ხატვა გავაგრძელო. მინდა ადამიანებმა გამიცნონ, როგორც კარგი ფერმწერი. მოტივაცია გავხდე იმ ადამიანებისთვის, რომლებსაც სურდათ, დაეხატათ და ყოფილიყვნენ მხატვრები, მაგრამ შიში და საკუთარ თავში ეჭვი აბრკოლებდათ.

მიშოს ოცნებობაა პერსონალური გამოფენის მოწყობა, სადაც შეძლებს საკუთარი ნამუშევრები გააცნოს ადამიანებს, რომლებიც დაინტერესებულები არიან ხელოვნებით და აინტერესებთ მოზარდის თვალით დანახული სამყარო.