“რა არის ეს “სკოპინგი” და “გეზეშე”? ჯერ ეს აუხსენით ხალხს!”

6 დეკემბერს, შპს “უნივერსალ ენერჯი ქორ-ფორეიშენის” მიერ “ნატანების” ჰესის მშენებლობის სკოპინგის ანგარიშის საჯარო განხილვა სოფელ ვაკიჯვარში გაიმართა.

ადმინისტრაციული შენობის დარბაზმა ადგილობრივები ძლივს დაიტია.

შეხვედრას ესწრებოდნენ გარემოს დაცვისა და სოფლის მეურნეობის სამინისტროს წარმომადგენელი გურამ ყაფლანიშვილი, სკოპინგის ანგარიშს შპს “გამა კონსალტინგის” წარმომადგენელი ჯუღული ახვლედიანი უძღვებოდა. განხილვას, ასევე, ესწრებოდნენ: გურიის მხარის და ოზურგეთის მუნიციპალიტეტის ხელისუფლების წარმომადგენლები _ გურიის გუბერნატორის პირველი მოადგილე აკაკი შენგელია, მოადგილე ქეთი მოისწრაფიშვილი, მუნიციპალიტეტის მერის პირველი მოადგილე ალექსანდრე სურგულაძე და გარემოს დაცვის სპეციალისტი ირინა ინარიძე.

დასაწყისიდანვე გამოიკვეთა ჰესის მშენებლობის მომხრე-მოწინააღმდეგეთა წინააღმდეგობა, რაც დარბაზში მყოფ ვაკიჯვრელთა შორის სიტყვიერ დაპირისპირებასა და ურთიერთშეურაცხყოფაში გადაიზარდა.

ინვესტორის წარმომადგენლები სოფლის მოსახლეობასთან, როგორც თავად თქვეს, გაცნობითი ხასიათის შეხვედრას ატარებდნენ. მათი განმარტებით, ჰესის აშენების შემთხვევაში, გარდა დასაქამებისა, ადგილობრივებს თავაზობდნენ ინვესტირებას სოციალურ პროგრამებში, რაც სოლიდური ფულადი თანხით იქნება გამოხატული. გარდა ამისა, თუ შეიქმნება საინიციატივო ჯგუფი, ასევე, 250 ოჯახს გადაუხდიან 200 კილოვატ საათის ელექტროენერგიის თანხას მანამ, ჰესი იარსებებს.

თუმცა, ეს ადგილობრივებმა სარწმუნოდ არ მიიჩნიეს.

_ ვინ მოგიწვიათ, რატომ მოხვედით? არ გაგაჩანაგებინებთ, რა არის ეს “სკოპინგი” და “გეზეშე”? ჯერ ეს აუხსენით ხალხს. სამი წელია, მდინარეზე ბავშვებს არ უბანავიათ, 4 კილომეტრს რომ “ტრუბაში” წყალი გაივლის, იმ ხეობას რა მოუვა? _ ისმოდა ინვესტორის წარმომადგენელთა მისამართით.

შეხვედრის დროს, როცა ინვესტორის წარმომადგენლები მონიტორზე პროექტის შესახებ სლაიდებს აჩვენებდნენ, ერთ-ერთი ვაკიჯვრელი მივიდა გურამ ყაფლანიშვილთან, ჩაულაპარაკა, აქ თქვენ ჰესს ვერ ააშენებთო და უცებვე გაეცალა.

მოსახლეობის მომხრე-მოწინააღმდეგეებმა ერთმანეთს არაერთხელ მიაყენეს შეურაცხყოფა.

ბოლოს, ერთმა ნაწილმა პროტესტის ნიშნად, დარბაზი დატოვა.

_ ვინც წინააღმდეგი ვართ, გავიდეთ, _ ამ მოწოდებაზე დარბაზი ნახევრად დაიცალა.

განხილვა თანდათან დაპირისპირების რეჟიმში გადაიზარდა და ვიდრე დარბაზში ერთი ნაწილი ხელმოწერებს აგროვებდა, თანხმობის ნიშნად, მეორე ნაწილი, პროტესტის ნიშნად გარეთ გავიდა.

დარბაზში განხილვის გაგრძელებას დაესწრნენ, ძირითადად, ჰესის აგების მომხრეები, უფრო მცირე რაოდენობით.

ინვესტორის წარმომადგენლებმა განმარტეს, რომ “ნატანები-3 ჰესი” წინასწარი ტექნიკურ-ეკონომიკური ანგარიშის მიხედვით, 9,085 მეგავატ სიმძლავრეზეა გათვლილი. ეს სიმძლავრე არის წინასწარი კვლევების შედეგი, რომელიც ტექნიკურ-ეკონომიკური კვლევების (მათ შორის, გარემოსა და სოციალური ზემოქმედების) შემდეგ დაზუსტდება. ჰესის სათავო ნაგებობა ზღვის დონიდან 652 მეტრზე, ქორბუდეში იქნება, კაშხლის სიმაღლე _ 8,2 მეტრი, ხოლო სადაწნეო მილების სიგრძე 4635 მეტრი. ელექტროსადგურის შენობა განკუთვნილი იქნება 5 პელტონის ტიპის ვერტიკალური ჰიდროაგრეგატის დამონტაჟებისა და ექსპლოატაციისათვის.

_ ხალხს ჰკითხეთ, უნდა თუ არა ჰესის მშენებლობა? უცხოელებს რატომ უნდა მიჰქონდეთ ან რატომ უნდა გვინადურებდეს ვიღაც ყველაფერს? კომპანია მილიონებს იშოვნის, ჩვენ რა? თითოეული ბუც კი ვიცი, სად არის ხეზე, ეს ჩვენი ტყეები გვიფარავს და გვიცავს, ვის ჰკითხეთ, რა გინდათ? _ კატეგორიულად ეწინააღმდეგებოდა სტუმრებს ვაკიჯვრელი შალვა დოლიძე.

_ დენს კი გვპირდებიან, მაგრამ ზღაპარია, სანამ ჰესი იარსებებს, ამათ ჩვენ უფასოდ რაიმე მოგვცენ, _ ისმოდა დარბაზიდან. თუმცა, იურისტი ბესო ციმაკურიძე არწმუნებდა მათ, რომ პირობა არ დაირღვეოდა.

_ გასული საუკუნის 60-იან წლებში ყველა სატყეო უბანში გაიყვანეს გზები ხე-ტყის გამოსატანად, ვაკიჯვრის ტყეში კი _ არა. თუ იცით, რატომ? იმიტომ, რომ ვაკიჯვრის ტყე უნიკალურია და მოერიდნენ ბუნებაში უხეშ ჩარევას, _ თქვა გაბრაზებულმა ილია ჭანუყვაძემ.

ვაკიჯვრელი ია ურუშაძე შეეცადა, არგუმენტირებულად ესაუბრა:

_ ჩვენთან შესახვედრად კომპანიის სათავეში მყოფმა ადამიანებმა არასდროს ისურვეს. მე არ მინდა დაპირისპირება, არამედ სპეციალისტების მყარი არგუმენტები, რასაც ვერ ვისმენთ. თურმე ჯერ შესწავლილი არ ყოფილა გარემო. ვინც ამ დარბაზში ფიქრობს, ჰესი უნდა, მათ აქვთ პიროვნული სარგებელი, სხვანაირად ეს არ აიხსნება, _ თქვა მან.

_ ხომ არსებობს ალტერნატიული წყაროები _ არის ქარის ენერგია, მზის ენერგია. გვინდა რეგიონში ტურისტები შემოვიდნენ, მაგრამ რას ნახავენ, თუკი ბუნებას დავაზიანებთ? _ დასვა კითხვა სოფო ვასაძემ.

როცა დარბაზიდან ვაკიჯვრელთა უმრავლესობა გავიდა, ერთ-ერთმა ვაკიჯვრელმა ირინა მდინარაძემ თქვა, ისინი ვაკიჯვრელები არ იყვნენ:

_ ქალაქიდან ამოვიდნენ. იჯდა ერთი ბაზართან, ხელმოწერებს აგროვებდა, ჩარიეს “ძველი ბიჭები”, ვიღაცეები და ამოიყვანეს აქ, რომ ჰესის მშენებლობას შეეწინააღმდეგონ, _ თქვა მან.

 ოზურგეთიდან ამოსულ პირთა რაოდენობას, რომლებიც მართლაც იყვნენ დარბაზში, აშკარად ჭარბობდნენ ადგილობრივები.

ირინა მდინარაძემ რამდენჯერმე დასვა კითხვა _ რა სარგებელს მისცემდა სოფელს ჰესის მშენებლობა. მას შპს “უნივერსალ ენერჯი ქორფორეიშენის” პროექტის მენეჯერმა გასცა პასუხი:

_ მშენებლობაზე 160-170 კაცი დასაქმდება, საიდანაც 60-70 პროცენტი ადგილობრივები იქნებიან. ეს მშენებლობა 2 წლის განმავლობაში გაგრძელდება. გარდა ამისა, ჩამოყვანილ მუშახელს ხომ დასჭირდება ბინა, კვება _ ესეც სოფლის მცხოვრებლების დამატებითი შემოსავლის წყარო იქნება. ვაკიჯვრელებს, დაახლოებით, 250 კომლს 200 კილოვატი ელექტროენერგიას ყოველთვიურად უფასოდ მივაწვდით. თქვენ აყენებთ საკითხს საინიციატივო ჯგუფის შექმნის შესახებ. ჩვენ თანახმა ვართ.

სკოპინგის ანგარიშის განხილვას არასამთავრობო სექტორიც ესწრებოდა.

ახალგაზრდა იურისტთა ასოციაციის ოზურგეთის ოფისის ხელმძღვანელმა თამაზ ტრაპაიძემ იკითხა, რამდენად იქნება იურიდიულად გამყარებული მოსახლეობაზე გაცემული შეპირებები და რა ხანგრძლივობითაა გათვალისწინებული ვაკიჯვრელებისთვის 200 კილოვატი ელექტროენერგიის უფასოდ მიწოდება, რაზეც უპასუხეს, რომ ხელშეკრულება ოზურგეთის მუნიციპალიტეტთან გაფორმდება, შემდეგ კი ვაკიჯვრელებზე გავრცელდება.

არაერთხელ გაიმეორეს, რომ ხელშეკრულების მოქმედების ვადა ჰესის მოქმედების პერიოდში მუდმივი იქნება. ადგილობრივებმა დასვეს კითხვა, უფასოდ მიეწოდებათ თუ არა ელექტროენერგია ვაკიჯვრის თემში შემავალ სოფელ ფამფალეთის მოსახლეობას, რასაც დუმილით უპასუხეს.

საბოლოოდ, დარჩა შთაბეჭდილება, რომ მიუხედავად ორ ბანაკად გაყოფისა, პროცესი ერთგვარად მართული იყო ორივე მხრიდან და საქმე მკლავის გადაწევას ჰგავდა.

მომდევნო შეხვედრა, როგორც იქ ითქვა, ორი თვის შემდეგ შედგება.