Facebook-ზე ვირისულად გავრცელდა ფოტო, რომელზეც თითქოს COVID-19-სგან დაღუპული იტალიელი ექიმები არიან გამოსახული.
როგორც ვებპორტალი “მითების დეტექტორი” იუწყება, ეს პირველად 24 მარტს ფეისბუქ გვერდზე “rhemz TV” გამოქვეყნდა, წარწერით “იტალიაში 200-მდე ექიმი და ექთანი გარდაიცვალა.. ღმერთმა დაიფაროს მსოფლიო ვირუსისგან. ვილოცოთ იტალიისთვის”.
სინამდვილეში ეს ფოტო ცნობილი ამერიკული სერიალის “გრეის ანატომიის” გადასაღები მოედნიდანაა. ეს კადრი სერიალის მე-3 სეზონის მე-14 ეპიზოდშია. თუ ფოტოს Google image-ის საშუალებით მოვიძიებთ, ვნახავთ, რომ ის პირველად 2006 წელს გამოქვეყნდა ვებ-გვერდზე gettyimage.com წარწერით “გრეის ანატომია”, ხოლო 2015 წელს გასართობმა პორტალმა Hollywood.com იგივე ფოტო ტელესერიალების ისტორიაში ყველაზე წარმოუდგენელი სამედიცინო ამბების საილუსტრაციოდ გამოიყენა. “გრეის ანატომიის” ამ სერიაში ექიმები ოპერაციისას პაციენტის სისხლით მოიწამლნენ და გული წაუვიდათ.
იტალია იმ ქვეყნებს შორისაა, რომლებსაც კოორნავირუსმა ძლიერი დარტყმა მიაყენა და დღეის მონაცემებით, დაახლოებით 21 000-მდე ადამიანი იმსხვერპლა.
