თბილისის მერის მოადგილემ, ირაკლი ლექვინაძემ 2016 წელს, 50 000-დოლარად ბინა შეიძინა, რომლის რემონტისთვისაც 25000 ლარი დახარჯა. ამის შესახებ ლექვინაძის ქონებრივ დეკლარაციაშია აღნიშნული, რომელიც მან 2017 წლის 6 აპრილს შეავსო.
ქონებრივი დეკლარაციის მიხედვით, შენაძენი ნუცუბიძის მე-4 მიკრო რაიონში მდებარეობს და მისი ფართობი 90,00 კვ.მ-ია.
გარდა ამისა, ირაკლი ლექვინაძის 100,00%-იან საკუთრებაშია 2015 წელს, 4000,00-დოლარად ნაყიდი 595,00 კვ.მ-ის ფართობის მიწის ნაკვეთი თბილისში, სოფელ აგარაკის დასავლეთ ტერიტორიაზე და 2013 წელს, 38000,00-დოლარად შეძენილი 88,00 კვ.მ-ის ფართობის საცხოვრებელი სახლი თბილისში, თემქის მე-4 მიკრო რაიონში.
რაც შეეხება ირაკლი ლექვინაძის ფინანსურ მდგომარეობას, დეკლარაციიდან ირკვევა, რომ მისი შემოსავალი თბილისის მერის მოადგილის პოსტიდან გასულ წელს 75 320,00 ლარი იყო, ხოლო ილიას სახელმწიფო უნივერსიტეტიდან, სადაც ის მოწვეული ლექტორი იყო – 1020,00 ლარი. დეკლარაციის შევსების მომენტში კი, საქართველოს ბანკის სახელფასო ანგარიშზე მას 2790,00 ლარი ერიცხებოდა.
ამავე დეკლარაციის მიხედვით, ბინის შესაძენად, ირაკლი ლექვინაძეს 65000,00-დოლარიანი იპოთეკური სესხი ბანკ „რესპუბლიკადან“ 2016 წლის აგვისტოში აუღია და ვადა 2026 წელს ეწურება. გასულ წელს კი, ბანკისთვის პროცენტის დასაფარად 4661,90 დოლარი გადაუხდია.
მოგვიანებით, 2016 წლის 28 დეკემბერს, ბინის რემონტისთვის დამატებით, 5000,00-დოლარიანი სესხი აქვს აღებული.
გარდა ამისა, ირაკლი ლექვინაძის სახელზე კიდევ ერთი 28000,00-დოლარიანი სესხია (რეფინანსირება), რომელიც მას 2013 წელს აუღია და ვადა 2023 წელს ეწურება. გასულ წელს კი, ბანკისთვის 20660,65 დოლარი გადაუხდია.
დეკლარაციაში ასევე აღნიშნულია, რომ ირაკლი ლექვინაძეს ბინის რემონტისთვის 25000,00 ლარი აქვს გადახდილი.
ამავე დეკლარაციის თანახმად, ირაკლი ლექვინაძეს შპს „ჯორჯიან ბიზნეს ენდ პოლითიქალ ინსაით – BPI“-ს პარტნიორი და 33,00%-იანი წილის მფლობელია (თანაპარტნიორი გიორგი აბაშიშვილი).
ასევე, ის ფლობს 50%-იან წილს შპს „ლივო“-ში და შპს ,,გაყიდვების მართვის კომპანია“-ში, რომლის თანაპარტნიორი ორივე შ-პს-ში გოგა სამუშიაა.
ირაკლი ლექვინაძეს 33,00%-იანი წილი აქვს შპს ,,კაუკასიან ბიზნეს ვიქ – CBW“-შიც (თანაპარტნიორები ნუცა გალუმაშვილი, ლევან ბეგლარიშვილი), თუმცა უნდა აღინიშნოს რომ არცერთი შპს-დან გასულ წელს შემოსავალი მიღებული არ აქვს.
რაც შეეხება თბილისის მერის მოადგილის გასული წლების შემოსავლებს, საჯარო სამსახურის ვებ-გვერდზე განთავსებული დეკლარაციებიდან ირკვევა, რომ 2015 წელს, მისი შემოსავალი თბილისის მერიიდან – 46 400.00 ლარი, ხოლო ილიას სახელმწიფო უნივერსიტეტიდან (მოწვეული ლექტორი) – 7262.40 ლარი იყო.
2014 წელს კი, ლექვინაძის შემოსავალი, ჯამში 49 524 ლარი იყო.
კერძოდ, ირაკლი ლექვინაძემ ილიას სახელმწიფო უნივერსიტეტიდან (მოწვეული ლექტორი) 37276.00 ლარი მიიღო; შავი ზღვის საერთაშორისო უნივერსიტეტიდან – 1320.00 ლარი; ნიდერლანდების ინსტიტუტი მრავალპარტიული დემოკრატიული საქართველოს ოფისიდან (ტრენერი) _ 2443.00 ლარი; ააიპ ევროპის სახლიდან (ტრენერი) – 1585.00 ლარი; შპს „ჯეპრადან“ (კონსულტანტი)- 3900.00 ლარი; ხოლო შპს „ნოდია, ურუმაშვილი, პარტნიორები“-დან (კონსულტანტი) – 3000.00 ლარი.
