ოზურგეთში ტრიქინელოზის დადასტურებული შემთხვევის დაფიქსირების ფაქტთან დაკავშირებით, “გურია ნიუსი” ოზურგეთის საზოგადოებრივი ჯანდაცვის ცენტრის ეპიდემიოლოგ ელზა სიმონიშვილს ესაუბრა.
ეპიდემიოლოგი აღნიშნავს, რომ დაავადების შესახებ ინფორმაცია ჯანდაცვის ცენტრში მიღებული იქნა დკსჯეც-დაავადებათა კონტროლის ეროვნული ცენტრიდან 27.01.25.
“შემთხვევა დადასტურებისთანავე დაფიქსირებული იქნა ,,დზეის-დაავადებებზე ზედამხედველობის ერთიან ეროვნულ სისტემაში“, რადგანაც ის წარმოადგენს მძიმე ინფექციურ დაავადებას, რომელიც ექვემდებარება სასწრაფო 24 საათიან შეტყობინებას.
შეტყობინების მიღებისთანავე ოზურგეთის ჯანდაცვის ცენტრის მიერ განხორციელდა ეპიდკვლევა. დაავადებული გახლავთ ოზურგეთის მუნიციპალიტეტის მცხოვრები 1963წ დაბადებული მამაკაცი, რომელსაც პარაზიტოლოგიის ინსტიტუტში ლაბორატორიული კვლევით დაუდასტურდა ტრიქინელოზით დაავადება, პაციენტი ამჟამად ჰოსპიტალიზებულია.
ეპიდკვლევით დადგინდა, რომ დაავადებულ პირს აღენიშნებოდა შემდგომი სიმპტომატიკა:
ტემპერატურის მატება დაახლოებით 2 კვირის განმავლობაში, ასევე უჩიოდა პერიოდულად კუნთების ტკივილს. გაირკვა, რომ მან საკვებად მიიღო სოფელ ოზურგეთში ნაყიდი ღორის ხორცი და ღორის თავი, ასევე ნაყიდი კუპატი. როგორც პაციენტი აღნიშნავს, მის გარდა ხორცი ოჯახში ჭამა ერთმა ადამიანმა, რომელსაც ამ ეტაპზე დაავადება არ აღენიშნება, პაციენტი ვერ ასახელებს სხვა პირს, ვისაც აღნიშნული ხორც-პროდუქტები საკვებად მიღებული აქვს. ასევე ვერ ასახელებს ხორცისა და სურსათის გამყიდველის ვინაობას.
შეტყობინების მიღებისთანავე ოზურგეთის ჯანდაცვის ცენტრის მიერ ინფორმაცია გადაეცა სურსათის უვნებლობის რეგიონულ სამსახურს შემდგომი რეაგირებისათვის”,_ ამბობს ელზა სიმონიშვილი.
_რა დაავადებაა ტრიქინელოზი და რა გზით ავადდება ადამიანი ?
_ ტრიქინელოზი არის პარაზიტული ჭიით გამოწვეული მძიმე ინფექციური დაავადება.
ადამიანი ტრიქინელოზით ავადდება თერმულად ცუდად დამუშავებული ტრიქინელოზით დაავადებული, ვეტერინარულად შეუმოწმებელი ხორცისა და ხორცპროდუქტების საკვებად გამოყენებისას.
საქართველოში ადამიანების უმეტესობაში ინფექცია ვითარდება ღორის ხორცით კვების შედეგად.
ამასთანავე ხორცის დამარილებით, შებოლვით ან გაყინვით (მაგ: ლორი) პარაზიტი არ კვდება. ხოლო ზოგჯერ უმი ხორციდან გადაეცემა დაავადება, ვინაიდან საკვების მომზადებისას, დიასახლისები გემოს უსინჯავენ ფარშს.
ყველაზე ხშირად ღორების ტრიქინელოზით ინფიცირება ხდება მათი ნაგავსაყრელებზე და ტყეში კვებისას, რა დროსაც ჭამენ სხვადასხვა ცხოველთა ლეშსაც. განსაკუთრებით საყურადღებოა მღრღნელების ლეში, რადგანაც პარაზიტებით ხშირად ავადდებიან სწორედ მღრღნელები.
ლაბორატორიული ვეტერინარული კონტროლისას გამოვლენილი ტრიქინელოზიანი ხორცის საკვებად გამოყენება დაუშვებელია და ექვემდებარება განადგურება- უტილიზაციას.
ადამიანში ტრიქინელოზით დაავადებისას ხშირია ძლიერი ალერგიული რეაქცია, დასნებოვნებული ღორის ხორცის ჭამიდან 2-3 კვირის შემდეგ ადამიანს უშუპდება ქუთუთოები, შემდეგ – მთელი სახე, ეწყება კისრისა და კიდურების კუნთების ტკივილი, მატულობს ტემპერატურა. არის ცვლილებები სისხლის ფორმულაში.
დაავადების სიმძიმე და კლინიკური ნიშნების გამოვლენის დრო დამოკიდებულია ადამიანის ორგანიზმში მოხვედრილი ტრიქინელების რაოდენობაზე, რაც უფრო ძლიერ დაინფიცირებული ხორცია გამოყენებული საკვებად – მით უფრო მძიმედ მიმდინარეობს დაავადება.
რაც შეეხება დაავადების პირველად, ანუ საწყის ნიშნებს და სიმპტომებს, ეპიდემიოლოგი ამბობს:
“დიარეა(კუჭ-ნაწლავის აშლილობა), მუცლის ტკივილი, დაღლილობა, გულისრევა და პირღებინება,
დაახლოებით ერთი კვირის შემდეგ ახასიათებს კუნთების ტკივილი და მგრძნობელობის მომატება, ტემპერატურის მატება, ქუთუთოებისა და სახის შეშუპება, სისუსტე, თავის ტკივილი, მგრძნობელობის მომატება სინათლისადმი, კონიუქტივიტი(თვალების სიწითლე), ყლაპვის გაძნელება და სხვა.
კუნთების გარდა, ტრიქინელები შეიძლება შეიჭრას თვალში, ასეთ შემთხვევაში შესაძლებელია განვითარდეს სიბრმავე.
თავის ტვინში შეჭრისას, მძიმე ენცეფალიტი ყალიბდება.
აღნიშნული გართულებების თავიდან ასაცილებლად, აუცილებელია, დაავადების პირველივე ნიშნების გამოვლენისთანავე მიმართოთ ექიმს.
დაავადების პრევენციისთვის(თავიდან აცილებისათვის) აუცილებელია:
არ შეიძინოთ ხორცი გზებზე ან თვითნებურად ორგანიზებულ ,,ბაზრებზე“.
არ გამოიყენოთ საკვებად და ვეტერინარულად შეუმოწმებელი შინაური და გარეული ცხოველების ხორცი;
არ მიირთვად უმი ან თერმულად ცუდად, არასრულყოფილად მოხარშული/შემწვარი ხორცი;
ეცადეთ არ დაუშვათ მღრღნელების გამრავლება გარემოში.
ხორცპროდუქტები შეიძინეთ, მხოლოდ სანდო და სპეციალიზებულ სავაჭრო ობიექტში.
გახსოვდეთ, ხორცის დამარილება, შებოლვა და გაშრობა პარაზიტს არ კლავს.
ოზურგეთის საზოგადოებრივი ჯანდაცვის ცენტრი გთხოვთ, გაითვალისწინოთ აღნიშნული რჩევები ტრიქინელოზით ინფიცირების თავიდან ასაცილებლად”,_ ამბობს ელზა სიმონიშვილი.
