საქართველოს პარლამენტის 2020 წლის 31 ოქტომბრის არჩევნებისთვის საგარეო საქმეთა სამინისტროს ინფორმაციით, 38 ქვეყანაში 52 უბანია გახსნილი. ტრადიციულად, საარჩევნო უბნები იხსნება შემდეგ ქვეყნებში: ავსტრიის რესპუბლიკა, ამერიკის შეერთებული შტატები, ბელარუსის რესპუბლიკა, ბელგიის სამეფო, ბულგარეთის რესპუბლიკა, გერმანიის ფედერაციული რესპუბლიკა, დანიის სამეფო, დიდი ბრიტანეთი, ესპანეთის სამეფო, ესტონეთის რესპუბლიკა, თურქეთის რესპუბლიკა , ირლანდია, ისრაელის სახელმწიფო, იტალიის რესპუბლიკა, კანადა, კვიპროსის რესპუბლიკა, ლატვიის რესპუბლიკა, ლიეტუვას რესპუბლიკა, მოლდოვას რესპუბლიკა, ნიდერლანდების სამეფო, პოლონეთის რესპუბლიკა, პორტუგალიის რესპუბლიკა, საბერძნეთის რესპუბლიკა, საფრანგეთის რესპუბლიკა, სლოვაკეთის რესპუბლიკა, სომხეთის რესპუბლიკა, უზბეკეთის რესპუბლიკა, უკრაინა, უნგრეთი, ქუვეითის სახელმწიფო, ყაზახეთის რესპუბლიკა, შვედეთის სამეფო, შვეიცარიის კონფედერაცია, ჩეხეთის რესპუბლიკა, კატარის სახელმწიფო, ჩინეთის სახალხო რესპუბლიკა, ნორვეგიის სამეფო.
რადგანაც სხვადასხვა ქვეყანაში სხვადასხვა ვითარებაა კორონავირუსის გავრცელების გამო, ცესკო იუწყებოდა, რომ უბნების ფუნქციონირება დამოკიდებული იქნებოდა მოცემული დროისთვის კონკრეტულ ქვეყანაში დაწესებულ აკრძალვებზე. ამასთან, პანდემიით გამოწვეული შეზღუდვებიდან გამომდინარე, ყველა ქვეყანას შემუშავებული აქვს შესაბამისი რეგულაციები და აუცილებელია ადგილსამყოფელ ქვეყანაში მოქმედი წესების და პროტოკოლების დამორჩილება.
საქართველოს საგარეო საქმეთა მინისტის განცხადებით, ორ ქვეყანაში – აზერბაიჯანის რესპუბლიკაში და საბერძნეთის რესპუბლიკაში (ქ.თესალონიკში) – ადგილობრივი ხელისუფლების მიერ არ იქნა დაშვებული საარჩევნო უბნის გახსნა.
ზალკალიანის განცხადებით, ქ. თესალონიკში, რომელიც ადგილობრივი ხელისუფლების ოფიციალური ცნობით წითელ ზონად არის გამოცხადებული, მოქმედებს ე.წ. სრული ლოქდაუნი, რის გამოც არ გაიცა საარჩევნო უბნის გახსნის ნებართვა.
„ბუნებრივია არავითარი პოლიტიკური სარჩული ქ. თესალონიკში საარჩევნო უბნის გაუქმებას არ ქონია, ვინაიდან ადგილობრივი ხელისუფლების მიერ არ გაიცა შესაბამისი ნებართვა. საერთაშორისო პროტოკოლით, ყოველ ჯერზე როდესაც საქართველო ატარებს სხვა სახელწიფოებში საარჩევნო პროცესს, ამის შესახებ ვაფრთხილებთ ადგილობრივ ხელისუფლებას და ვიღებთ მათ ნებართვას. ამ შემთხვევაში ბერძნული მხარის მიერ არ იქნა გაცემული ნებართვა”- აღნიშნა მინისტრმა.
აზერბაიჯანის რესპუბლიკასთან დაკავშირებით კი მინისტრმა განმარტა, რომ ქვეყანაში არსებული საომარი მდგომარეობის გამო მიღებულ იქნა ოფიციალური შეტყობინება, რომ საარჩევნო უბნის გახსნის შესაძლებლობა არ იქნება.
„დანარჩენ ქვეყნებში, სადაც წინა წლებში არჩვენები ტარდებოდა, საქართველოს მოქალაქეების უფლება – არჩევნებში მიიღონ მონაწილეობა – უზრუნველყოფილია,“ – ამბობს დავით ზალკანიანი.
“გურია ნიუსი“ დაინტერესდა, თუ რამდენი უბანი გაიხსნა საზღვარგარეთ და როგორია 12 საათისთვის ამომრჩევლის აქტიურობა. ონლაინ ჩათში, რომელიც გამართულად და ოპერატიულად მუშაობს, გვითხრეს, რომ ინფორმაცია ამის შესახებ ცესკოს ვებ გვერდზე პერიოდულად განახლდება.
მკითხველს შევახსენებთ, რომ 2018 წელს, საპრეზიდენტო არჩევნებზე, საზღვარგარეთ 55 უბანი გაიხსნა 39 ქვეყანაში. მაშინ, საზღვარგარეთ ორგანიზებულ არჩევნებში, პირველ ტურში – 4 801-მა, ხოლო მეორე ტურში – 9 028 ამომრჩეველმა მიიღო მონაწილეობა. ნიშანდობლივია, რომ 2018 წელს საზღვარგარეთ რეგისტრირებული ამომრჩევლების რაოდენობამ პირველი ტურისთვის შეადგინა 57 637, ხოლო მეორე ტურისთვის – 63 739 ამომრჩეველი.
პარლამენტის არჩევნებში მონაწილეობის მისაღებად, საზღვარგარეთ მყოფი საქართველოს მოქალაქეები უნდა იმყოფებოდნენ საქართველოს საკონსულო აღრიცხვაზე ან უნდა იყვნენ რეგისტრირებულნი საზღვარგარეთ მისამართზე საქართველოს მოქმედი კანონმდებლობის შესაბამისად.
მის მიცემა შესაძლებელია მხოლოდ საარჩევნო უბანზე პირადად გამოცხადებით; დაუშვებელია ხმის მიცემა დისტანციურად ან მინდობილი პირის საშუალებით.
საარჩევნო უფლებებისა და არჩევნებთან დაკავშირებული ნებისმიერი საკითხის თაობაზე, საზღვარგარეთ მყოფ საქართველოს მოქალაქეებს შეუძლიათ დაუკავშირდნენ უცხოეთში საქართველოს დიპლომატიურ წარმომადგენლობებს / საკონსულო დაწესებულებებს ან ცენტრალურ საარჩევნო კომისიას (ცესკო) ონლაინ ჩათის საშუალებით – ცესკო-ს ონლაინ ჩათი ან სატელეფონო-საინფორმაციო ცენტრის მეშვეობით შემდეგ ნომერზე: +995 32 2 51 00 51.
